22 ޖެނުއަރީ 2025 - 22:30
އޮޑިދޯނިފަހަރު ބަންނަ މީހުންނަށް ލޯނު ލިބުމުގައި ދަތިތަކެއް ހުރުމުން އެމީހުންނަށް އެއްވެސް އިންޓްރެސްޓަކާ ނުލައި ލޯނު ލިބޭނެ އިންތިޒާމު ހަމަޖައްސައި ދެއްވާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ރާއްޖޭގައި އޮޑިދޯނިފަހަރު ބަނުމުގައި އެންމެ މަޝްހޫރު އެއް ރަށް ކަމަށްވާ، ރ. އިންނަމާދޫއަށް ވަޑައިގެން ރައީސް ވަނީ އެ ރަށުގައި އެ މަސައްކަތް ކުރާ މީހުންނާ ބައްދަލު ކުރައްވައިފަ އެވެ.
އެ ބައްދަލު ކުރެއްވުމަށް އިޝާރާތް ކުރައްވައި، ރައީސް ވިދާޅުވީ ރަށުގެ މާވަޑިންގެ ކަންބޮޑުވުމަކީ ފައިސާ ހޯދުމުގައި އޮތް ދަތިތައް ކަމަށެވެ. އެހެންވެ، ލޯނުގެ އިންތިޒާމު ހަމަޖެއްސުމަށް ވައުދުވެވަޑައިގަތެވެ.
"ލުއި ގޮތެއްގައި ރަހުނަކާ ނުލައި ނެގޭ ލޯނު ނެގޭނެ ގޮތް ބޭންކިން ނިޒާމުގެ ތެރެއިން ހަމަޖައްސައިދެއްވާނަން. އޭރުން މި އިންޑަސްޓްރީގައި މަސައްކަތްކުރާ ރާއްޖޭގެ އެކި ކަންކޮޅުތަކުގައި މަސައްކަތްކުރާ އަދި މިއަތޮޅުގައި މަސައްކަތް ކުރާ ފަރާތްތަކަށް ވަރަށް ބޮޑަށް އިންޑަސްޓްރީ ފުޅާކުރަން ފުރުސަތު ލިބޭނެ،" ރައީސް ވިދާޅުވި އެވެ.
ރައީސް ވިދާޅުވީ އޮޑިދޯނި ބަނުމުގެ ދާއިރާ ހާއްސަ ކުރަން ބޭނުންފުޅު ވަނީ ހަމައެކަނި ދިވެހިންނަށް ކަމަށެވެ. އަދި މި ދާއިރާއަށް ޒުވާނުން ވަނުމަށް އޮތް ގޮންޖެހުންތައް ނައްތާލުމަށް މަސައްކަތް ކުރައްވާނެ ކަމަށް ވިދާޅުވި އެވެ.
އެ ދާއިރާއިން ސަރުކާރުގެ އެކި މަޝްރޫއުތައް ދިނުމުގައި ވެސް އިސްކަން ދޭނީ ދިވެހިންނަށް ކަމަށް ރައީސް ވިދާޅުވި އެވެ. އެކަމަކު މި ދާއިރާގައި ހަރަކާތްތެރިވާ ޒުވާނުންގެ އަދަދު މަދުކަމުން އެކަމުގެ ކަންބޮޑުވުން ފާޅުކުރައްވައި، ރައީސް ވަނީ އިންނަމާދޫގައި މި ދާއިރާއިން މީހުން ތަމްރީނު ކުރުމަށް މަރުކަޒެއް ގާއިމު ކުރުމުގެ މަސައްކަތް ކުރައްވާނެ ކަމަށް ވިދާޅުވެފަ އެވެ.
އެ ރަށަށް ދިމާވެފައިވާ ތަރައްގީގެ މަޝްރޫއުތަކަށް އިޝާރާތް ކުރައްވައި، ރައީސް ވިދާޅުވީ އިންނަމާދޫގައި 50 ހައުސިން ޔުނިޓް އެޅުމަށް މިމަހުގެ ތެރޭގައި އިއުލާން ކުރެވޭނެ ކަމަށެވެ. އަދި ބަނދަރު ބޮޑުކުރުމުގެ މަޝްރޫއު އާއި ސްކޫލު އިމާރާތުގެ މަސައްކަތް ވެސް ކުރިއަށް ގެންދަވާނެ ކަމަށް ވިދާޅުވި އެވެ. އެމަނިކުފާނު ވަނީ ކުޅިވަރުގެ ދާއިރާއިން ވެސް އެ ރަށަށް ތަރައްގީ ގެންނަވާނެ ކަމަށް ވިދާޅުވެފަ އެވެ.