13 ޖެނުއަރީ 2025 - 21:33
ރައީސް ޑރ. މުހައްމަދު މުއިއްޒު އެސްޓޯނިއާ އަށް ވަޑައިގަތުމުން އެ ގައުމުގެ ރައީސް ޑރ. އަލާރް ކައިސް މިއަދު މަރުހަބާ ވިދާޅުވެއްޖެ އެވެ.
ރައީސް އޮފީހުން ބުނީ އެސްޓޯނިއާގެ ރައީސްގެ ދައުވަތަކަށް ކުރައްވާ ދަތުރުފުޅުގައި، ރައީސް އަދި ރާއްޖޭގެ ވަފުދަށް ރިޔާސީ ގަނޑުވަރުގައި މަރުހަބާ ވިދާޅުވި ކަމަށެވެ.
އެ ރަސްމިއްޔާތުގައި އެސްޓޯނިއާގެ އަސްކަރިއްޔާއިން ދެ ގައުމުގެ ގައުމީ ސަލާމް ކުޅެފައިވެ އެވެ. އެއަށްފަހު އެ ދެ ބޭފުޅުންގެ ޝަރަފުގައި އޮތް ޝަރަފްގެ ގާޑް، އިންސްޕެކްޓް ކުރެއްވި އެވެ.
ތައާރަފްގެ ބައްދަލުވުމަށް ފަހު ދެ ރައީސުން އެކުގައި ހަނދާނީ ފޮޓޯފުޅެއް ނަންގަވައި، މެހުމާނުންގެ ފޮތުގައި ރައީސް ވަނީ ސޮއިކުރައްވައިފަ އެވެ.
ރައީސްގެ މި ދަތުރުފުޅަކީ ޑިޖިޓަލް ޓެކްނޮލޮޖީ އާއި ސައިބަ ސެކިއުރިޓީއާ އީ-ގަވަނަންސް އާއި މޫސުމީ ބަދަލުތަކާއި ތައުލީމީ ދާއިރާއިން ދެ ގައުމުގެ ގުޅުން ބަދަހިކުރުމާއި ގުޅިގެން މަސައްކަތް ކުރުމަށް އިތުރު ފުރުސަތުތައް ހޯދުމަށް ކުރައްވާ މަސައްކަތުގެ ބައެކެވެ.
ޔޫރަޕްގައި ހިމެނޭ އެސްޓޯނިއާއަކީ 1.3 މިލިއަން މީހުން އުޅޭ ގައުމެކެވެ. ރާއްޖެ އާއި އެސްޓޯނިއާ ސިޔާސީ ގުޅުން ގާއިމްކުރީ މާޗު 22، 1994 ގަ އެވެ.