02 މާޗް 2025 - 14:20
އިއްޔެ ހަވީރުން ފެށިގެން މެދުނުކެނޑި މާލެ އަށް ކުރި ވިއްސާރާގައި މަގުތަކުން 16،911 ޓަނުގެ ފެން ހިންދައި، މާލެ އާއި އެކި ރަށްރަށުގެ ގިނަ ގެތަކަކަށް ސިފައިން އެހީތެރިކަން ފޯރުކޮށްދީފި އެވެ.
މާލެ އަށް އިއްޔެ ހަވީރުން ފެށިގެން ރޭ ފަތިހާ ހަމައަށް ވެހުނު ބޯ ވާރޭގެ ސަބަބުން ގާތްގަނޑަކަށް ހުރިހާ މަގުތަކެއްގައި ފެންބޮޑުވި އެވެ. އެހެންވެ، ސިފައިންގެ ހާއްސަ ޓީމުތައް ނުކުމެ ގޭގެ އަށް އެހީތެރިކަން ފޯރުކޮށްދީ، ފެން ވަނުމުގެ ފުރުސަތު އޮތް ގެތަކަށް ވެލިބަސްތާ ފޯރުކޮށްދިން ކަމަށް އެމްއެންޑީއެފުން ބުންޏެވެ.
އެކި ސަރަހައްދުތަކުގައި ފެން ޕަމްޕު ޖަހައިގެން ފެން ހިންދުމުގެ މަސައްކަތް އެމްއެންޑީއެފުން ކުރިއިރު މިހާރު ފެންބޮޑުވެފައިވާ ސަރަހައްދުތައް އާންމު ހާލަތަށް ގެނެވިފައިވާ ކަމަށް އެމްއެންޑީއެފުން ބުނެ އެވެެ.
އެމްއެންޑީއެފުން ބުނި ގޮތުގައި ފެން ހިންދުމުގެ މަސައްކަތް މިހާރު ވަނީ ވަގުތީ ގޮތުން މެދުކަނޑާލައިފަ އެވެ. އެ ވަގުތާ ހަމައަށް 16،911 ޓަނުގެ ފެން މަގުތަކުން ހިންދި އެވެ.
"މި އޮޕަރޭޝަނުގައި، ސިފައިން ވަނީ މާލޭގެ 8 ސަރަހައްދެއްގައި 19 ޕަންޕު ބޭނުންކޮށްގެން ފެން ހިންދުމުގެ މަަސައްކަތްކޮށްފައި،" އެމްއެންޑީއެފްގެ އޮފިޝަލް ވިދާޅުވި އެވެ.
އެ ވިއްސާރައިގައި މާލޭގެ ހުރިހާ މަގުތަކެއްގައި ކަހަލަ ގޮތަކަށް ފެން ބޮޑުވެ، ގޭގެއަށް ފެންވަދެ ގެއްލުންވި އެވެ. އެމްއެންޑީއެފުން ބުނި ގޮތުގައި އެ އޮޕަރޭޝަނުގައި މާލޭގެ 131 ގެއަކަށް އެހީތެރިވި އެވެ. އަދި 976 ވެލި ބަސްތާ ގޭގޭގައި ޖަހައިދީފައިވެ އެވެ.
ވިއްސާރައިގައި ފެންބޮޑުވުމުގެ ސަބަބުން ނަޖިސް ބޭރުވުމުގެ ހާދިސާތައް ހިނގާފައިވާތީ ހަތަރު ގެއަކުން 40 މީހަކު ރައްކާތެރި ތަންތަނަށް ބަދަލުކޮށް، ވަގުތީ ބޯހިޔާވަހިކަން ވެސް ފޯރުކޮށްދިނެވެ.
މާލޭގެ އިތުރުން ކ. ހުރާ، ކ. ގުރައިދޫ، ކ. ހިންމަފުށި، ކ. ތުލުސްދޫ ކ. މާފުށި، އދ. މާމިގިލި، ދ. މީދޫ، ފ. ނިލަންދޫ އަދި ލ. އިސްދޫގެ މަގުތަކުގައި ފެން ފެންބޮޑުވުމުން، ފެން ހިންދުމާއި ވެލި ބަސްތާ ޖެހުމުގައި އެމްއެންޑީއެފް އޭރިއާ ކޮމާންޑްތަކުގެ ސިފައިން ވެސް ހަރަކާތްތެރިވި ކަމަށް އެމްއެންޑީއެފުން ބުންޏެވެ.
ރާއްޖޭގެ ވިއްސާރައިގެ ރެކޯޑުތަކުގައިވާ ގޮތުން 24 ގަޑިއިރުގެ ތެރޭގައި މާލެއަށް 223.5 މިލިމީޓަރުގެ ވާރޭވެހުނެވެ.
މާލޭގެ އިތުރުން ރާއްޖޭގެ އެކި ސަރަހައްދުތަކަށް ބޯވާރޭގައި މަގުތަކުގައި ފެންބޮޑުވެ ވަރަށް ބޮޑަށް ގެއްލުންވި އެވެ. އެހެންވެ، ރޭ ދަންވަރު ރައީސް ޑރ. މުހައްމަދު މުއިއްޒު ވަނީ މިއަދަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސަވައިފަ އެވެ.
މެޓު އޮފީހުން މިވަގުތު ވެސް އޮތީ ބ. އަތޮޅުން ފެށިގެން ދ. އަތޮޅާ ހަމައަށް ވައިޓް އެލާޓް ނެރެފަ އެވެ. މެޓުން ލަފާކުރާ ގޮތުގައި އެ ސަރަހައްދުތަކަށް ކަނޑުތައް ވެސް ގަދަވާނެ އެވެ.