19 މާޗް 2025 - 21:17
ސ. ހުޅުމީދޫގެ މަތިކިޅި އިކޯގާޑެންގައި އޮންނަ ޗަސްބިމުގައި މިއަދު މެންދުރު ރޯވި އަލިފާންގަނޑު އަދިވެސް ކޮންޓްރޯލް ނުކުރެވޭ ކަމަށް އެމްއެންޑީއެފުން ބުނެފި އެވެ.
އެ ސަރަހައްދުގައި އަލިފާން ރޯވި ކަމަށް ރިޕޯޓުކޮށްފައި ވަނީ މިއަދު ހެނދުނު 11:45 ހާއިރު އެވެ.
އެމްއެންޑީއެފްގެ އޮފިޝަލަކު "މިހާރު" އަށް ވިދާޅުވީ އަދިވެސް އަލިފާން މުޅިން ކޮންޓްރޯލް ކުރެވިފައި ނުވާ ކަމަށެވެ.
"އަޅުގަނޑުމެން އެއްކޮށް ނިވުން ކަމަށް މި ބަލަނީ އެއްވެސް ވަރަކަށް ދުން ވެސް ނާރަންޏާ. ވަރަށް ބޮޑު ސަރަހައްދެއްގައި އަލިފާން ހިފާފައި، އަޑީގައި ހިކި ގަސްތައް ވީމަ އެއްކޮށް ނުނިވިގެން، އެންމެ ފަހުން ލިބުނު މައުލޫމާތުގައި ބުނީ،" އޭނާ ވިދާޅުވި އެވެ.
މީދޫ ޗަސްބިމުގައި އަލިފާން ރޯވެގެން، އަލިފާން ނިއްވުމުގައި މަސައްކަތް ކުރަނީ އެމްއެންޑީއެފް ސަދަން އޭރިއާ ކޮމާންޑް ހުޅުމީދޫ ފަޔާ ސްޓޭޝަނުގެ ފަޔާ ފައިޓަރުންނެވެ.
އެ ހާދިސާ ހިނގީ ކިހިނެތް ކަމެއް އަދި ނޭނގެ އެވެ.
މީގެ ކުރިން ވެސް އެ ތަނުގައި އަލިފާނުގެ ހާދިސާތައް ހިނގާފައިވެ އެވެ.