17 މާޗް 2017 - 07:24
އިންޑިއާގައި ދެމަފިރިއަކާއި އޭނާގެ ދަރިފުޅު އެކުގައި ގްރޭޑް 12ގެ އިމްތިހާނު ހަދައި ތާރީޚުގެ ތެރެއަށް ވަދެއްޖެ އެވެ.
ބިޕްލަބް މޮންޑަލް އޭނާގެ ބައްޕަ ބަލްރާމް މޮންޑަލް އަދި މަންމަ ކަލްޔާނީ މޮންޑަލްއާ އެކު ބުދަ ދުވަހު އިމްތިހާނު ހެދުމަށް ފަހު ބުނި ގޮތުގައި އިމްތިހާނު ހޯލުގައި މަންމަ އާއި ބައްޕަ އަކީ ވެސް އޭނާގެ ވާދަވެރިންނެވެ. މައިންބަފައިންނަށް ވުރެ އޭނާ މާމޮޅަށް ޓެސްޓް ހެދި ކަމަށް ވެސް ބިޕްލަބް ބުންޏެވެ.
މި ތިން މީހުން ވެސް ކިޔަވަނީ ހަމަ އެއް މާއްދާތަކެކެވެ. އަދި މި ތިން މީހުންނަކީ ވެސް ނާދިއާ ޑިސްޓްރިކްޓްގެ ދަންތާލާގައި ހުންނަ ހަޒްރާޕޫރް ހައި ސްކޫލްގެ ދަރިވަރުންނެވެ.
ބިޕްލަބް، 18، އާއި އޭނާގެ މައިންބަފައިން ވަނީ ފާއިތުވީ ދެ އަހަރު މި ސްކޫލުން ކިޔަވައިފަ އެވެ. އެމީހުން ކިޔެވި މާއްދާތަކުގެ ތެރޭގައި ބެންގާލީ، އިނގިރޭސި، ހިސްޓްރީ، އެޑިޔުކޭޝަން، ސަންސްކްރިތު އަދި ފިލޯސަފީ ހިމެނެ އެވެ.
ބަލްރާމް، 42، އާއި ކަލްޔާނީ 32، ގްރޭޑް 10ގެ އިމްތިހާނުން ފާސްވެފައިވަނީ 2013 އާއި 2014 ގަ އެވެ.
އެހިސާބުގަނޑުގެ ބައެއް މީހުން ހިންދުސްތާން ޓައިމްސް އަށް ކިޔައިދިން ގޮތުގައި ބަލްރާމް ފަތިހު ފަތިހާ މަސައްކަތު ދެ އެވެ. އަދި މަސައްކަތުން އައިސް ކިޔަވަ އެވެ. އޭނާ އަކީ ދަނޑުވެރިއެކެވެ.
ބިޕްލަބްގެ މަންމަ ކަލްޔާނީ ބުނި ގޮތުގައި އޭނާ އަކީ ބަކަރި ގެންގުޅޭ މީހެކެވެ. ބަކަރިތައް ގޮވައިގެން ގޮސް ހުއިކާން ބައިތިއްބާފައި އޭނާ ގަހެއްގެ ދަށުގައި އިނދެ ފިލާވަޅު ދަސްކުރާ ކަމަށް ކަލްޔާނީ ބުންޏެވެ. ބޭކާރު ކޮށްލާނެ އެންމެ ވަގުތުކޮޅެއް ވެސް ނެތް ކަމަށް އޭނާ ބުންޏެވެ.
ބިޕްލަބް އޭނާގެ މައިންބަފައިންނާ އެކު ކިޔެވި ސްކޫލްގެ ހެޑްމާސްޓަރު ބުނި ގޮތުގައި ބިޕްލަބްގެ މައިންބަފައިން އެ ސްކޫލުން ކިޔެވުމުގެ ޝައުގުވެރިކަން ފާޅުކޮށް ސްކޫލަށް ވެއްދުމަށް އެދުނީ އެވެ. އެމީހުންގެ ކިޔެވުމަށް ހުރި ޝައުގުވެރިކަން ފެނިފައި ކަމާ ބެހޭ ފަރާތްތަކުން ހުއްދަ ނަގައިގެން އެމީހުންނަށް ސްކޫލްގައި ކިޔެވޭ ގޮތް ހަމަޖައްސައިދިނީ ކަމަށް ވެސް ހެޑް މާސްޓަރު ބުންޏެވެ.
ބަލްރާމް މޮންޑަލްގެ ބައްޕަ ވަނީ އޭނާ ވަރަށް ކުޑައިރު މަރުވެފަ އެވެ. އެހެންވެ އޭނާ ކިޔެވުން ހުއްޓާލާފައި މަސައްކަތް ކުރަން ފެށީ އެވެ. އޭރު އޭނާ އުޅެނީ ނުވަ ވަނަ ގްރޭޑްގަ އެވެ. އޭނާ ބުނި ގޮތުގައި ކިޔެވުން ހުއްޓާލަން މަޖްބޫރުވެގެން އެކަން އެގޮތަށް ކުރި ނަމަވެސް އޭނާ އަބަދުވެސް ވަރަށް ކިޔަވާ ހިތްވެ އެވެ. އަދި މިފަހަރު ހެދި އިމްތިހާނުން ފާސް ވެއްޖެ ނަމަ ކޮލެޖަށް ވަދެ ކިޔެވުން އިތުރަށް ކުރިޔަށް ގެންދަން ބަލްރާމް ބޭނުންވެ އެވެ.
ކަލްޔާނީގެ މައިންބަފައިން އޭނާ އާއި ބަލްރާމްގެ ކައިވެނި ކުރުވަން ގަސްތުކުރިއިރު އޭނާ ކިޔަވަމުންދަނީ ގްރޭޑް އަށެއްގަ އެވެ. މި ދެ މީހުން އޭރު ވެސް ކިޔަވާހިތްވި ނަމަވެސް ފައިސާގެ ދަތިކަމާ ހެދި ކިޔެވޭ ގޮތެއް ނުވި އެވެ.
އިމްތިހާނު ގާތްވެގެން އައި އިރު ބިޕްލަބް އާއި އޭނާގެ މައިންބަފައިން ދުވާލަކު 10 ވަރަކަށް ގަޑިއިރު ފިލާވަޅު ދަސްކުރުމުގައި ހޭދަ ކުރެ އެވެ. ކަލްޔާނީ ބުނި ގޮތުގައި އެމީހުން ދަށީ އިނގިރޭސި އަށެވެ. އެހެންވެ އިނގިރޭސިން ޓިއުޝަން ވެސް ނެގިކަމަށް އޭނާ ބުންޏެވެ.
ހިސްޓްރީ ނޫން ހުރިހާ މާއްދައަކުން ރަނގަޅު ނަތީޖާ ނެރެވޭނެ ކަމުގެ ފުރިހަމަ ޔަގީންކަން ބަލްރާމް އަށް އެބައޮތެވެ.
ބިޕްލަބް ބުނި ގޮތުގައި އޭނާގެ މައިންބަފައިންނަކީ އޭނާގެ އެކުވެރިން ފަދަ ބައެކެވެ. އޭނާގެ ކްލާސް މޭޓުންގެ ގޮތުގައި މައިންބަފައިން ލިބުނުކަމީ ހަމަ ވަރަށް ބޮޑު ނަސީބެއް ކަމަށް ބިޕްލަބް ބުންޏެވެ. އަދި އެންމެން އެއް ތަނަކަށް ގޮސް އެއް އިމްތިހާނެއް ހަދަން ޖެހޭތީ ވެސް އޭނާ ވަރަށް އުފާވެ އެވެ.