06 މެއި 2025 - 20:40
އިންޑިޔާ ކޯސްޓްގާޑު އުޅަނދު ރާއްޖެ އައިސް، ނުވަ ގައުމެއްގެ ކަނޑުގެ ސިފައިންނާ އެކު އިންޑިޔާ ކަނޑުގެ ތަމްރީން ހަރަކާތް ފަށައިފި އެވެ.
އިންޑިޔާއިން އިސް ނަގައިގެން އިންޑިޔާ ކަނޑުގެ ސަލާމަތާއި ރައްކާތެރިކަމަށް ހިންގާ ސެކިޔުރިޓީ އެންޑް ގްރޯތު ފޮ އޯލް އިން ދި ރީޖަން (ސާގަރު)ގެ ތަމްރީން ހަރަކާތަށް އިންޑިޔާގެ ކޯސްޓުގާޑުގެ މަނަވަރު އައިއޯއެސް ސާގަރު ވަނީ ރާއްޖެ އައިސްފަ އެވެ.
އިންޑިޔާ ކަނޑުގެ ނުވަ ގައުމެއްގެ 44 ކޯސްޓުގާޑު އޮފިސަރުންނާއި ކްރޫއިންނާ އެކު ހިންގާ މި ހަރަކާތުގައި ދިވެހި ކޯސްޓުގާޑުގެ ހަތަރު އޮފިސަރުން ބައިވެރިވެ އެވެ.
މި ހަރަކާތް ހިންގުމަށް މި މަނަވަރު ދަތުރު ފަށާފައިވަނީ މިދިޔަ މަހުގެ ފަސް ވަނަ ދުވަހު އެވެ. ރާއްޖެ އައުމުގެ ކުރިން މި މަނަވަރު ވަނީ ސީޝެލްސް، މޮރިޝަސް، ޓެންޒޭނިއާ އަދި މޮޒަމްބީކުގައި ބަނދަރުކޮށްފަ އެވެ.
މި ހަރަކާތުގެ ތެރެއިން ކަނޑުމަތީގައި ހަތިޔާރު ބޭނުންކުރުމާއި ހެލިކޮޕްޓަރު ރެސްކިއުތައް ހިންގުމުގެ ތަމްރީނުތައް ކުރިއަށްދާނެ ކަމަށް އިންޑިޔާގެ ކަނޑުގެ ސިފައިން ވަނީ ބުނެފަ އެވެ.