20 މާޗް 2025 - 10:54
މިދިޔަ ޖެނުއަރީ މަހުގެ 19 ވަނަ ދުވަހުން ފެށިގެން އިޒްރޭލުން ޣައްޒާއަށް ހަމަލާ ނުދީ ތިބުމަށް ފަހު ވަރުގަދަ ހަމަލާތަކެއް ދިން ނަމަވެސް ހަމާސް އިން އަދިވެސް މަޝްވަރާގެ ދޮރު ބަންދު ނުކުރާ ކަމަށް އެ ޖަމާއަތުން ބުނެފި އެވެ.
"ހަމާސް އިން މަޝްވަރާގެ ދޮރު ބަންދުކޮށްފައި ނުވި ނަމަވެސް އާ އެއްބަސްވުންތަކެއް ގެނައުމުގެ ބޭނުމެއް ނެތް ކަމަށް ދެކެން،" މިސްރުގެ ވެރިރަށް ގާހިރާގައި ހުންނަވައި ފޯނުން އޭއެފްޕީއަށް ދެއްވި އިންޓަވިއުއެއްގައި ހަމާސްގެ އިސް އޮފިޝަލް ތާހިރް އަލް ނޫނޫ ވިދާޅުވި އެވެ.
އޭނާ ވިދާޅުވީ ހަނގުރާމަ ހުއްޓާލަން އިޒްރޭލަށް މަޖުބޫރުކުރުމަށް ގޮވާލާ ކަމަށެވެ.
އޮފިޝަލް ވިދާޅުވީ މިހާރު އެންމެން ސޮއިކޮށްފައިވާ އެއްބަސްވުމަށް ރިއާޔަތްކޮށް އާ އެއްބަސްވުންތަކެއް ހެދުމުގެ ބޭނުމެއް ނެތް ކަމަށެވެ.
އެމެރިކާގެ ކުރީގެ ރައީސް ޖޯ ބައިޑަންގެ ވެރިކަމުގައި އެކުލަވާލި ހަމަލާތައް ހުއްޓާލުމުގެ އެއްބަސްވުމުގެ ދަށުން، ހަނގުރާމައިގެ ދެވަނަ މަރުހަލާއެއް މާޗް މަހުގެ ކުރީކޮޅު ފަށަން އޮތީ ތާވަލްކޮށްފަ އެވެ. އެއީ އިޒްރޭލު ސިފައިން ޣައްޒާއިން ފޭބުމާއި ހަމަލާތައް ދާއިމީ ގޮތެއްގައި ހުއްޓާލުމުގެ މަސައްކަތެވެ.
"އަޅުގަނޑުމެންގެ އެއްވެސް ޝަރުތެއް ނެތް، އެކަމަކު އަޅުގަނޑުމެން އެދެނީ އިސްތިއުމާރުންގެ އަނިޔާވެރި ހަމަލާތައް ހުއްޓާލައި، ދެވަނަ ފިޔަވަހީގެ މަޝްވަރާތައް ފަށަން މަޖުބޫރު ކުރުވުމަށް،" ނޫނޫ ވިދާޅުވި އެވެ.
ހަނގުރާމަ ނިމުމަކަށް ގެނައުމަށް ބައިނަލްއަގްވާމީ މުޖުތަމައުން އަވަސް ފިޔަވަޅުތަކެއް އެޅުމަށް ގޮވާލާފައިވާއިރު، އިޒްރޭލުން ސޮއިކުރި ހަމަލާ ބަދަލުކުރުން ހުއްޓާލުމުގެ އެއްބަސްވުމާ ހިލާފުވެފައިވާ ކަމަށް އޭނާ ތުހުމަތު ކުރެއްވި އެވެ.
ގަތަރާއި އެމެރިކާ އަދި މިސްރުގެ މެދުގައި އެކުލަވާލާފައިވާ އެއްބަސްވުމަށް އަމަލުކުރަން ފެށީ އޮކްޓޫބަރު 7، 2023 ގައި އިޒްރޭލުން ޣައްޒާއަށް ހަމަލާދޭން ފެށިތާ 15 މަސް ފަހުންނެވެ.
އަންގާރަ ދުވަހު އިޒްރޭލުން ޣައްޒާއަށް ދިން ހަމަލާތަކުގައި 400 އަށް ވުރެ ގިނަ މީހުން ޝަހީދުވެފައި ވާއިރު، މިއީ މުޅި ހަނގުރާމައިގެ ތެރޭގައި ޣައްޒާގައި އެންމެ ނުރައްކާތެރި އެއް ދުވަހެވެ.