27 އެޕްރީލް 2025 - 14:19
މުނިފޫހިފިލުވުމާއި ކުޅިވަރު ކުޅެވޭނެ ގޮތަށް ގަލޮޅު ސިޓީ ޕާކް ތަރައްގީކުރާނެ ބަޔަކު ހޯދަން އިއުލާނުކޮށްފި އެވެ.
ސިޓީ ޕާކު އަލުން ތަރައްގީކުރަން އެތަން ބަންދު ކުރީ 2022 ވަނަ އަހަރު އެވެ. އޭރު ވެސް އެ ޕާކު ތަރައްގީކުރަން ކައުންސިލުން ޕްލޭން ކޮށްފައި އޮތަސް ފަހުން އެއްވެސް މަސައްކަތެއް ނުކުރެ އެވެ.
މިއަދު ކައުންސިލުން ކުރި އިއުލާނެއްގައި ވަނީ ގަލޮޅު ސިޓީ ޕާކް ތަރައްގީކުރުމުގެ މަސައްކަތުގެ ތެރޭގައި ހިމެނޭ ފޭސް 2 ގެ މަސައްކަތް ކުރާނެ ފަރާތެއް ހޯދުމަށެވެ. ސިޓީ ޕާކުގެ މަސައްކަތަށް ޝައުގުވެރިވާ ފަރާތްތަކުން އަންނަ މަހުގެ 8 ވަނަ ދުވަހު 9:00 އަށް އަގު ހުށަހަޅަންޖެހެ އެވެ.
އެ ޕާކު ތަރައްގީ ކުރަން ނިންމާފައި ވަނީ ސްޕޯޓްސް އޭރިއާގައި ބެޑްމިންޓަން ކޯޓަކާއި 3އޮން3 ބާސްކެޓްބޯޅަ ކުޅޭނެ ކޯޓަކާ ވެސް އެކު އެވެ.
އެ ސްޕޯޓްސް އޭރިއާގެ ގްރައުންޑް ލެވެލް ގައި 102 ސައިކަލް ޕާކު ކުރެވޭ ޖާގައިގެ ޕާކިން ޒޯނަކާއި އެ ޒޯނާ އިންވެގެން ކޮމާޝަލް ޖާގައިގެ ގޮތުގައި ދެ ސްލޮޓް ކަނޑައަޅާފައިވާ ކަމަށް ވެސް ބުންޏެވެ.
ޕާކާއި ސަލާހުއްދީން މިސްކިތާ ދެމެދުގައިވާ ހަނި އަދި އަނދިރި ގޯޅީގައި ނޭދެވޭ އަމަލުތައް ހިންގުން މަދުކުރަން އެ ސަރަހައްދު އަލިކުރަން ކައުންސިލުން ވަނީ ޕާކްގެ ފާރުގައި "އެމްބެޑެޑް ލައިޓް" ހަރުކުރަން ނިންމައިފަ އެވެ. އޭރުން، ޕާކްގެ އެތެރޭގައި ދިއްލާ ލައިޓްތަކާ އެކު އެ ސަރަހައްދަށް އެކަށީގެންވާ އަލިކަން ލިބޭނެ ކަމަށް ކައުންސިލުން ބުންޏެވެ.
ސިޓީ ޕާކު ތަރައްގީކުރަން ކައުންސިލުން ނިންމާފައިވާއިރު ކުރީގެ ސަރުކާރުތަކުން ވެސް އެ ޕާކުގައި އެކި މަސައްކަތްތައް ކުރި އެވެ.
ރާއްޖޭގެ މިނިވަންކަމަށް 50 އަހަރު ފުރުމާ ގުޅުވައިގެން މިލިއަނެއްހާ ރުފިޔާ ހަރަދުކޮށްގެން "ލެޑް ޕާކް" ގެ ނަމުގައި، ކުލަތަކުން ދިއްލޭ ގަސްތަކާ އެކު އެ ޕާކު ހުޅުވި އެވެ. އެކަމަކު، އެތަން ވެސް ރަނގަޅަށް ނުބެލެހެއްޓި، އެ ތަކެތި ހަލާކުވެގެން ދިޔައީ އެވެ.