07 މާޗް 2017 - 12:31
ނޭޕްލްސް (މާޗް 7) – ޗެމްޕިއަންސް ލީގުގެ ދެ ވަނަ ބުރުގެ ދެ ވަނަ ލެގުގައި މިރޭ އިޓަލީގެ ނަޕޯލީއާ ދެކޮޅަށް ކުޅޭނީ، އުނދަގުލާ ކުރިމަތިލާން ޖެހޭނެ ކަމަށް ވިސްނައިގެން ކަމަށާއި އެކަމަކު އެ ހާލަތަށް ވެސް ތައްޔާރުކަމަށް ރެއާލް މެޑްރިޑުގެ ކޯޗު ޒައިނުއްޒީން ޒިދާން ބުނެފި އެވެ.
މެޑްރިޑުގެ ދަނޑުގައި ކުޅުނު ފުރަތަމަ ލެގުން 3-1 އިން އެ ޓީމު މޮޅުވެފައިވާއިރު މިރޭގެ މެޗު އޮންނާނީ ނަޕޯލީގެ ސްޓޭޑިއޯ ސެން ޕައޮލޯގަ އެވެ.
"އަހަރެމެންނަށް އެނގޭ މިއީ ވަރަށް އުނދަގޫ މެޗަކަށް ވާނެކަން. އެއީ ޗެމްޕިއަންސް ލީގުގައި އަބަދުވެސް ކަން ހިނގާ ގޮތް،" ޒިދާން ބުންޏެވެ. "މި ސްޓޭޑިއަމުގައި ކުޅޭއިރު (ނަޕޯލީގެ) ސަޕޯޓަރުންގެ ފަރާތުން ޓީމަށް އިތުރު ހިތްވަރެއް ލިބޭނެ. މި ސްޓޭޑިއަމުގެ މާހައުލު އަހަންނަށް ވަރަށް ކަމުދޭ. އެއީ އަހަރެމެންނަށް ވެސް ލިބޭނެ އިތުރު ހިތްވަރެއް. އޭގެ ސަބަބުން ހަމައެކަނި ފައިދާ ވާނީ ނަޕޯލީއަކަށް ނޫން."
ޒިދާން ބުނީ ސްޕެއިނުގެ ހޯސޭ ކަލެޔޮން އާއި ބެލްޖިއަމްގެ ޑްރިއެސް މާޓިންސް އާއި އިޓަލީގެ ލޮރެންޒޯ އިންސީނޭ އަދި ސްލޮވާކިއާގެ މަރެކް ހަމްސިޗް ހިމެނޭ ނަޕޯލީގެ އެޓޭކާ މެދު ޖެހިލުން ނުވާ ކަމަށެވެ. އަދި ރެއާލް މެޑްރިޑް އޮތީ ބޮޑެތި ޓީމުތަކާ ކުޅެން ފަރިތަވެފައި ކަމަށް ޒިދާން ބުންޏެވެ.
"ނަޕޯލީގެ އެބަތިބި ވަރަށް މޮޅު ކުޅުންތެރިން. އެކަމަކު އަހަރެމެންގެ ވެސް އޮތީ ވަރުގަދަ ސްކޮޑެއް. އަހަރެމެންނަށް ވެސް މިކަން ވާނެ،" ޒިދާން ބުންޏެވެ. "އަހަންނަށް އެނގޭ ނަޕޯލީން މެޗު ފަށާނީ ވަރަށް ހައި އިންޓެންސިޓީއެއްގައިކަން. އެއީ އެ މީހުންނަށް މި މެޗުގައި ލަނޑު ޖަހަން މަޖުބޫރުވެފައިވާތީ. އެހެންވެ އެއީ ސަމާލުވާން ޖެހޭ ކަމެއް."
އެއިބާ އަތުން 4-1 އިން ރެއާލް މެޑްރިޑް މޮޅުވި މެޗުގައި އަނިޔާގެ ސަބަބުން ނުކުޅެވުނު ކްރިސްޓިއާނޯ ރޮނާލްޑޯ އާއި ސަސްޕެންޝަނުގެ ސަބަބުން ނުކުޅެވުނު ގަރެތު ބޭލް އަށް މިރޭ ކުޅެވުމަކީ ލިބޭ ހިތްހަމަޖެހުމެކެވެ.