27 ޖޫން 2025 - 23:28
އުރީދޫން އިންތިޒާމު ކޮށްގެން 3،000 އަށް ވުރެ ގިނަ ބައިވެރިންނާ އެކު "އުރީދޫ ފަން ރަން އައްޑޫ ސިޓީ 2025" މިއަދު ހަވީރު ފޯރިއާ އެކު ނިންމާލައިފި އެވެ.
އައްޑޫ މޭޔަރު އަލީ ނިޒާރާއި އުރީދޫގެ އިސްވެރިން ވެސް ބައިވެރިވެވަޑައިގެން ބޭއްވި މި ދުވުމަށް އައްޑޫން ވަރަށް ބޮޑު ތަރުހީބެއް ލިބުނު ކަމަށް އެ ކުންފުނިން ބުންޏެވެ. އައްޑޫގެ ގިނަ ބަޔަކު މަގުތަކަށް ނުކުމެ އެ ދުވުމަށް ވަރަށް ބޮޑަށް ސަޕޯޓުކޮށް، އެ މީހުންގެ ބައިވެރިވުން އޮތް ކަން ހާމަކުރި އެވެ. ހާއްސަކޮށް ވަރަށް ގިނަ ކުޑަކުދިން މި ދުވުމުގައި ބައިވެރި ކުރި އެވެ.
އުރީދޫން ބުނީ، މިއީ "އެންމެ އުފާވެރި ދުވުން" ކަމަށާއި އެ ދުވުމާ އެކު އައްޑު އަށް ބޮޑު އީދެއް މިއަދު އައި ކަމަށެވެ.
އައްޑޫ މަރަދޫން ފެށިގެން މި ދުވުން ކުރިއަށް ގެންދިޔައިރު، ކޮންމެ ކިލޯމީޓަރެއްގައި ބަހައްޓާފައި ހުރި ތަފާތު ފޯމް، ކުލަ އަދި އޮބްސްޓެކަލް ސްޓޭޝަންތަކުގެ ހަރަކާތްތަކުން އެ ދުވުމަށް އިތުރު ފުރިހަމަ ކަމެއް ގެނެސްދިން ކަމަށް އުރީދޫން ބުންޏެވެ.
"ރާއްޖޭގެ އެންމެ އުފާވެރި 5ކޭގެ ގޮތުގައި ބާއްވާ މި ހަރަކާތަކީ އާއިލާތަކާއި ރަހުމަތްތެރިންނަށް އުފާވެރިކަމާއި ހިނިތުންވުމާއި ހަނދާން ނައްތާ ނުލެވޭ ފަދަ ހަރަކާތްތަކަކުން ފުރިގެންވާ ދުވުމެކެވެ،" އުރީދޫން ބުންޏެވެ.
ފަން ރަން ނިންމާލި ކޮންމެ ދުވުންތެރިއަކަށް ހާއްސަ މެޑަލްއެއް އުރީދޫން ދިނެވެ. އެއީ އައްޑު އަށް ހާއްސަ ދޫންޏެއް ކަމަށް ބަލަމުން އަންނަ "ދޮންދީނި" ރަމްޒު ކޮށްދޭ ގޮތަށް ތައްޔާރު ކޮށްފައިވާ މެޑަލްއެކެވެ.
"އުރީދޫ މޯލްޑިވްސްއިން އައްޑޫ ސިޓީގެ މޭޔަރަށާއި އަޅުގަނޑުމެންގެ ހުރިހާ ޕާޓްނަރުންނާއި އިހުލާސްތެރި މުވައްޒަފުންނަށާއި މި ހަރަކާތް ހަގީގަތަކަށް ހެދުމަށް ޓަކައި އެއްބާރުލުން ދެއްވި ވޮލަންޓިއަރުންނަށް ވަރަށް އިހުލާސްތެރިކަމާ އެކު ޝުކުރު އަދާކުރަމެވެ،" އުރީދޫން ބުންޏެވެ.
އުރީދޫ ފަން ރަން އަކީ އެއްބައިވަންތަކަމުގެ ތެރޭގައި ދުޅަހެޔޮ ކަމަށް ބާރުދީ، އެންމެން އެއްކޮށް އުފާވެރި މާހައުލެއްގައި ދުވެލުމަށް މަގުފަހިކޮށްދޭ ހަރަކާތެއް ކަމަށް އުރީދޫން ބުންޏެވެ.
އުރީދޫ ފަން ރަން އަކީ ކޮންމެ އަހަރަކު އެ ކުންފުނިން ބާއްވަމުން އަންނަ ހަރަކާތްތަކުގެ ތެރެއިން އާއްމުންގެ މެދުގައި އެންމެ މަގުބޫލު އެއް ހަރަކާތެވެ. މިދިޔަ އަހަރު ހުޅުމާލޭގައި ބޭއްވި މަޖާ އަދި ވަރަށް ބޮޑަށް ފޯރި ނެގި މި ހަރަކާތްތަކުގައި 6،500 އަށް ވުރެ ގިނަ މީހުން ވަނީ ބައިވެރިވެފަ އެވެ.