01 މެއި 2025 - 18:22
އައިޖީއެމް ހޮސްޕިޓަލްގެ އެންއައިސީޔޫ އިން ނުރައްކާތެރި ބެކްޓީރިއާއެއް ފެނިފައިވާތީ ފިޔަވަޅުތައް އަޅައި އެ ބެކްޓީރިއާ ފެތުރުން ކޮންޓްރޯލްކޮށްފައިވާ ކަމަށް އެ ހޮސްޕިޓަލުން މިއަދު ބުނެފި އެވެ.
އައިޖީއެމްއެޗް އިން ބުނީ ނާޒުކު ހާލަތުގައި އެންއައިސީޔޫގައި ތިބި މަދު ކުދިންތަކެއް ކިބައިން ގިނަ ބާވަތްތަކުގެ ބޭހަށް ނުގުޑާ ޖަރާސީމެއް ނުވަތަ މަލްޓި-ޑްރަގް ރެޒިސްޓަންޓް އޯގަނިޒަމްސް (އެމްޑީއާރްއޯ) ފެނިފައިވާ ކަމަށެވެ.
އެކަމާ ގުޅިގެން ފިޔަވަޅުތައް އަޅައި ޑިސްއިންފެކްޓްކޮށްފައިވާ ކަމަށް އެ ހޮސްޕިޓަލުން ބުންޏެވެ.
މިފަދަ ބެކްޓީރިއާތަކަކީ ކްރިޓިކަލް ކެއާ ދޭ ތަންތަނުގައި، ހާއްސަކޮށް ނާޒުކު ހާލަތުގައިވާ ބަލިމީހުންގެ މެދުގައި ފެތުރުން އެކަށީގެންވާ އެއްޗެއް ކަމަށް ހޮސްޕިޓަލުން ބުނެ އެވެ.
"މި ކަން ފާހަގަކުރެވުމާ އެކު، ވަގުތުން އިންފެކްޝަން ކޮންޓްރޯލްކުރުމުގެ ހަރުކަށި ފިޔަވަޅުތަކެއް އަޅާފައިވާނެ،" އައިޖީއެމްއެޗުން ބުންޏެވެ.
މިހާރު ހާލަތު ރަނގަޅަށް ކޮންޓްރޯލް ކުރެވިފައިވާ ކަމަށާއި ބެކްޓީރިއާ އިތުރަށް ފެތުރެމުންދާކަން މިހާރު ފާހަގަ ނުވާ ކަމަށް ވެސް ބުންޏެވެ.
"ހުރިހާ ބަލިމީހުންނާއި މުވައްޒަފުންގެ ސިއްހަތާއި ރައްކާތެރިކަން ކަށަވަރުކުރުމަށްޓަކައި އިތުރު ރައްކާތެރިކަމުގެ ފިޔަވަޅުތައް ދަނީ އަޅަމުން،" އައިޖީއެމްއެޗް އިން ބުންޏެވެ.