04 މާޗް 2025 - 12:24
މި ރޯދަމަހު މާލޭގެ ލޯކަލް މާރުކޭޓުން ފާހަގަވި އެއް ބާވަތަކީ "ގިއްސާ" އެވެ. ތޮރަލާއި ފުފޫ އާއިލާގެ އެ ބާވަތް މާރުކޭޓުގެ ގިނަ ގޮޅިތަކުން މި ފަހަރު ލިބެން ހުރި ވަރު މާ ގިނަ އެވެ.
އާންމުކޮށް މާރުކޭޓުގައި ގިއްސާ ލިބެން ހުރި ނަމަވެސް އެ ބާވަތް ވިއްކަނީ މަދުގޮޅިއަކުންނެވެ. އެކަމަކު ރޯދަމަހާ ދިމާކޮށް، ކުރިން ގިއްސާ ނުވިއްކާ ގޮޅިތަކުން ވެސް އެ ބާވަތް ވިއްކަން ފެށީ ޑިމާންޑު ބޮޑުކަމުންނެވެ.
މާރުކޭޓުގެ ގޮޅިއެއްގައި ހުރި ވިޔަފާރިވެރިއަކު ބުނީ، ރޯދަމަހަށް އެ ބާވަތް އިތުރުކުރީ، އެ އަށް އޮންނަ ޑިމާންޑު ބޮޑުވާނެތީ ކަމަށެވެ. އެއީ އާންމުކޮށް ބިދޭސީން ގިނައިން ގަންނަ ބާވަތެއް ކަމަށް ވިޔަސް ރޯދަމަހު ދިވެހިން ވެސް އެބާވަތް ގަންނަ ވަރު އިތުރު ކަމަށް އޭނާ ބުންޏެވެ.
ރިހަ އާއި މަސްހުނި ފަދަ ބާވަތްތައް ހަދަން ބޭނުންކުރާ ގިއްސާ ލިބެން ހުރި ގިނަ ގޮޅިތަކުން ބުނީ، އެ ބާވަތް ގެނެސްފައިވަނީ އއ. ތޮއްޑޫން ކަމަށެވެ. އޭގެ އަގަކީ ކިލޯއެއް 35ރ. އެވެ.
ވިޔަފާރިވެރިއަކު ބުނީ، ރޯދަމަހާ ދިމާކޮށް އެ ބާވަތް ދިވެހިން ގަންނަ ވަރު ވެސް އިތުރު ކަމަށެވެ. އެކަމަކު އާންމު ގޮތެއްގައި އެ ބާވަތް އެންމެ ގިނައިން ގަންނަނީ ބިދޭންސީން ކަމަށް އޭނާ ބުންޏެވެ.
"އިންޑިއާ، ބަންގްލަދޭޝް މީހުން ވަރަށް ގިނައިން ގަނޭ. ދިވެހިން ވެސް ކޮންމެވެސް ވަރަކަށް ގަނެ އުޅޭ. ރޯދަމަހު ދިވެހިން ގަންނަ ވަރު އިތުރު. އެހެންވެ، މި ގޮޅި އަށް ވެސް އެ ބާވަތް އިތުރު ކުރީ. ކުރިން ނުވިއްކަން،" އޭނާ ބުންޏެވެ.
މާރުކޭޓުގެ އެހެން ގޮޅިއެއްގައި ހުރި ވިޔަފާރިވެރިއަކު ބުނީ، އެއީ ރާއްޖޭގައި ހައްދަން ފަސޭހަ ބާވަތެއް ކަމަށާއި، އެ ބާވަތް އާންމު ގޮތެއްގައި ހައްދަނީ ދާގަނޑު މައްޗަށް ވެޔޮ އަރުވައިގެންގެނެވެ.