15 މެއި 2025 - 20:01
މަސްތުވާތަކެއްޗާ ދެކޮޅަށް ފުލުހުން ހިންގި އޮޕަރޭޝަނެއްގައި ހަ މީހުން ހައްޔަރުކޮށް، ދެ ކިލޯއާ ގާތްކުރާ އަދަދެއްގެ މަސްތުވާތަކެތި އަތުލައިގެންފި އެވެ.
މަސްތުވާތަކެތީގެ އިތުރުން ފައިސާ އާއި އިލެކްޓްރޯނިކް ވަސީލަތްތަކާއި ކެނަބިސް އެކުލެވޭ އުފެއްދުންތައް ވެސް މި އޮޕަރޭޝަންގައި ފުލުހުން އަތުލައިގަތެވެ.
މި މައްސަލައާ ގުޅިގެން ހައްޔަރުކުރީ:
- ހަސަން އަލީ، 26- ބޯގަންވިލާ، ގއ. ދާންދޫ
- މުހައްމަދު އަލީޝް އަހުމަދު، 28- މެދުރިގެ، ޅ. ކުރެންދޫ
- ވަލީދު މުހައްމަދު، 26- ސާރާޒް، ހދ. ނޮޅިވަރަންފަރު
- ޖައިލަމް މުހައްމަދު ޒަކީ، 28- ފެނިގެއްލިދާގެ، ސ. ފޭދޫ
- ޝަޔާން އިސްމާއިލް ވަހީދު، 18- ނާރެސް، ފ. ދަރަނބޫދޫ
- އިބްރާހީމް މައިޝަމް މާހިރު، 21- ތުނޑި، އއ. ތޮއްޑޫ
މިދިޔަ އަންގާރަ އަދި ބުދަ ދުވަހު ފުލުހުންގެ ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް ގުޅިގެން ހިންގި މި އޮޕަރޭޝަނުގައި މާލެ އާއި ހުޅުމާލެ ހިމެނޭ ގޮތަށް ހަތް ތަނެއް ބަލައި ފާސްކޮށްފައިވެ އެވެ.
އޮޕަރޭޝަންގައި އަތުލައިގަތް ހެރޮއިން އާއި މެތަމްފެޓަމިން އަދި ކެނަބިސް ހިމެނޭ ގޮތުން މަސްތުވާތަކެތި ކަމަށް ޝައްކު ކުރެވޭ ތަކެތީގެ ވަގުތީ ބަރުދަނަކީ 1943.76 ގްރާމް ކަމަށް ފުލުހުން ބުންޏެވެ.
ނިކޮޓިން-ސްޓައިލް ވޭޕް ކާޓްރިޖްތަކާއި "މޫންޝައިން" ކެނަބިސް ބުއިންތަކާއި ފްލޭވާ ކޮށްފައިވާ ތެޔޮ ވެސް އަތުލައިގެންފައިވެ އެވެ. އަދި 90،000 އަށް ވުރެ ގިނަ ރުފިޔާ އާއި 3،605 އެމެރިކާ ޑޮލަރުގެ އިތުރުން ހަ މޮބައިލް ފޯނާއި ދެ ލެޕްޓޮޕް ވެސް ފުލުހުންގެ ބެލުމުގެ ދަށަށް ގެންދިޔަ އެވެ.
މައްސަލައާ ގުޅިގެން ހައްޔަރުކުރި މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން ތިން މީހެއްގެ ބަންދަށް 10 ދުވަސް އަދި އަނެއް ތިން މީހުންގެ ބަންދަށް 15 ދުވަސް ކޯޓުން ދިނެވެ.