07 މެއި 2025 - 05:33
އިންޑިއާއިން މިރޭ ޕާކިސްތާނަށް ހަމަލާދިން ވަގުތު އިންޑިއާގެ އަސްކަރީ ދެ ޖެޓް ވައްޓާލާފައިވާނެ ކަމަށް ޕާކިސްތާނުގެ އަސްކަރިއްޔާއިން ބުނެފި އެވެ.
ބައެއް ރިޕޯޓްތައް ބުނާ ގޮތުގައި ތިން ޖެޓެއް ވައްޓާލި އެވެ. އެއީ "ރަފޭލް" މަރުކާގެ ފައިޓާ ޖެޓް ކަމަށް ވެސް އެ ރިޕޯޓްތަކުގައިވެ އެވެ.
"އިންޑިއަން އެއާފޯސްގެ، އެންމެ މަދުވެގެން ވެސް ދެ ޖެޓް ވައްޓާލާފައިވާކަން ކަށަވަރުވޭ،" ޕާކިސްތާން އަސްކަރިއްޔާގެ ތަރުޖަމާނު ލެފްޓިނެންޓް ޖެނެރަލް އަހްމަދު ޝަރީފް ޗައުދަރީއާ ހަވާލާދީ ސީއެންއެން އިން ބުންޏެވެ.
އޭނާ ވިދާޅުވީ ޕާކިސްތާނުގެ އެއްގަމު ސިފައިންނާއި ވައިގެ ސިފައިން އިންޑިއާގެ އަސްކަރިއްޔާއަށް އިތުރު އެހެން ގެއްލުންތައް ދީފައިވާ ކަމުގެ ރިޕޯޓްތައް ވެސް ލިބިފައިވާ ކަމަށެވެ. އެކަމަކު ދެ ޖެޓް ވައްޓާލިކަން ކަށަވަރު ކަމަށް ވިދާޅުވި އެވެ.
އިންޑިއާގެ ދެ ޖެޓް ވައްޓާލި ކަމަށް ޕާކިސްތާނުގެ ދައުލަތުގެ މީޑިއާއިން ވެސް ބުނެފައި ވާއިރު މި ވާހަކަތަކަށް އިންޑިއާއިން އަދި ޖަވާބެއް ނުދެ އެވެ.
ކަޝްމީރުގައި ބަޔަކު ބަޑިން ހަމަލާދީ 26 މީހަކު މަރާލުމަކީ ޕާކިސްތާނުން ޒިންމާ ނަގަންޖެހޭ ކަމެއްގެ ގޮތުގައި ބަލައި އިންޑިއާއިން ޕާކިސްތާނަށް ހަމަލާ ދިނުމުން ޕާކިސްތާނުން ވެސް ވަނީ ރައްދު ދޭނެ ކަމަށް ބުނެފަ އެވެ.
ޕާކިސްތާނުގެ އިންފޮމޭޝަން މިނިސްޓަރު އަތާއުﷲ ތަރާރް ސްކައި ނިއުސް އަށް ވިދާޅުވި ގޮތުގައި ރައްދު ހަމަލާ ދިނުމުގެ މަސައްކަތް ވަނީ ފަށައިފަ އެވެ.
ޕާކިސްތާނުން ބުނި ގޮތުގައި މަދުވެގެން ފަސް ތަނަކަށް އިންޑިއާއިން މިސައިލް ހަމަލާ ދީފައި ވާއިރު އަށް މީހަކު ވަނީ މަރުވެފަ އެވެ. އެއީ އާންމުން ކަމަށާއި އޭގެ ތެރޭގައި ކުޑަ ކުއްޖަކު ވެސް ހިމެނޭ ކަމަށް ބުންޏެވެ.