05 ޖެނުއަރީ 2025 - 06:45
(ބުދަ ދުވަހާ ގުޅޭ)
ކާރުތެރެއިން ދުވަނީ، ގަނދަކޯޅިން ދުވާ ކަހަލަ ވަހެކެވެ. ޑުރައިވަރު އިންނަނީ މަގުގެ ދެ ފަރާތަށް ބަލައިލަބަލައިލައެވެ. އޭނައަށް މަގު އޮޅުނީހެން ހީވާ ކަހަލައެވެ. ދެ ފަހަރަކު ކާރު ހުއްޓުމަށް ފަހު، ފަހަތަށް ޖަހައި، އެހެން ގޯޅިއެއް ވެސް އެޅިއެވެ. ހިތަށް އެރިއެވެ. އޭނަ އަތުގައި ފޯނެއް ނެތީ ހެއްޔެވެ؟ ގޫގުލްމެޕްސްއަކީ އޭނަ ދަންނަ އެއްޗެއް ނޫން ހެއްޔެވެ؟ ވާން އުޅެނީ ރަނގަޅު ކަމެއް ނޫން ހެން އަހަންނަށް ހީވާން ފެށީ އެ ހިސާބުންނެވެ. ވަކި ހާއްސަ ކަމެއް ވެގެނެއް ނޫނެވެ. ދޭތެރެއަކުން އަހަންނަށް ބަލައިލެވެނީ ނާދިޔާއަށެވެ. އަހަރެން ހިތަށް އެރިއެވެ. ދާންވީ ތަން އަހަރެން އޮޅުން ނުފިލުވީ ކީއްވެގެން ހެއްޔެވެ؟ އޮޅުން ފިލުވި ނަމަ، ނުބައި މަގަކުން ދިޔަސް ނުވަތަ ކިހައި ކައިރިވާކަން ވެސް އަހަންނަށް އެނގުނީހެވެ. ދެން ޖެހޭނީ ކާރު ހުއްޓަން ދެން އިންނާށެވެ. އަހަރެން އަހާ ސުވާލަކުން، ދާން އުޅޭ ތަން އަހަންނަށް ނޭނގޭކަން ޑުރައިވަރަށް އެނގޭކަށް އަހަރެން ބޭނުމެއް ނުވިއެވެ.
"އަދި ވަރަށް ގިނަ އިރު ވާނެތަ؟" ނާދިޔާ އިނގިރޭސި ބަހުން އެހިއެވެ.
އަހަރެން ހިތަށް އެރިއެވެ. ނާދިޔާ އެހެން ނޭހި ނަމަ އެވެ.
"ހިޔެއް ނުވޭ ދެން މާ ގިނަ އިރު ވާނެހެނެއް." ޑުރައިވަރު ބުންޏެވެ.
"މަގު އޮޅުނީތަ؟" ނާދިޔާ އެހެން ވެސް އެހިއެވެ.
"ނޫންނޫން!" ޑުރައިވަރު ބުނެލިއެވެ. "ކީއްވެ މަގު އޮޅެންވީ؟"
އަހަންނަކީ ޝައްކުބަލި ކުޑަ މީހެކެވެ. އެހެނަސް، ހިތަށް އެރިއެވެ. އެ ޑުރައިވަރުގެ ނިޔަތް ރަނގަޅެއް ނޫނެވެ. ދަރިފުޅާއި އަނބިމީހާއަށް މި ދެވުނީ ހާދަހާ ބޮޑު ދެރައެކެވެ. މާ އަވަހަށް މީހުންނަށް އިތުބާރު ކުރުމަކީ އަހަރެންނަށް އެޅުނު ވަރަށް ބޮޑު ޅަ އެއްޗެކެވެ. ދެން ކުރާނެ ކަމެއް ނެތެވެ. އެ ކަން ވިސްނުނުލެއް މާ ލަސްވީއެވެ. ހަދަންވީ ގޮތަކާ މެދު ވިސްނަން އިންދައި، ފަޅު މަގުތަކުން ދަތުރުކުރަމުން ގޮސް އިމާރާތްތައް މަދުވާން ފެށިއެވެ. އެތައް އިރެއް ފަހުން، ތިރި މަގަކަށް ކާރު ފައިބަން ފެށިއެވެ.
"މި އާދެވުނީ!" ޑުރައިވަރު ބުންޏެވެ.
