08 މާޗް 2017 - 06:11
ޑާކް ރެއިން އެންޓަޓައިންމަންޓްގެ ކުރިއަށް އޮތް ފިލްމް "މީ ލޯތްބަކީ" ހާއްސަވާ އެއް ސަބަބަކީ އެ ފިލްމުން އަނެއްކާ ވެސް އާ އެކްޓަރުންތަކެއް ފިލްމީ ދާއިރާ އަށް ނެރެތީ އެވެ. މި ފަހަރުގެ ލިސްޓް ވަރަށް ދިގެވެ. ކާސްޓް ވެސް އެހާ ބޮޑެވެ.
އެކަމަކު މި ފަހަރު ދައްކާލަން ބޭނުން ވަނީ ރޮމޭންޓިކް ކޮމެޑީ "މީ ލޯތްބަކީ" އިން އަލަށް ތައާރަފުވާ ތިން ބަތަލާއެއްގެ ވާހަކަ އެވެ. މިއީ ފިލްމުގެ ވަރަށް މުހިއްމު ރޯލްތަކުން ފެނިގެންދާ ވަރަށް ޒުވާން ބަތަލާއިންތަކެކެވެ.
ތިން ބަތަލާއިންގެ ރޯލް ތަފާތުވެފައި، ފިލްމްގައި ފެނިގެންދާ ކެރެކްޓާތަކުގެ ނަންތައް ވެސް ތަފާތު ވިޔަސްް، މިއީ ހަގީގަތުގައި ނަމުގެ ގޮތުން ވަރަށް އެއްގޮތް ތިން ބަތަލާއިންނެވެ. ތިން މީހުންގެ ނަން ވެސް ފެށެނީ އެއް އަކުރުންނެވެ. އެއީ ސާޖީ އާއި ސަމާ އަދި ސާޔާ އެވެ. މި މީހުންގެ ވާހަކަތައް ކުޑަކޮށް ދައްކާލަމާ ހިނގާށެވެ.
"މީ ލޯތްބަކީ" އަކީ ސަމާގެ ފުރަތަމަ ފީޗާ ފިލްމެވެ. އެކަމަކު އޭނާއަކީ ކެމެރާއަށް އާ، އެކްޓިން އަށް އާ މީހެއް ނޫނެވެ. އުރީދޫގެ ބައެއް ޓީވީ އިޝްތިހާރުތަކުން ވެސް ސަމާ މިހާރު ވެސް ފެންނާނެ އެވެ.
އޭގެ ތެރެއިން އެކައްޗަކީ ފޯން ހަލާކުވެގެން، ފޯން "އޮޕަރޭޝަން" ކުރާ އިޝްތިހާރެވެ.
"އަބަދު ވެސް އެކްޓް ކުރަން ޝައުގު ހުރޭ. އަސްލު މީ ލޯތްބަކީން ފުރުސަތު ލިބުނީ ޝާއްކޮ އައްމަޑޭ (ފިލްމުގެ ކާސްޓެއް) ގެ ފަރާތުން. އިންޓްރަސްޓް ހުންނަކަން އެނިގެން އޭނަ ބުނީ އެބަ އޮތޭ މިކަހަލަ ފުރުސަތެއް، ބޭނުން ހިފަންވީ ނޫންހޭ،" ފިލްމުން ފުރުސަތު ލިބުނު ގޮތާ ބެހޭ ގޮތުން ސަމާ ބުންޏެވެ.
އޭނާ ބުނީ ޑާކް ރެއިނަކީ އާންމުންގެ ވަރަށް ބޮޑު އިތުބާރަކާއި ލޯބި ހޯދާފައިވާ ސްޓޫޑިއޯއަކަށްވާތީ، އެތަނުން ލިބުނު ފުރުސަތަކީ ބިންގާ އަޅަން ލިބުނު ރަނުގެ ފުރުސަތެއް ކަމަށެވެ.
"އަސްލު މިއީ ވަރަށް ސަޅި އެކްސްޕީރިއަންސެއް. ވަރަށް ބޮޑު ކާސްޓަކާ އެކު ވަރަށް ފަން ޝޫޓިންއެއް ވަރަށް ހިތްހަމަޖެހިގެން ނިންމައިލެވުނީ،" ސަމާ ބުންޏެވެ.
