12 މެއި 2025 - 20:10
ގދ. ނަޑެއްލާއަށް ފޭބި ފަހުން ގެއްލިގެން ހޯދަމުން އައި މީހާ ފަޅު ރަށަކުން ފެނިއްޖެ އެވެ.
ގެއްލިގެން ހޯދީ ހދ. ނޮޅިވަރަން ސުހާނީ، އާދަމް އިބްރާހިމް، 34، އެވެ. އޭނާ ގެއްލިގެން ހޯދަން ފެށީ އިއްޔެ މެންދުރު 2:00 ހާއިރު އެ ރަށު ބަނދަރަށް ކައިރިކުރި "އިތުބާރު" ނަމަކަށް ކިޔާ ދޯނިން އެ ރަށަށް ފޭބުމަށް ފަހު އަނބުރާ ދޯންޏަށް ގޮސްފައިނުވާތީ، ފުލުހުންނަށް ރިޕޯޓުކުރުމާ ގުޅިގެންނެވެ.
ފުލުހުން މިއަދު ހަވީރު ބުނީ، އޭނާ މިއަދު ހަވީރު 16:45 ހާއިރު އޭނާ ފެނިފައިވާ ކަމަށާއި ފެނުނުއިރު ހާލު ރަނގަޅު ކަމަށެވެ. އޭނާ ފެނިފައިވަނީ ނަޑެއްލާ ކައިރި އޮންނަ ފަޅު ރަށަކުން ކަމަށް ފުލުހުން ބުނެފައިވެ އެވެ.
ނަމަވެސް އޭނާ އެ ރަށަށް ދިޔައީ ކިހިނެއް ކަމެއް އަދި ކޮން ބޭނުމަކު ކަމެއް ފުލުހުން ހާމައެއް ނުކުރެ އެވެ.