ދެން ވެސް އަހަންނަކަށް ޔަގީނެއް ނުވިއެވެ. ކުއްލިއަކަށް އިރަމް ރޯން ފެށިއެވެ. އަހަރުމެންގެ ދަރިފުޅު އެންމެ ނުކުރާ ކަމަކީ ރުއިމެވެ. ވިހެއިއް ސުރެ ކަން އޮތީ އެހެންނެވެ. އެހެނަސް ދެން ހުއްޓައެއް ނުލިއެވެ. އިރަމް ހުއްޓައިލައްވަން ނާދިޔާއަށް ކުރެވުނު ހުރިހައި ކަމެއް ކުރިއެވެ. އަޑު ހައްތަހާ ވީ ގަދައެވެ. މަޑުކުރަމުން ގޮސް ގެއެއްގެ ކުރިމައްޗަށް ކާރު ހުއްޓިއެވެ. ވަރަށް އާދައިގެ ގޮތަކަށް ހަދައިފައި ހުރި ގެއެކެވެ. އެ ގޯޅީގައި ދެން ވެސް ހުރީ އެއް ފަންގިފިލާގެ، އާދައިގެ ގެތަކެކެވެ.
"މި ވަރަށް ރޮންޏާ ހިނގާ ދަމާ!" ނާދިޔާ ބުންޏެވެ. "ފަތިސްދަޅައިގަ މިހާ އަޑުގަދަވީމަ ކީކޭ މީހުން ހިތަށް އަރާނީ؟"
"އެކަމަކު މިހާ ހިސާބަށް އައިސްފަ ދެން ނުވަދެ ދާނެ ކަމެއް ނެތެއްނު!" އަހަރެން ބުނީމެވެ. "ހާދަހާ ބަޔަކު ވަންނަ ގެއެކޭ ދޯ؟ މާ ފޭމަސް މީހަކީބާ؟" ދެން އަހަރެން ވާހަކަ ދެއްކީ ޑުރައިވަރާއެވެ. "އަހަރުމެން ނުކުންނަންދެން މަޑުކުރައްޗޭ!"
އިރަމް ހުއްޓައެއް ނުލައެވެ. އޭނަ ގޮވައިގެން އަހަރުމެން އެ ގެއަށް ވަނީމެވެ. އިރަމްގެ އަޑުގަދަކަމުން އެންމެން ބަލަން ފެށިއެވެ. ކިޔޫ ވަރަށް ދިގެވެ. އިށީންނާނެ ތަންކޮޅެއް ވެސް ނެތެވެ. ދެ ޖިންސުގެ އެކި އުމުރުގެ މީހުން ތިއްބެވެ. ކޮންމެ މީހެއް އަތުގަ ވެސް ކަރުދާސްކޮޅެއް އޮތް ތަން އަހަންނަށް ފެނުނެވެ. ރަނގަޅަށް ބަލައިލި އިރު އެއީ ނަންބަރެކެވެ. ހިތަށް އެރިއެވެ. ނަންބަރު ދޫކުރަނީ ކޮން ތަނަކުން ހެއްޔެވެ؟ އެހެން ހިތަށް އެރި ތަނައި މީހަކު ނަންބަރެއް ދިއްކޮށްލިއެވެ. ބަލައިލި އިރު އެއީ ނަންބަރު ދޫކުރާ މީހާއެވެ. އޭނަ ދިން ނަންބަރުގައި އޮތީ ސާޅީސް ހަތެކެވެ.
"މި ވަރަކުން ނުވާނެ،" ނާދިޔާގެ ކަންފަތް ކައިރީގައި އަހަރެން ބުނީމެވެ. "ފަހެއް ކީއްކުރަން ހަޔެއް ޖަހާ އިރު ވެސް އަހަރުމެންނަކާ ނުޖެހޭނެ."
"ހިނގާ ދަމާ!" އަނެއްކާ ވެސް ނާދިޔާ ބުންޏެވެ. "މި ކަމެއް ނުވާނެ. އެންމެން އެ ތިބީ އަހަރުމެންނަށް ބަލަހައްޓައިގެން."
"އެކަމަކު އިރުއިރުކޮޅާ މި ތަނަކަށް ނާދެވޭނެ ނާދިޔާ!" އަހަރެން ބުނީމެވެ. "ކުޑަކުއްޖެއް ވީމާ ފަހަރެއްގަ އަހަރުމެންނަށް ޗާންސެއް ދީފާނެ. މިހާރު މިޔޮއް ގަޑި ޖެހެނީ."