"މީ ލޯތްބަކީ" ގައި ސަމާގެ ކުޅޭ ކެރެކްޓާގެ ނަމަކީ ނަޝް އެވެ. އޭނާއަކީ ވަރަށް ބަސް އަހާ ކުއްޖެކެވެ. ފިލްމުގައި ސަމާ ފެނިގެން ދާނީ ޖުމައްޔިލް ނިމާލް (ޖުމަލް) އާ އެކުގަ އެވެ.
"ވަަރަށް ހިތްހަމަޖެހޭ ކުޅެވިފައި އިން ރޯލާ ދޭތެރޭ. އުންމީދު ކުރަނީ ބެލުންތެރިންނަށް ވަރަށް ކަމުދާނެ ކަމަށް،" ސަމާ ބުންޏެވެ.
އެކްޓް ކުރަން ޝައުގު ހުއްޓަސް، އޭނާ ހުރީ ކެރިއާއެއްގެ ގޮތުގައި ފިލްމް ކުޅޭ ކަހަލަ ގޮތަކަށް ނޫނެވެ.
"ހޮބީއެއްގެ ގޮތުން ކުރާނަން. އިންޓްރަސްޓިން އަދި ވާސަޓައިލް ރޯލްތައް ލިބޭ ކަމަށް ވަންޏާ އޮފާތަކުގެ ބޭނުން ހިފާނަން،" އެއާޕޯޓްގައި ވަޒީފާ އަދާ ކުރަމުން އަންނަ ސަމާ ބުންޏެވެ.
ސަމާ އަދި ބުނީ ރާއްޖޭން ބޭރަށް ދިރިއުޅުން ބަދަލު ކުރުމުގެ ހިޔާލެއް ވެސް ގެންގުޅޭތީ، ފިލްމް ކުޅުމާ ދޭތެރޭ އެހާ ސީރިއަސްކޮށް ނުވިސްނާ ކަމަށެވެ.
ސާޖީއަކީ ކުރިން އެއްވެސް ވަރަކަށް އެކްޓް ކުރަން ވިސްނައިގެން ހުރި ޒުވާނެއް ނޫނެވެ. އެކަހަލަ ޝައުގުވެރި ކަމެއް ވެސް ނެތެވެ. އެކަމަކު އެކްޓަރު ޝާއްކޮ އައްމަޑޭއަކީ ސާޖީގެ ބޭބެގެ ވަރަށް ގާތް ރައްޓެއްސެކެވެ.
ބޭބެ ކައިރި އަށް ގޮސް އުޅުމުގެ ތެރޭގައި ޝާއްކޮ އައްމަޑޭއާ ދިމާވެ، އޭނާ އަބަދު ވެސް ފިލްމް ކުޅުމުގެ ވާހަކަ ދައްކަ އެވެ. އެހެންވެ އެންމެ ފަހުން ވާ ގޮތެއް ބަލާލަން ފުރުސަތެއް ލިބުމުން ބޭނުން ހިފާލީ ކަމަށް އޭނާ ބުންޏެވެ.
"އަސްލު އެއްވެސް ވަރަކަށް ކުރަން ހިތުވެސް ލައިގެން ހުރި ކަމެއް ނޫން މިއީ. އެކަމަކު ޝާއްކޮ އައްމަޑޭ އަބަދު ފިލްމް ކުޅެންވީ ނޫންހޭ ކިޔާތީ އާއި ޑާކް ރެއިންގެ އެއްޗެއްވީމަ އަސްލު އެއްބަސްވީ،" ޔޯމަން ގްރޫޕްގައި ވަޒީފާ އަދާ ކުރަމުން އަންނަ ސާޖީ ބުންޏެވެ.
އޭނާ ބުނީ "މީ ލޯތްބަކީ" އަކީ ކުރިން ހީކުރި ވަރަށް ވުރެ ފުރިހަމަ އަދި ސަޅި ތަޖުރިބާއެއް ކަމަށެވެ.
"ޑާކް ރެއިންގެ ޓީމާއެކު މަސައްކަތްކޮށްލުމަކީ ބޮޑު މަޖާގަނޑެއް. ޝޫޓިން ވަރަށް ފަންކޮށް، ވަރަށް ސަޕޯޓިވްކޮށް ދިޔައީ،" ސާޖީ ބުންޏެވެ. "ދެން އަނެއް ކަމަކީ ހީކުރި ވަރަށް ވުރެ އަސްލު ފަސޭހައޭ ބުނެވިދާނެ މިކަން."
