22 އެޕްރީލް 2025 - 21:59
ސަރުކާރުން އެންމެ އިސްކަންދީގެން ކުރިއަށް ގެންދާ އުމްރާނީ ތަރައްގީގެ މަޝްރޫއުތަކުގެ ފަހުގެ މައުލޫމާތު ހިއްސާ ކުރައްވައި މަޝްވަރާ ކުރެއްވުމަށް މިއަދު ބޭއްވި ކެބިނެޓުގެ މަސައްކަތު ބައްދަލުވުން ވަރަށް ކާމިޔާބު ކަމަށާއި އެ މަނިކުފާނުގެ ރިޔާސީ ކެމްޕޭނުގައި ވައުދުވި މަޝްރޫއުތައް ތަންފީޒު ކުރުމުގެ ކަންކަން ވަރަށް ރަނގަޅަށް ކުރިއަށް ގެންދާ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ރައީސް އެހެން ވިދާޅުވީ، ކެބިނެޓު ސެޝަންގެ މަސައްކަތު ބައްދަލުވުމަށް ފަހު، އެ މަނިކުފާނުގެ ވަޓްސްއެޕް ގުރޫޕް ޗެނަލްގައި ހިއްސާ ކުރެއްވި މެސެޖެއްގަ އެވެ.
"މިނިސްޓަރުންނާއި މެނޭޖިން ޑައިރެކްޓަރުންނާ އެކު މިއަދު ބޭއްވި މަސައްކަތު ބައްދަލުވުން ވަރަށް ކާމިޔާބު. އަޅުގަނޑުގެ މެނިފެސްޓޯގައި ހިމެނޭ އަދި ރިޔާސީ ކެމްޕޭނުގައި ވައުދުވި ތަރައްގީގެ ހުރިހާ މަޝްރޫއުތަކެއް ކުރިއަށް ގެންދިއުމަށް ފުރިހަމަ، ތަފްސީލީ އަދި އަމަލީ ޕްލޭނެއް އެކުލަވާލައި، އެ ޕްލޭން ތަންފީޒު ކުރުމުގެ ކަންކަން ވަރަށް ރަނގަޅަށް ކުރިއަށް އެބަދޭ،" ރައީސް މުއިއްޒު ވިދާޅުވި އެވެ.
ރައީސް އޮފީހުން ބުނީ މިއަދުގެ މަސައްކަތު ބައްދަލުކުރެއްވުމުގައި، ސަރުކާރު ހިއްސާވާ ކުންފުނިތަކާ ހަވާލު ކޮށްފައިވާ މަޝްރޫއުތަކުގެ މައުލޫމާތު ވެސް ހިއްސާ ކުރައްވައި މަޝްވަރާ ކުރެއްވި ކަމަށެވެ.، ވީހާ ވެސް ގިނައިން، ސަރުކާރުން ހިންގާ މަޝްރޫއުތަކުގެ މައުލޫމާތު ރައްޔިތުންނަށް ފޯރުކޮށްދީ، ދެފުށް ފެންނަ ގޮތެއްގައި މަސައްކަތްތައް ބާރަށް ކުރިއަށް ގެންދަން ވެސް ރައީސް މުއިއްޒު ބާރު އެޅުއްވި ކަމަށް ރައީސް އޮފީހުން ބުންޏެވެ.
މަޝްވަރާ ކުރި ކުންފުނިތަކަކީ:
- ސްޓޭޓް ޓްރޭޑިންގް އޮގަނައިޒޭޝަން (އެސްޓީއޯ)
- ވޭސްޓް މެނޭޖްމަންޓް ކޯޕަރޭޝަން (ވެމްކ
- ފެނަކަ
- ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)
- މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)
- މާލެ ވޯޓާ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ)
މަޝްރޫއުތައް ނިންމަން ކަނޑައަޅާފައިވާ ތަރީހުތަކަށް ނިންމުމަށް ރައީސް ވިދާޅުވި ކަމަށާއި އެކަންކަން ފުރިހަމަ ކުރުމަށް ބޭނުންވާ ކަންކަން މިއަދުގެ ބައްދަލުވުމުގައި އޮޅުން ފިލުއްވި ކަމަށް ރައީސް އޮފީހުން ބުންޏެވެ.
އެ ބައްދަލުވުމުގައި ކުންފުނިތަކުގެ އެމްޑީ އިން ފާހަގަކުރެއްވި ކަންކަމަށް މަގުފަހި ކުރުމަށް އެޅޭނެ ފިޔަވަޅުތަކާ މެދު މަޝްވަރާ ކުރައްވައި، މަޝްރޫއުތަކުގެ މަސައްކަތްތައް އޮމާންކަމާ އެކު، ކުރިއަށް ގެންދިއުމަށް ވެސް ބައްދަލުވުމުގައި މަޝްވަރާ ކުރެއްވި ކަމަށް ރައީސް އޮފީހުން ބުންޏެވެ.