12 މެއި 2025 - 06:05
މި އަހަރު ހައްޖަށް ދިއުމަށް ބޭނުންވާ ހުއްދަ ވިއްކާ ކަމަށް ބުނެ މީހުން އަތުން ފައިސާ ނަގަމުން ދިޔަ ބިދޭސީ އަންހެނަކު ހައްޔަރުކޮށްފައިވާ ކަމަށް ސައޫދީ އަރަބިއްޔާއިން ބުނެފި އެވެ.
ވެރިރަށް ރިޔާޟް ސަރަހައްދުގެ ފުލުހުން މި މައްސަލައިގައި ހައްޔަރުކޮށްފައިވަނީ މިސްރު އަންހެނެއް ކަމަށާއި އޭނާގެ މައްޗަށް ދައުވާކުރުމަށް ކަމާބެހޭ އިދާރާތަކާ ހަވާލުކުރުމުގެ މަސައްކަތް މިހާރު ކުރިއަށްދާ ކަމަށް އޮފިޝަލުންނާ ހަވާާލާދީ ސައޫދީގެ ނޫސްތަކުން ބުނެފައިވެ އެވެ.
ހައްޖަށް ދިއުމަށް ހާއްސަ ހުއްދައެއް ބޭނުންވާއިރު އެ ހުއްދަ ހޯދައިދޭނެ ކަމަށް ބުނެ މި މީހާ އެކަން ޕްރޮމޯޓްކޮށް މީހުންނަށް ލަނޑުދެމުން ދިޔައީ ސޯޝަލް މީޑިއާގެ އެކި ވަސީލަތްތައް ބޭނުންކޮށްގެން ކަމަށް ފުލުހުން ވަނީ ބުނެފަ އެވެ.
ސައޫދީގެ އިންޓީރިއާ މިނިސްޓްރީން އިންޒާރު ދީފައިވާ ގޮތުގައި ޒުލްގައިދާ މަހުގެ ފުރަތަމަ ދުވަހުން ފެށިގެން ޒުލްހިއްޖާ މަހުގެ 14 ވަނަ ދުވަހުގެ ނިޔަލަށް، ވިޒިޓް ވިސާގައި ހުރި މީހަކު ހަރަމްފުޅު ސަރަހައްދަށް ނުވަތަ މައްކާއަށް ވަނަސް އަދި އެ މުއްދަތުގައި މައްކާގައި ހުރި ކަމުގައި ވިޔަސް 20،000 ރިޔާޟަށް ވުރެ ބޮޑު ނޫން އަދަދަކުން ޖޫރިމަނާކުރާނެ އެވެ.
މީގެ އިތުރުން ސައޫދީގައި ދިރިއުޅޭ އެހެން ގައުމެއްގެ މީހަކު ހުއްދަ ނެތި ހައްޖުގެ އަޅުކަމުގައި ބައިވެރިވާން މަސައްކަތްކޮށްފި ނަމަ ޑިޕޯޓްކޮށްލާނެ ކަމަށާއި އަލުން އެނބުރި ސައޫދީއަށް ވަދެވޭނީ 10 އަހަރު ފަހުން ކަމަށް ވެސް ވަނީ ކަނޑައަޅައިފަ އެވެ.