އެ ފިލްމުގައި ސާޖީގެ ކެރެކްޓާއަކީ އަސްމާ އެވެ. އޭނަގެ ބައިވެރިއަކީ އާދަމް ރިޒްވީ (ރެކްސް) އެވެ.
"އެންމެ ފުރަތަމަ ކުޅެން ލިބުނު ރޯލެއް ނޫން މިހާރު ފިލްމްގައި ކުޅެފައި އިންނާނީ. ފުރަތަމަ އޮފާ ލިބުނު އިރު، ވަރަށް ކުޑަކުޑަ ރޯލެއް އިނީ. އެކަމަކު ފަހުން، ސާޖީގެ އެކްޓިން އަށް ބަލައިފައި މޮގާ [ޕްރޮޑިއުސަރު] އާއި ޗިއްޕެ [ޑައިރެކްޓަރު] ވެސް އެއަށް ވުރެ ބޮޑު އަދިު ސާޖީއާ މާ ބޮޑަށް ވެސް ގުޅޭ ކަހަލަ ރޯލެއް ދިނީ،" އޭނާ ބުންޏެވެ. "ވަރަށް ހިތްހަމަޖެހޭ ކުރެވިފައި ހުރި މަސައްކަތާ ދޭތެރޭ."
ސާޖީ ބުނި ގޮތުގައި މިހާރު ބޭނުން ވަނީ ބެލުންތެރިން ފިލްމާ ދޭތެރޭ ދެކޭ ގޮތް ބެލުމެވެ.
"ބެލުންތެރިންގެ ރިިއެކްޝަން އަންނާނެ ގޮތެއް ވަރަށް ބޮޑަށް ބަލަން ކެތްމަދުވެފައި މި ހުންނަނީ. ޔަގީނުން ވެސް ފިލްމް ބެލުންތެރިންނަށް ވަރަށް ކަމުދާނެ،" އޭނާ ބުންޏެވެ. "ޑާކް ރެއިނުން މީގެ ކުރިން ހަދާފައި ހުރި ފިލްމްތަކާ މާ ބޮޑަށް ސްޓޯރީގެ ގޮތުން މީ ލޯތްބަކީ ތަފާތު ވާނެ. މާ މަޖާ ވެސް ވާނެ."
މިހާރު ދެން އެންމެ ބޮޑަށް އުފެދޭނެ ސުވާލަކީ ކުރިއަށް އޮތް ތަނުގައި ވެސް ސާޖީ ފިލްމް ކުޅޭނެތޯ އެވެ؟
"ތިކަމަކާ އެއްވެސް ވަރަކަށް ނުވިސްނަން. އެކަހަލަ ހިޔާލެއް ނެތް އަސްލު. އެކަމަކު ޑާކް ރެއިންގެ އެއްޗަކުން އަނެއްކާ ވެސް ފުރުސަތެއް ލިބިއްޖެ ނަމަ ފުރުސަތުގެ ބޭނުން ހިފުމާ ދޭތެރޭ ސީރިއަސްކޮށް ވިސްނާނަން،" އޭނާ ބުންޏެވެ.
ޓީވީ ބަލާ މީހުންނަށް ސާޔާގެ މޫނު އަލެއް ނުވާނެ އެވެ. ދިރާގުގެ އިޝްތިހާރުތަކުން އޭނާ ފެންނާނެ އެވެ.
ސާޔާއަކީ ސާޖީގެ އެއްބަނޑު ކޮއްކޮ އެވެ. ކޮއްކޮ އާއި ދައްތައަށް ފިލްމަކުން ފުރުސަތު ލިބި، ސްކްރީން އެކުގައި ހިއްސާކޮށްލާނެ ފުރުސަތު ވެސް "މީ ލޯތްބަކީ" އިން ވަނީ ތަނަވަސްވެފަ އެވެ.
ސާޖީ ގޮތަށް ސާޔާއަކީ ވެސް ހުރީ ފިލްމް ކުޅެން ވިސްނައިގެން އެކަހަލަ ހިޔާލެއްގައެއް ނޫނެވެ. އެކަމަކު މި މަސައްކަތަށް އޭނާގެ ޝައުގުވެރިކަން ކޮންމެވެސް ވަރަކަށް އޮވެ އެވެ.