އަހަރެން އެހެން ބުނި ތަނައި ދޮރެއް ހުޅުވައިލާފައި ޒުވާނަކު ބޯދިއްކޮށްލިއެވެ. އޭނަގެ ކަޅި ހުއްޓުނީ އަހަރުމެންނަށެވެ. ހުއްޓައި ނުލައި ރުއި އިރަމްއަށެވެ. ޒުވާނާ އަހަރުމެން ދައްކައިފައި ކޮންމެވެސް އެއްޗެކޭ ކިޔެވެ. ކިޔޫގެ އެންމެ ކުރިޔަށް ތިބި ދެމަފިރިން ވެސް ވާހަކަތަކެއް ދެއްކިއެވެ.
"ޕްލީޒް ކަމް!" ޒުވާނާ އިޝާރާތްކުރީ އަހަރުމެންނަށެވެ.
އަހަންނަށް ލަފާކުރެވުނު ގޮތުގައި، ކުޑަކުއްޖަކު ރޯތީ އަހަރުމެންނަށް އިސްކަންދިނީއެވެ. ދެން ތިބި މީހުން އެ ކަމަށް އެއްބަސްވީއެވެ. އަހަރުމެން ގޮސް އެ ކޮޓަރިއަށް ވަނީމެވެ. ވަރަށް އާދައިގެ ކޮޓަރިއެކެވެ. ގައިގައި ފޮށައެއް އޮޅައިލައިގެން އިން މީހަކު، ގޮނޑިއަކަށް ނުވާ އެނދަކަށް ނުވާ އެއްޗެއްގައި އިށީނދެލައިގެން އިނެވެ. އަހަރެން ފެނުމާ އެކު އޭނާ އިނގިރޭސިން ވާހަކަ ދައްކަން ފެށިއެވެ.
"ދިވެހިން؟" އޭނަ އެހިއެވެ.
އަހަރުމެން ބޯޖަހައިލުމުން އިށީންނަން ގޮނޑި ދައްކައިލިއެވެ. ހިތަށް އެރިއެވެ. އަހަރުމެންނަކީ ދިވެހީންކަން އޭނައަށް އެނގުނީ ކިހިނެއް ހެއްޔެވެ؟ އަހަރުމެން އިށީނީމެވެ. އެއީ ތަވީކަން އަހަންނަށް ވިސްނުނެވެ. އޭނަ ވަކި އެއްޗެއް ނާހާތީ އަހަރުމެން ވެސް ވަކި އެއްޗެއް ނުބުނަމެވެ. ތަވީ ބަލައިލީ އިރަމްއަށެވެ. އަހަރެން ހިތަށް އެރިއެވެ. އެއީ ހައިރާންވާންވީ ކަމެއް ނޫނެވެ. އެ ގަޑީގައި ކުޑަކުއްޖެއް ގޮވައިގެން އައުމުން ދައްކަން އުޅެނީ ކުޑަކުއްޖާކަން ނޭނގޭނީ ކާކަށް ހެއްޔެވެ؟
"ވެގެން މި އުޅޭ ގޮތަކީ.." އަހަރެން އުޅުނީ ވީ ގޮތް ކިޔައިދޭށެވެ.
"އަހަންނަށް އެނގޭ!" އިނގިރޭސިން އޭނަ ބުންޏެވެ. "އިރަމްއަށް ކިތައް އަހަރު؟"
އަހަރެން ހިތަށް އެރިއެވެ. އިރަމްގެ ނަން އަހަންނަށް ބުނެވުނީ ހެއްޔެވެ؟ ތަވީއަށް އެނގުނީ ހެއްޔެވެ؟
އެހެންވިއްޔާ އުމުރު ނޭނގުނީ ކީއްވެގެން ހެއްޔެވެ؟ އަހަރެން އުމުރު ބުނީމެވެ. އިތުރު އެއްޗެއް ނުބުނަމެވެ. ބޭނުންވީ ތަވީގެ މޮޅުކަން ބަލައިލާށެވެ. އޭނަ ތުންތަޅު ވަމުން، ކައިރީގައި ހުރި ފެންތަށިން ފެންފޮދެއް އިރަމްގެ މޫނަށް ބުރުވައިލިއެވެ. ވީ ކަމެއް ނެތެވެ. ދެވަނަ ފަހަރަށާއި ތިންވަނަ ފަހަރަށް ވެސް އެހެން ހެދިއެވެ. އެއްކަމެއް ވެސް ނުވިއެވެ. ކުޑަމިނުން އިރަމް ރުއިން ހުއްޓައި ވެސް ނުލިއެވެ. އަހަރެންގެ ހިތަށް، ކެނޑިނޭޅި އޭތި މީތި އަރަމުން ދިޔައެވެ. މި އާދެވުނީ ކޮން ކަހަލަ ތަނަކަށް ހެއްޔެވެ؟ މީ ކޮން ފެންވަރެއްގެ މީހެއް ހެއްޔެވެ؟ އޭނަ ފުންމައިގެން ތެދުވިއެވެ. އެތެރެއަށް ވަދެގެން ދިޔައެވެ. އޭރު ވެސް އިރަމް ރޮނީއެވެ.
