04 މެއި 2025 - 14:01
މި އަހަރު ނިމޭއިރު، ރ. ވާދޫއަކީ 100 ޕަސެންޓް އިޔާދަކުރަނިވި ހަކަތަ ބޭނުންކުރާ ރަށަކަށް ބަދަލުކުރަން ނިންމައިފި އެވެ.
ރައީސް ޑރ. މުހައްމަދު މުއިއްޒު އިއްޔެ ބޭއްވެވި ޕްރެސް ކޮންފަރެންސްގައި ވިދާޅުވީ އިޔާދަކުރަނިވި ހަކަތައިގެ ދާއިރާއަށް އިންވެސްޓްކުރުމުގެ ފުރުސަތު ދިނުމަށް މި ސަރުކާރުން ވަރަށް ބޮޑަށް އިސްކަންދޭނެ ކަމަށެވެ. އަދި އެ ދާއިރާއިން މިހާރު ވެސް ގިނަ މަޝްރޫއުތަކެއް ހިންގުމަށް ރޭވިފައިވާ ކަމަށް ރައީސް ވިދާޅުވި އެވެ.
އޭގެ ތެރެއިން އެއް މަޝްރޫއަކީ ވާދޫއަކީ 100 ޕަސެންޓް އިޔާދަކުރަނިވި ހަކަތަ ބޭނުންކުރާ ރަށަކަށް ބަދަލު ކުރުމެވެ. އެ މަޝްރޫއު އެންމެ ފުރަތަމަ ރައީސް އިއުލާން ކުރެއްވީ މިދިޔަ ޖެނުއަރީ މަހު ވާދުއަށް ކުރެއްވި ދަތުރުފުޅުގައި، އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގަ އެވެ.
"ރ. އަތޮޅު ވާދޫ އެއީ 100 ޕަސެންޓް ސޯލާއިން ހިންގާ ރަށަކަށް ހަދަން އަޅުގަނޑުމެން ނިންމާފައި އޮތީ. އެ ރަށުގެ ރައްޔިތުން ވެސް ވަރަށް އިނޮވޭޓީވްލީ މިހާރު ވެސް ފަށާފައި އޮތް ކަމެއް، ވަރަށް އީޖާދީ ރައްޔިތުންތަކެއް ދިރިއުޅޭ ރަށެއް މި ކަހަލަ ކަންކަމުގައި،" ރައީސް ވިދާޅުވި އެވެ.
"އެހެންވެ، އަޅުގަނޑުމެން ނިންމީ އެ ރަށް މޮޑެލް ރަށެއްގެ ގޮތުގައި ކަނޑައަޅައި، މި އަހަރު ނިމެން ވާއިރަށް އެ ރަށުގެ ހުރިހާ ކަމަކަށް ސޯލާ ޕަވާ ބޭނުންކުރާ ގޮތަށް ހެދުން."
ރައީސް ވިދާޅުވިގޮތުގައި، އާބާދީގައި 600 އަށް ވުރެ ގިނަ މީހުން ދިރިއުޅޭ ވާދޫގައި އެ މަޝްރޫއު ފެށުމަށް، އެ މަސައްކަތް މިހާރު އޮތީ ބަޔަކާ ހަވާލުކުރުމުގެ މަރުހަލާގަ އެވެ.
"މިއީ މޮޑެލްއަކަށް ބަލައިގެން، ޕައިލެޓް ޕްރޮޖެކްޓެއްގެ ގޮތުގައި ބަލައިގެން އެހެން ރަށްތައް ވެސް ފުލީ ސޯލާ ރަން ކުރާ ރަށްރަށަށް ހެދުމަކީ އަޅުގަނޑުމެން ވަރަށް ބޭނުންވާ ކަމެއް،" ރައީސް ވިދާޅުވި އެވެ.
ރާއްޖެއިން ތެލަށް ބާރޯސާވާ މިންވަރު ކުޑަކުރުމަށް، 2028 ވަނަ އަހަރު ނިމުމުގެ ކުރިން ރާއްޖޭގައި އުފައްދާ ހަކަަތައިގެ 33 ޕަސެންޓް އިޔާދަކުރަނިވި ހަކަތައަށް ބަދަލުކުރުމަކީ ރައީސް މުއިއްޒުގެ ވައުދެކެވެ.
އެ އަމާޒަށް ވާސިލުވުމަށް މާލެ ސަރަހައްދުގައި ވެސް އިޔާދަކުރަނިވި ހަކަތައިގެ ބޮޑު ޕްރޮޖެކްޓެއް ހިންގަން ސަރުކާރުން ވަނީ ނިންމައިފަ އެވެ. މާލެ އަތޮޅު ފަޅެއްގައި ހިންގަން ނިންމާފައިވާ "ފްލޯޓިން ސޯލާ" މި ޕްރޮޖެކްޓުގެ ދަށުން 100-150 މެގަވޮޓްގެ ހަތަކަ އިރުގެ އަލިން އުފައްދާނެ އެވެ. އެ ޕްރޮޖެކްޓް ހިންގައިދޭނެ ބަޔަކު ހޯދަން ސަރުކާރުން މިދިޔަ މާޗު މަހު ވަނީ އިއުލާންކޮށްފަ އެވެ.