22 އެޕްރީލް 2025 - 19:02
އައްޑޫގައި ވޯޓާ ތީމް ޕާކެއް ހަދަން ނިންމައި، އެ މަސައްކަތުގެ އެންވަޔަރަމެންޓަލް އިމްޕެކްޓް އެސެސްމަންޓް (އީއައިއޭ) ހަދައިދޭނެ ބަޔަކު ހޯދަން ކައުންސިލުން އިއުލާންކޮށްފި އެވެ.
އީއައިއޭ ހަދައިދޭނެ ބަޔަކު ހޯދަން އައްޑޫ ކައުންސިލުން އެންމެ ފުރަތަމަ އިއުލާނު ކުރީ މި މަހު ހަ ވަނަ ދުވަހު އެވެ. ނަމަވެސް އެއްވެސް ބަޔަކު ބީލަން ހުށަހަޅާފައި ނުވާތީ މިއަދު އަލުން އިއުލާނުކުރީ އެވެ.
އެ ކައުންސިލުން ބުނީ ބީލަން ހުށަހެޅުމުގެ ފުރުސަތު ލިބޭނީ ހަމައެކަނި ރާއްޖޭގައި އެބާވަތުގެ ވިޔަފާރިކުރުމަށް ރަޖިސްޓްރީކޮށްފައިވާ ބަޔަކަށް ކަމަށެވެ.
ބީލަން ހުށަހެޅުމުގެ ފުރުސަތު މާދަމާއިން ފެށިގެން މި މަހުގެ 29 ވަނަ ދުވަހުގެ ނިޔަލަށް ހުޅުވާލާފައި ވާއިރު ބީލަން ހުށަހަޅާ ފަރާތުގެ މައުލޫމާތު މެއިލްކޮށްގެން ބިޑް ހުށަހެޅުމަށް ރަޖިސްޓްރީކުރުމަށް ކައުންސިލުން ވަނީ އެދިފަ އެވެ.
އައްޑޫގައި ވޯޓާ ތީމް ޕާކެއް އަޅަން ކައުންސިލުން ނިންމާފައި ވާއިރު، ބ. ކަމަދޫ ކައުންސިލުން ވެސް މިދިޔަ އަހަރު ވަނީ ޕާކެއް އަޅަން ނިންމައި އީއައިއޭ ހަދައިދޭނެ ބަޔަކު ހޯދަން ވެސް އިއުލާން ކޮށްފަ އެވެ.