"އެ ނިމުނީ؟" ނާދިޔާ އެހިއެވެ.
ބުނާނެ އެއްޗެއް ނޭނގިފައި އިންދައި، ދުންމުޖުމަރާއެއް ހިފައިގެން އޭނަ އައެވެ. އެއިން ކުލަ މަޑު ދުމެއް އަރައަރާ ހުއްޓެވެ. އެ ހިފައިގެން އިރަމް ކައިރިއަށް އައެވެ.
"މި ފަހަރު ޖެހޭނީ ހުއްޓާލަން،" އޭނަ ބުންޏެވެ. "ހުއްޓާލާ! ހަމަ މިހާރު ހުއްޓާލާ!"
އެހެން ބުނެފައި އިރަމްގެ މޫނަށް އޭނަ ދުން ބުރުވައިލިއެވެ. ހަމަ ބުރުވައިލުމާ އެކު އިރަމް ހުއްޓައިލިއެވެ. ހޭން ފެށިއެވެ. އެއީ ހަމަ އަޖައިބެކެވެ. ލޯ ކުރިމަތީގައި ހިނގައިދިޔަ ކަމެއް ނަމަވެސް އަހަންނަކަށް ގަބޫލެއް ނުކުރެވުނެވެ. އެ ހިސާބުން އަހަރެންގެ އިތުބާރު އޭނަ އަތުލިއެވެ. އޭނައަކީ މޮޅު މީހެއް ކަމާއި، ކަމަކީ ރޫހާނީ ކަމެއްކަން ގަބޫލު ކުރަން އަހަންނަށް މަޖުބޫރުވިއެވެ.
"ދެން އޭނައެއް ނުރޯނެ." އޭނަ ވަރަށް ޔަގީންކަމާ އެކުގައި ބުންޏެވެ.
އަހަރެން ކުޑަކޮށް ހާސްވިއެވެ. ކަނދުރާ ހަރު ނުލުމާއި، އުނަގަނޑު ހަރު ނުލުމާ އެކު ވެސް، ދަރިފުޅު ދެން ނުރޯނެ ވާހަކަ ބުނުމުންނެވެ. އިތުރަށް ވީ ދެރައެވެ. ހިތަށް އެރިއެވެ. ހިއްސު ކަނޑުވައިލީ ބާއެވެ؟
"އޭތި އަވަލާފަ ތިހިރީ،" އޭނަގެ އަޑުގައި ވަނީ ޔަގީން ކަމެވެ. "ކީއްކުރަން މި ކުއްޖާ އިޝްތިހާރު ކުރަނީ؟"
"އޭނ؟" އަހަންނަށް ބުނެވުނެވެ. "އިޝްތިހާރު؟"
"އާނ!" އަޑަށް ބާރުލާފައި އޭނަ ބުންޏެވެ. "މީ ދެން މިހާރު ވަރަށް އާންމު ކަމެއް. ހާދަ ބައެކޭ ދަރިންގެ ފޮޓޯ ނެޓަށް ލަނީ. އެއީ ވަރަށް ސުންޕާކަމެއް."
އަހަންނަށް ބަލައިލެވުނީ ނާދިޔާއަށެވެ. ނާދިޔާއަކަށް އެ ވާހަކަ ގަބޫލެއް ނުކުރެވުނެވެ. އޭނަގެ މޫނުމަތިން އެ ކަން އެނގެއެވެ.
