14 މެއި 2025 - 15:22
އެމެރިކާއިން ސީރިއާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލާނެކަން އެމެރިކާގެ ރައީސް ޑޮނަލްޑް ޓްރަމްޕު އިއުލާނުކުރެއްވުމަށް ފަހު ސީރިއާގެ ލީޑަރާ ބައްދަލުކުރައްވައި އިޒްރޭލާ ސުލްހަވެ ގުޅުން ގާއިމްކުރުމަށް އެދިވަޑައިގެންފި އެވެ.
ސައޫދީއަށް ކުރެއްވި ރަސްމީ ދަތުރުގައި ސީރިއާގެ ލީޑަރު އަހްމަދު އަލް ޝަރާއާ ބައްދަލުކުރައްވާފައި ވާއިރު މިއީ ފާއިތުވި 25 އަހަރުގެ ތެރޭގައި ސީރިއާގެ ލީޑަރަކާ ބައްދަލުކުރެއްވި އެމެރިކާގެ ފުރަތަމަ ރައީސްއަށް ވަނީ ވެފަ އެވެ.
ޝަރާ އަކީ އެމެރިކާއިން ޓެރަރިސްޓުންގެ ގޮތުގައި ކަނޑައަޅާފައިވާ ޖަމާއަތްތަކާ އެކު މީގެ ކުރިން ހަނގުރާމަވެރިއެއްގެ ގޮތުގައި ހުރި އަދި އެމެރިކާ "ވޯންޓެޑް ލިސްޓު" ގައި ވެސް އޮތް ބޭފުޅެކެވެ. މިދިޔަ ޑިސެމްބަރު މަހު ސީރިއާގެ ވެރިކަމުން ބައްޝާރުލް އަސަދު ދުރުކުރުމަށް ދިން ކުއްލި ވަރުގަދަ ހަމަލާތަކުގައި ލީޑަރެއްގެ ގޮތުގައި ހުރީ އޭނާ އެވެ.
ޓްރަމްޕާއި ޝަރާ، ސައޫދީގެ ވަލީ އަހުދު މުހައްމަދު ބިން ސަލްމާންގެ ހާޒިރުގައި ބައްދަލުކުރައްވައި ސަލާންކުރެއްވި އެވެ. އަދި ސީރިއާގެ އާ ސަރުކާރަށް އެހީވާ ތުރުކީގެ ރައީސް ރަޖަބް ތައްޔިބް އުރުޣާން ވެސް ވީޑިއޯ ލިންކަކުން އެ ބައްދަލުވުމުގައި ބައިވެރިވެ ވަޑައިގަތެވެ.
ވައިޓް ހައުސްއިން އިން ބުނީ ގަލްފުގެ އަރަބި ބައެއް ގައުމުތަކުން ސޮއިކުރި އަބްރަހަމް އެކޯޑްގައި ބައިވެރިވެ އިޒްރޭލާ އެކު އާންމު ހާލަތުގެ ގުޅުމެއް ގާއިމުކޮށްދިނުމަށް ޓްރަމްޕް ސީރިއާގެ ލީޑަރުގެ އަރިހުން އެދިވަޑައިގެންނެވި ކަމަށެވެ.
މީގެ އިތުރުން ފަލަސްތީނުގެ ހަނގުރާމަވެރިން ސީރިއާއިން ބޭރުކުރުމަށާއި ކުރުދީ ހަނގުރާމަވެރިން މިހާރު ބަލަހައްޓަމުން އަންނަ އައިއެސްގެ ހަނގުރާމަވެރިން ތިބޭ ކޭމްޕްތަކުގެ ކޮންޓްރޯލް ސީރިއާ ސަރުކާރުގެ ބާރުގެ ދަށަށް ގެންދިއުމަށް ވެސް އެދިވަޑައިގަތް ކަމަށް ވައިޓް ހައުސް އިން ބުންޏެވެ.
ކުރިން ކަނޑައެޅި ދޮޅު ގަޑިއިރަށް ވުރެ ދިގުވި ބައްދަލުވުމުގައި ޓްރަމްޕް ވިދާޅުވީ ބައްޝާރުގެ ވެރިކަމުގައި އެ ގައުމާ ދެކޮޅަށް އަޅާފައިވާ ފިޔަވަޅުތަކުގެ ސަބަބުން ހަގީގަތުގައި ވެސް ސީރިއާ އަށް ވަރަށް ބޮޑަށް ދަތިވެފައިވާ ކަމަށެވެ.