"ކުރިން ވެސް ޑާކް ރެއިންގެ ފިލްމްތައް ފެނިފައި ހުރީމަ ވަރަށް ހިތްހަމަޖެހޭ އެ މީހުންގެ މަސައްކަތްތަކާ ދޭތެރޭ. ވަރަށް ސަޅި އެ މީހުންގެ ފިލްމްތައް. އެހެންވެ ފުރުސަތެއް ލިބުމުން ހިތަށް އެރީ ބޭނުންކޮށްލާނީއޭ،" ފެންޓަސީގެ ސޭލްސް އެންޑް މާކެޓިންގައި ވަޒީފާ އަދާ ކުރަމުން އަންނަ ސާޔާ ބުންޏެވެ.
ސާޔާ ވެސް މިހާރު ފިލްމްގައި ކުޅެފައި ވަނީ އޭނާ އަށް ކުރިން ލިބުނު ރޯލެއް ނޫނެވެ. ކުރިން އޭނާ އަށް ލިބުނީ "މީ ލޯތްބަކީ" އިން ތައާރަފުވާ އެކްޓަރު މޯލްޑިވިއަން އައިޑޮލް އިން ވިދާލި އިބްރާހީމް އަމާނަށް މާ ކަމުގޮސްގެން އުޅޭ މީހެއްގެ ރޯލެވެ. އެ ކެރެކްޓާގެ ނަމަކީ ލިއު އެވެ.
"އެކަމަކު މިހާރު ކުޅެފައި އިންނާނީ ފުބޫގެ ލޯބިވެރިޔާގެ ރޯލް،" ސާޔާ ބުންޏެވެ.
"މީ ލޯތްބަކީ" ގެ ފުރަތަމަ ލަވަ "އޭ މަންޖޭ" މިހާރު ބެލުންތެރިންނަށް ފެނިފައިވާ އިރު، އެ ލަވައިން ސާޔާ ފެނިގެން ދެ އެވެ.
ބޮޑު ފިލްމަކުން ފުރުސަތު ލިބުނަސް ދޮންތަ ސާޖީ ގޮތަށް، ސާޔާ ވެސް ހުރީ ފިލްމީ ދާއިރާ ކެރިއާއެއްގެ ގޮތުގައި ނަގާ ކަހަލަ ވިސްނުމެއްގައެއް ނޫނެވެ.
"ހޮބީއެއްގެ ގޮތުން ނުކުރާނަމެކޭ ނުބުނާނަން. އެކަމަކު ފަސްޓް ޕްރިއޮރިޓީއަކީ ހަމަ ޖޮބް. އެކަމަކު މިސާލަކަށް ދިމާލަކުން ހިތްހަމަޖެހޭ ކަހަލަ އޮފާއެއް ލިބިއްޖެެއްޔާ އެކްސެޕްޓް ކުރުމާ ދޭތެރޭ ސީރިއަސްކޮށް ވިސްނާނަން،" އޭނާ ބުންޏެވެ.
ސާޔާ ވެސް ބުނީ ޑާކް ރެއިންއާ އެކު ކުރެވުނު ތަޖުރިބާއަކީ ހަނދާން ނައްތައިލެވޭނެ ކަމެއް ނޫން ކަމަށެވެ.
"މިއީ ވަރަށް ފަން އެކްސްޕީރިއަންސެއް. މުޅި ޓީމް ވަރަށް ގުޅިގެން، ވަރަށް މަޖާކޮށް މަސައްކަތް ކުރީ. ހިއެއް ނުވޭ ފިލްމެއްގެ މަސައްކަތް ކުރި ހެނެއް އަސްލު ދިޔަ ގޮތުން،" އޭނާ ބުންޏެވެ. "އެހެން ގޮތަކަށް ބުނާ ނަމަ މީ ލޯތްބަކީގެ މަސައްކަތް ދިޔައި ޕިކްނިކެއް ކަހަލަ ގޮތަކަށް."
ސަމާ އާއި ސާޖީ އަދި ސާޔާގެ ވާހަކައާ ހިސާބުން "މީ ލޯތްބަކީ" އިން ތައާރަފުވާ އާ އެކްޓަރުންގެ ވާހަކަ އަށް އަދި ނިމުނީކީ ނޫނެވެ. ބޮޑު ކާސްޓެއް ހިމެނޭ ފިލްމުގެ އެކި ރޯލްތަކުން ވަރަށް ގިނަ އާ ޒުވާނުން ފެނިގެން ދާނެ އެވެ.