18 މާޗް 2025 - 20:46
އިލެކްޓްރިކް އުޅަނދުގެ ބެޓެރި ޗާޖު ކުރެވޭ ސިސްޓަމެއް ގާއިމްކުރުމަށް ބޭނުންވާ ސާމާނާ އެކު އިލެކްޓްރިކް ސައިކަލުތަކެއް ސްޓެލްކޯއިން ގެނެސްފި އެވެ.
އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީ މިއަދު ވިދާޅުވީ މިއީ ރައީސް ޑރ. މުހައްމަދު މުއިއްޒު، ކަނޑައަޅުއްވާފައިވާ ތިމާވެއްޓާ ރައްޓެހި ސިޔާސަތުތައް، ފުރިހަމަ ގޮތުގައި ތަންފީޒުކުރުމަށް އެނާޖީ މެނޭޖްމަންޓް ސިސްޓަމް ރާއްޖެއަށް ތައާރަފުކުރުމުގެ މަސައްކަތުގެ ބައެއް ކަމަށެވެ.
އޭގެ ދަށުން އިލެކްޓްރިކް އުޅަނދު ޗާޖު ކުރެވޭނެ ނިޒާމެއް މިހާރު ވަނީ ގާއިމްކޮށްފައިވާކަން ފާހަގަ ކުރައްވަމުން ފަހުމީ ވިދާޅުވީ ރާއްޖެއަށް ގެނެސްފައިވާ އެޑްވާންސްޑް ބެޓްރީ މެނޭޖްމަންޓް ސިސްޓަމަކީ ޓައިވާނުގެ މަޝްހޫރު ގޯގޮރޯ ބްރޭންޑްގެ ނިޒާމެއް ކަމަށެވެ.
އެ ނިޒާމު ފަސޭހައިން ރައްޔިތުންނަށް ލިބޭނެ އިންތިޒާމުތައް ހަމަޖެއްސުމަށް މަސައްކަތް ކުރަމުން އަންނަ ކަމަށް ވެސް އޭނާ ވިދާޅުވި އެވެ.
ބެޓެރި އާއި ސައިކަލު މިހާރު ވަނީ ރާއްޖެ ގެނެސްފަ އެވެ. ވަރަށް އަވަހަށް ބެޓެރި ސްޓޭޝަންތައް މާލެ އާއި ހުޅުމާލޭގެ އެކި ސަރަހައްދުތަކުގައި ބަހައްޓާނެ ކަމަށް އެ ކުންފުނިން ބުންޏެވެ.
ފަހުމީ ވިދާޅުވި ގޮތުގައި، ބެޓެރިތަކާ ކޮމްޕެޓިބަލް ސައިކަލު ރާއްޖެ އެތެރެ ކުރުމުގެ ފުރުސަތު އެ ވިޔަފާރި ކުރަން ބޭނުންވާ ފަރާތްތަކަށް ހުޅުވައިލާނެ އެވެ.
"މި ބެޓެރީ ސިސްޓަމްތަކާއި، ކާރު ޗާޖްކުރުމަށް ގާއިމްކުރެވިފައިވާ އީވީ ޗާޖިންގް ސްޓޭޝަނާ އެކު، އިލެކްޓްރިކް އުޅަނދުތަކަށް ލޯބިކުރާ ފަރާތްތަކުން އެ ފަދަ އުޅަނދު ގެންގުޅުމަށް ދެކެމުން އައި ޒަމާނީ ހުވަފެންތަކުގައި ކުލަޖެހި، ތިމާވެއްޓާ ރައްޓެހި އަދި ދެމެހެއްޓެނިވި ނިޒާމެއް އެކަށައެޅުމަށް ސަރުކާރުން ކުރަމުންގެންދާ ހަރުދަނާ މަސައްކަތްތަކަށް އިތުރު ފަސޭހަތަކެއް ލިބިގެންދާނެ،" ފަހުމީ ވިދާޅުވި އެވެ.
އޭގެ އިތުރުން ފަހުމީ ވިދާޅުވީ އެ ސައިކަލުތަކުގެ ޓެސްޓް ރައިޑްކޮށް، އަޖުމަ ބަލަން ބޭނުންވާ ފަރާތްތަކަށް އެ ފުރުސަތު ހުޅުވާލުމުގެ ގޮތުންނާއި، އެފަދަ ތިމާވެއްޓާއި ރައްޓެހި ސައިކަލުތަކަށް ޝައުގުވެރިކަން އުފައްދައި، އެއަށް ބަދަލުވުމަށް ހިތްވަރުދިނުމުގެ ގޮތުން އޭގެ ސައިކަލުތަކެއް ރާއްޖެގެނެސް އެ ޓެސްޓް ކުރުމުގެ ފުރުސަތު ފަހި ކުރުމަށް އިންތިޒާމްތަކެއް ހަމަޖައްސަމުން އަންނަ ކަމަށެވެ.
އެނާޖީ މެނޭޖްމަންޓް ސިސްޓަމާއި، އީވީ ޗާޖިންގް ސްޓޭޝަނަށް ބޭނުންވާ ހަކަތަ ފޯރުކޮށްދިނުމަށް ހަމަޖެހިފައިވަނީ ވެސް ތިމާވެއްޓާ ރައްޓެހި ނިޒާމުތަކުގެ ތެރެއިން ކަމަށްވާތީ، ސަރުކާރުން އިޔާދަކުރުވަނިވި ހަކަތައިގެ 33 ޕަސެންޓުގެ އަމާޒަށް ވާސިލްވުމަށް ކުރާ މަސައްކަތަށް އެހީއަކަށް ވާނެ ކަމަށް އޭނާ ވިދާޅުވި އެވެ.
ތިމާވެއްޓާ ރައްޓެހި، ރައްޔިތުންނަށް ފައިދާ ކުރަނިވި ބަދަލުތަކަށް ދިވެހިންނަކީ އަބަދުވެސް މަރުހަބާ ކިޔާނެ ބައެއް ކަމަށާއި އޭގެ ސަބަބުން މާލެތެރޭގެ ވައި ތަގައްޔަރުވުން ކުޑަކުރެވި، މި މުޖުތަމައުގައި ދިރިއުޅޭ ފަރުދުންގެ ސިއްހަތަށް ވެސް އޭގެ ފައިދާ ކުރާނެކަމަށް ފަހުމީ ވިދާޅުވި އެވެ.