17 މާޗް 2025 - 12:41
އަތޮޅު ތެރޭގެ 18 ރަށެއްގެ ސްކޫލުތަކުގައި ނުނިމި ހުރި މަސައްކަތްތައް ނިންމުމަށް ސަރުކާރުގެ ތިން ކުންފުންޏަކާ އެޑިޔުކޭޝަން މިނިސްޓްރީން ހަވާލުކޮށްފި އެވެ.
އެ މަސައްކަތްތައް ހަވާލުކޮށްފައިވަނީ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އަށާއި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ) އަދި ފެނަކަ ކޯޕަރޭޝަނަށެވެ.
އެ ކުންފުނިތަކާ އެ މަސައްކަތް ހަވާލުކުރީ އިއްޔެ އެޑިޔުކޭޝަން މިނިސްޓްރީގައި އެކަމަށްޓަކައި ބޭއްވި ރަސްމިއްޔާތެއްގަ އެވެ.
އެ އެއްބަސްވުމުގައި އެޑިޔުކޭޝަން މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. އިސްމާއިލް ޝަފީއު އެވެ. އަދި އެ ތިން ކުންފުނީގެ ފަރާތުން ސޮއި ކުރެއްވީ އެ ކުންފުނިތަކުގެ މެނޭޖިންގް ޑިރެކްޓަރުންނެވެ.
ފެނަކައާ ހަވާލުކޮށްފައި ވަނީ 12 ސްކޫލެއްގެ މަސައްކަތެވެ.
އެމްޓީސީސީއާ ހަވާލުކުރި ހއ. އުލިގަމާއި ރ. އުނގޫފާރާއި ކ. މާފުށި އަދި ވ. ފެލިދޫ ސްކޫލްގެ މަސައްކަތެވެ. އަދި އާރްޑީސީއާ ހަވާލުކުރީ ހއ. ފިއްލަދޫ އަދި ރ ހުޅުދުއްފާރު ސްކޫލްގެ މަސައްކަތެވެ.
ދާދިފަހުން 75 ރަށެއްގެ ޕޮލިސް ސްޓޭޝަންގެ މަސައްކަތް ވެސް ފެނަކަ އާއި އެމްޓީސީސީގެ އިތުރުން އާރުޑީސީއާ ސަރުކާރުން ވަނީ ހަވާލުކޮށްފަ އެވެ.
ރާއްޖޭގެ ހުރިހާ ރަށެއްގައި ހުއްޓިފައިވާ މަޝްރޫއުތައް މިއަހަރުގެ ތެރޭގައި ފެށުމަށް މި ސަރުކާރުން ވަނީ އަމާޒު ހިފައިފަ އެވެ. އެކަން ހާސިލް ކުރުމަށްޓަކައި އެކި ކުންފުނިތަކާ ގުޅިގެން މަސައްކަތް ކުރައްވާނެ ކަން ރައީސް ޑރ. މުހައްްމަދު މުއިއްޒު ކުރިން ވަނީ އިއުލަން ކުރައްވައިފަ އެވެ.