04 އެޕްރީލް 2025 - 09:17
އއ. ހިމަންދޫގެ ފަޅު ތެރޭގައި އޮތް ލޯންޗެއްގައި ރޯވެ، އަޑިއަށް ހިނގައްޖެ އެވެ.
އެ ރަށުން ވާހަކަ ދެއްކި މީހަކު ބުނީ، މިއަދު ފަތިހުގެ ވަގުތެއްގައި ރޯވެފައިވަނީ 'ކައެލް ވިންގް' ނަމަކަށް ކިޔާ ލޯންޗެއްގައި ކަމަށެވެ.
އެއީ އެ އަތޮޅު ފެރިދޫ، މާޅޮސް އަދި ހިމަންދޫ އާއި މާލެ އާ ދެމެދު ދަތުރުކުރާ ފެރީ ލޯންޗެއް ކަމަށް އޭނާ ބުންޏެވެ.
އޭނާ ބުނި ގޮތުގައި އެ ލޯންޗުގައި ރޯވީ މިއަދު ހެނދުނު އެ ރަށުން ފުރަން ތައްޔާރުވެފައިވަނިކޮށެވެ.
އެ ލޯންޗު އެކީގައި ރޯވެ، އަނދަމުންދާ މަންޒަރު ފެންނަ ވީޑިއޯތަކެއް ސޯޝަލް މީޑިޔާގައި ވަނީ އާންމުވެފަ އެވެ.
ރޯވިތާ ކުޑަ ވަގުތުކޮޅެއްގެ ތެރޭގައި ލޯންޗު އަނދާ އަޅިއަށްވެ، މިހާރު ފަޅު ތެރެއަށް އަޑިއަށް ގޮސްފައިވާ ކަމަށް ވެސް އެ މީހާ ބުންޏެވެ.
ލޯންޗުގައި ރޯވާން މެދުވެރިވި ސަބަބު އަދި ސާފު ނުވާއިރު، މި ހާދިސާ އާ ގުޅިގެން ފުލުހުން އަދި އެމްއެންޑީއެފުން ވެސް އަދި އެއްޗެއް ނުބުނެ އެވެ.