30 މެއި 2025 - 23:53
ފުލުހުންގެ މުއައްސަސާގެ ތަސައްވުރު ރަނގަޅު ކުރެވޭނީ ކޮންމެ ފުލުހަކު ވެސް އެ ފުލުހެއްގެ ޑިއުޓީ އަދާކުރާއިރު ރައްޔިތުންގެ ކަންބޮޑުވުންތައް ހުންނަ ކަންކަން ދެނެގަނެ އަމިއްލަ އަށް އިސްނަގައިގެން މަސައްކަތް ކޮށްގެން ކަމަށް އެ މުއައްސަސާ ހިންގުމާ ވަގުތީ ގޮތުން ހަވާލުވެ ހުންނެވި ޑެޕިއުޓީ ކޮމިޝަނަރު އޮފް ޕޮލިސް އިސްމާއިލް ނަވީން މިރޭ ވިދާޅުވެއްޖެ އެވެ.
އޭނާ އެހެން ވިދާޅުވީ، ފުލުހުންގެ 39 ވަނަ އަސާސީ ތަމްރީނު ކޯސް ފުރިހަމަކުރި 196 ފުލުހެއްގެ ދަސްވެނިވުމުގެ ހަފުލާގައި ވާހަކަ ދައްކަވަމުންނެވެ.
އައްޑޫ ޓްރެއިނިން ސްކޫލުން ގްރެޖުއޭޓުވި ފުލުހުންނަށް ސެޓްފިކެޓު ދިނުމުގެ ހަފުލާގައި ނަވީން ވިދާޅުވީ، ފުލުހުންގެ ތަސައްވުރު ރަނގަޅު ކުރެވޭނެ ދެވަނަ ކަމަކީ ރައްޔިތުންނާ ރީތި ބަހުން މުއާމަލާތްކޮށް، ރައްޔިތުން އެދޭ ގޮތަށް ފުލުހުންގެ ހިދުމަތް ބައްޓަން ކޮށްގެން ކަމަށެވެ.
"ރައްޔިތުންގެ ލޯތްބާއި އިހުތިރާމް ލިބޭ ބަޔަކަށް ވެގެން. އޯގާތެރި ބަޔަކަށް ވެގެން،" ޑީސީޕީ ނަވީން ވިދާޅުވި އެވެ.
އޭނާ ވިދާޅުވީ، ރައްޔިތުންގެ އިތުބާރު ލިބިފައިވާ ތަނަކަށް ފުލުހުންގެ އިދާރާ ހެދުމަށް ކޮންމެ ފުލުހަކު ވެސް ގަދައަޅައި މަސައްކަތް ކުރަން ވާނެ ކަމަށެވެ. އެ މޭރުމުން ވާހަކަ ދައްކަވަމުން ނަވީން އެދިވަޑައިގަތީ ރާއްޖެ އާއި ފުލުހުންގެ މުއައްސަސާ އަދި ފުލުހުންގެ އާއިލާތަކަށް ވެސް ހުތުރު ނަމެއް ލިބޭ ފަދަ އެއްވެސް ކަމެއް ނުކުރުމަށެވެ.
"ގައުމުގެ ފަހުރުވެރި ދަރިއަކަށް، ހިދުމަތްތެރި ފުލުހަކަށް ވުމަށް އަޒުމް ކަނޑައަޅާ. މި ހިދުމަތުގައި މަސައްކަތް ކުރުމަކީ ހަމައެކަނި ވަޒީފާއެއް ނޫން. މިއީ އަޅުގަނޑުމެންގެ ދިރިއުޅުމުގެ ވައްޓަފާޅި. ގައުމީ ހިދުމަތެއް،" އައްޑޫގައި ބޭއްވި ރަސްމިއްޔާތުގައި ނަވީން ވިދާޅުވި އެވެ.
އައްޑޫ ޓްރެއިނިން ސްކޫލުން މިރޭ ދަސްވެނިވުނު ފުލުހުންނަށް ނަވީން ދެއްވި ނަސޭހަތުގެ އުސްއަލިތައް:
- ފުލުހުންގެ ތަމްރީނަކީ އަމިއްލަ ދިރިއުޅުމަށް ވެސް އަޅާ އިތުރު ހަރުފަތަކަށް ހެދުން މުހިންމު.
- ކޮންމެ ފުލުހަކީ ވެސް މުޖުތަމައުގެ ސަލާމަތާއި މަސްލަހަތު ހިފަހައްޓާ މީހަކަށް ވުން މުހިންމު.
- ނަޒާހަތްތެރި، މަސައްކަތުގައި ޒިންމާދާރު އަދި ޖިސްމާނީ ގޮތުންނާއި ނަފުސާނީ ގޮތުން ދުޅަހެޔޮ ފުލުހަކަށް ވުމަށް ގޮވައިލެއްވި.
- ފުލުހުންގެ ދާއިރާ އިން ކުރިއަށް ދާނެ ލަނޑުދަނޑިތަކެއް ކަނޑައަޅަން އަޒުމް ކަނޑައަޅަން ޖެހޭ. ތައުލީމާއި ތަޖުރިބާ ހޯދުން މުހިންމު.
- ފުލުހުންގެ ހިދުމަތަކީ ކުރިއަށް ދެވޭނެ ފުރުސަތު ބޮޑު އެކަމަކު ވާދަވެރި ހިދުމަތެއް. ފުލުހުންގެ ކުރިއެރުމަށް ފުލުހުންގެ މުއައްސަސާ އިން ކުރާ މަސައްކަތްތަކާ އެއްވަރަށް ފުލުހުންގެ ހިތްވަރާއި ގާބިލްކަން ދައްކުވައިދޭން ވާނެ. އެފަދަ ފުރުސަތުތައް ހޯދަން އަބަދު އެދި ތިބި ބަޔަކަށް ފުލުހުން ވާން ވާނެ.
- ރާއްޖޭގައި ގާއިމް ކޮށްފައިވާ ކޮންމެ ފުލުހުންގެ މަރުކަޒެއްގައި މަސައްކަތް ކުރެވޭނެ ބަޔަކަށް ވާން ވާނެ. އިހުލާސްތެރި ފުލުހަކަށް ވުމަށް މަސައްކަތް ކުރަން ވާނެ.
ފުލުހުން ބުނީ އައްޑޫގައި ބޭއްވި 39 ވަނަ އަސާސީ ތަމްރީން ކޯހުގައި 200 އަށް ވުރެ ގިނަ ފުލުހުން ބައިވެރިވި އިރު، އޭގެ ތެރެއިން ކޯސް ފުރިހަމަކުރީ 196 ފުލުހަކު ކަމަށެވެ. ހަތަރު މަސްދުވަހަށް ކުރިއަށް ގެންދިޔަ އެ ތަމްރީނު ކޯސް ފެށީ މިދިޔަ ޖެނުއަރީ މަހުގެ 19 ވަނަ ދުވަހު ކަމަށް ފުލުހުން ބުންޏެވެ.