"އެސްފީނާ ޖެހިފަ މިހިރީ،" އޭނަ ބުންޏެވެ. "ސަތޭކަ ޕަސަންޓު. ކުއްޖާގެ ގައިން ޖިންނި ނުނެރެވިއްޖެއްޔާ ޖިންނި ގޮވައިގެން އުޅެން ޖެހޭނީ. އެއީ ވަރަށް ވޭނީ ކަމެއް. މިހާރު ކަނދުރާޔާ އުނަގަނޑު ރަނގަޅަކަށް ހަރެއް ނުލައެއްނު؟ ދުވަސްކޮޅަކުން އަތެއް ނުހިއްލޭނެ. އަނގައިގަ ވެސް ވަރެއް ނުހުންނާނެ. ކުރަންވީ ކަންތައް މިހާރު ނުކުރެވިއްޖެއްޔާ ކުއްޖާ އުމުރު ދުވަހަށް އެނދުގަ ބާއްވަން ޖެހޭނީ."
ނާދިޔާއަކީ އަތުން ފޯނު ދޫވާ މީހެއް ނޫނެވެ. ވެގެންވާ ނަމަ، ނާދިޔާ ލާ ކޮންމެ ނޭވާއެއް ވެސް ފޮޓޯ ނަގާފައި ނެޓަށް ލީހެވެ. ވާ ލޯބިން އެއްޗެއް ނުބުނި ނަމަވެސް، އެ ކަން އަހަންނަކަށް ރަނގަޅެއް ނޫނެވެ.
"މީހަކު ބުނި އެއީ އަހަރުމެން މި އުޅޭ ގޭގެ މައްސަލައެކޭ." ދިފާއުގައި ނާދިޔާ ބުންޏެވެ.
"ތި ވާނީ މުސްކުޅި ގެއަކަށް،" އޭނަ ބުންޏެވެ. "ކޮންމެ އެ ކަހަލަ ގެއެއްގަ ވެސް މާޒީއެއް އޮންނާނެ. ވާހަކައެއް އޮންނާނެ. ހާދިސާތަކެއް ހިނގާނެ."
"ތި ބުނީނު ކުރަންވީ ކަންތައް މިހާރު ނުކުރެވިއްޖެއްޔާއޭ،" އަހަރެން ބުނީމެވެ. "ކޮން ކަމެއް ކުރަން..."
"އެކަމަކު އެ ގޭތެރެއިން ފާޑުފާޑުގެ އަޑުއަޑު ވެސް އިވޭ!" ނާދިޔާ ބުންޏެވެ.
ނާދިޔާ ބޭނުންވަނީ އިރަމްގެ ބައްޔާ ގެއާ ގުޅުވާށެވެ. ތިމާގެ ކުށެއް ނެތްކަން ސާބިތު ކުރާށެވެ.
"އިވޭނެ،" އޭނަ އެ ކަމަށް ވެސް އެއްބަސްވިއެވެ. "ބައެއް އަޑުއަޑަކީ ފާރުތަކުގަ ހަރުލާ އެއްޗެއް. ހިތާމަވެރި ހާދިސާއެއް ހިނގި ދުވަހަށް އަހަރު ފުރޭ ދުވަހު، ވަކި ގަޑިއެއްގަ އެ އަޑު ފާރުތަކުން ވީއްލޭނެ. އެއް ބިތުގަ ޖެހިފަ، އަނެއް ބިތުގަ ޖެހިފަ ލާހުރޭ! އިވެން ވެސް އިވޭނެ. އެއީ، ވާ ކަމެއް. އެކަމަކު އެ ކަމާ މި ކަމާ ގުޅުމެއް ނެތް. ބޭކާރު ވާހަކަ ހުއްޓާލާފަ ކުއްޖާ ސަލާމަތްކުރޭ!"
ދެން ނާދިޔާ އެއްޗެއް ބުނުމުގެ ކުރިން އަހަރެން ވާހަކަދެއްކީމެވެ.
"ކިހިނެއް ހަދަންވީ؟" އަހަރެން އެހީމެވެ.
"އަހަރެން ދޭނަން އުއްބައްތިއެއް،" އޭނަ ބުންޏެވެ. "ރޭގަނޑު ބާރަޖަހާ އިރު، ގެ އަނދިރި ކޮށްފަ، އުއްބައްތި ޖަހާފަ، ކުއްޖާ އެނދުގަ ބާއްވާ! މިރެއާ މާދަމާ ރޭ އެ ކަން ކުރާތި! އުއްބައްތި އަށް ވާނެ ގޮތެއް."
"ކޮން ގޮތެއް؟" ހާސްވެފައި އަހަންނަށް އެހުނެވެ. (ނުނިމޭ)