25 ޖޫން 2025 - 13:47
ހުކުރު ދުވަސްތަކުގެ ހެނދުނުގެ ވަކި ވަގުތެއްގައި މާލެ އާއި ވިލިމާލޭގެ ބައެއް މަގުތަކުގައި ވެހިކަލް ނުދުއްވޭ ގޮތަށް ބަންދުކުރަން މާލެ ސިޓީ ކައުންސިލުން ނިންމައިފި އެވެ.
މާލެ ސިޓީ ކައުންސިލްގެ މިއަދު ޖަލްސާގައި މޭޔަރު އާދަމް އާޒިމް ހުށަހެޅުއްވީ މާލޭގެ ބޮޑެތި މަގުތައް ފިޔަވައި، އެހެން ހުރިހާ މަގުތަކެއްގައި ހުކުރު ދުވަސްތަކުގެ ފަތިހު 5:30 އިން ހެނދުނު 9:00 އަށް ވެހިކަލް ނުދުއްވޭ ގޮތަށް ހަމަޖެއްސުމަށެވެ.
މޭޔަރު ވިދާޅުވީ އެގޮތަށް ހަދަން ނިންމީ ކުޑަކުދިން ގެއިން ބޭރަށް ނުކުމެ، މަގުމަތީގައި ކުޅެ އުޅުމުގެ ފުރުސަތު ހޯދައިދިނުމަށް ކަމަށެވެ. އަދި އެއީ މާލެ ތެރޭގައި ކުދިންނަށް ކޮންމެވެސް ވަރެއްގެ ރައްކާތެރި މާހައުލަކަށް ނިކުމެ އުޅުމުގެ ފުރުސަތު ލިބޭނެ ކަމަކަށް ވާތީ ކަމަށް ވެސް އޭނާ ވިދާޅުވި އެވެ.
އެހެންވެ، އާޒިމް ހުށަހެޅުއްވީ މާލެ އާއި ވިލިމާލޭގެ ބައެއް މަގުތަކަކީ ހުކުރު ދުވަހުގެ ހެނދުނު ވެހިކަލް ދުއްވުން މަނާ މަގުތަކެއްގެ ގޮތުގައި ހެދުމަށެވެ.
"ކުދިންތައް ކޮޓަރި ތަކުގެ ތެރޭގައި އެ ތިބެނީ ހަތަރުދަމު. އެ ގަޑިއަކީ އެހާ ޓްރެފިކް ހައި ގަޑިއެއް ވެސް ނޫން، އެހެން ނަމަވެސް ބައެއް މީހުން ވަރަށް ބާރަށް ސައިކަލު ދުއްވާ، އެހެންވެ ރައްކާތެރިވާނެ އެކަހަލަ މަގުތައް އެ ވަގުތަށް ބަންދު ކޮށްލެވުނީމަ. ކުދިންނަށް ރަކާތެރިކަން ލިބޭނެ އެހެން ހަދައިފިއްޔާ،" އާޒިމް ވިދާޅުވި އެވެ.
ވިލިމާލެ ކައުންސިލަރު ފާތިމަތު ނަހުލާ ވިދާޅުވީ ކޮންމެ ހުކުރު ދުވަހެއްގައި ބަންދު ކުރުމަކީ އެންމެ ރަނގަޅު ގޮތް ކަމަށް ނުފެންނަ ކަމަށެވެ. އެހެންވެ، އޭނާ ހުށަހެޅުއްވީ ކޮންމެ މަހެއްގެ ވަކި ދުވަސްތަކެއް އެކަމަށް ކަނޑައެޅުމަށެވެ.
ކައުންސިލަރު ސައިފް ފާތިހު ވިދާޅުވީ ހުކުރު ދުވަހު ބަންދުކުރަން އެދޭ މަގުތައް އެ ދުވަހެއްގެ އެ ވަގުތަކަށް ބަންދުކުރަން ތާއީދު ކަމަށެވެ.
ސައިފްގެ ވާހަކަތަކަށް ތާއީދު ކުރައްވައި، ކައުންސިލްގެ ޑެޕިއުޓީ މޭޔަރު މުހައްމަދު އަރީޝް ހުށަހެޅުއްވީ މަގު ބަންދުކުރާ ވަގުތު ފަތިހު 5:30 ގެ ބަދަލުގައި ހެނދުނު 6 އިން 9 އަށް ބަދަލު ކުރުމަށެވެ.
ހުރިހާ ކައުންސިލަރުންގެ މަޝްވަރާއާއެކު ކައުންސިލުން ނިންމީ ހުކުރު ދުވަސްތަކުގެ ހެނދުނުގެ އެ ވަގުތުތަކުގައި ބަންދުކުރަން އެދޭ މަގުތަކުގައި ވެހިކަލް ނުދުއްވޭ ގޮތަށް ބަންދު ކުރުމަށެވެ. އާޒިމް ވިދާޅުވީ މަގުތައް ބަންދު ކުރުމަށް ފުލުހުންނާ ވެސް މަޝްވަރާ ކުރައްވާނެ ކަމަށެވެ.
މާލޭގެ ބައެއް މަގުތައް ހުކުރު ދުވަހުގެ ތިން ގަޑިއިރަށް ބަންދު ކުރަން ނިންމިއިރު، މޭޔަރު ކަމުގައި ޝިފާ މުހައްމަދު ހުންނެވިއިރު ވެސް ހަމަ އެގޮތަށް ބައެއް މަގުތައް ބަންދު ކުރި އެވެ. އޭރު ވެސް މަގުތައް ބަންދު ކުރީ ފުލުހުންގެ އެހީތެރިކަމާއެކު އެވެ.
ކައުންސިލުން އެގޮތަށް ހަމަޖެއްސިއިރު، ކޮންމެ އަހަރެއްގެ އީދު ދުވަސްތަކުގެ ހަވީރު މާލެ އާއި ހުޅުމާލޭގައި ވެސް ވަކި ވަގުތުތަކެއްގައި ވެހިކަލް ދުއްވުން މިހާރު ވެސް މަނާކުރެ އެވެ.