16 ޖޫން 2025 - 10:26
އިޒްރޭލްގެ ވެރިރަށް ތެލްއަވީވަށް އިރާނުން ރޭ ފަތިހު ވަރުގަދަ ހަމަލާތަކެއް ދީ، ތިން މީހަކު މަރާލައިފި އެވެ.
ފުލުފުލުގައި ދިން މިސައިލް ހަމަލާތަކުގައި ގިނަ ބަޔަކު ޒަހަމްވެ، ހަމަލާ އަމާޒުވި އިމާރާތްތައް ވަނީ ފުނޑުފުނޑުވެފަ އެވެ.
އިރާނުގެ ހަމަލައާ ގުޅިގެން ޒަހަމް ވެގެން އިޒްރޭލުގެ 74 މީހަކަށް ފަރުވާ ދިނުމަށް ހޮސްޕިޓަލަށް ގެންދިޔަ ކަމަށް ނިއުސް އެޖެންސީތަކުން ބުންޏެވެ. ތެލްއަވީވަށް އިރާނުން އަނެއްކާ ވެސް ވަރުގަދަ ހަމަލަތަކެއް މި ދިނީ އިޒްރޭލުން، އިރާނުގެ ތެހެރާނަށް ހަމަލާ ދިންތާ ހަތަރު ގަޑިއިރު ފަހުންނެވެ. އިރާނުން އިއްޔެ ވަނީ އިޒްރޭލްގެ ޕޯޓް ސިޓީ ރަށް ހައިފާ އަށް ވެސް ވަރުގަދަ ހަމަލާތަކެއް ދީފަ އެވެ. އެ ހަމަލާތަކުގައި އިޒްރޭލްގެ ހަތަރު މީހަކު މަރުވި އެވެ.
އިޒްރޭލުން އިރާނުގެ އާންމުން ދިރިއުޅޭ ސަރަހައްދުތަކަށް ދިން ހަމަލާތަކުގައި 224 މީހުން މިހާތަނަށް ވަނީ މަރާލައިފަ އެވެ. އޭގެ ތެރޭގައި 70 އަންހެނުންނާއި ގިނަ އަދަދެއްގެ ކުޑަކުދިން ވެސް ހިމެނެ އެވެ.