01 ޑިސެމްބަރ 2024 - 09:26
އަންހެނުން ބާރުވެރިކުރުމަށް މަސައްކަތްކުރާ އަމިއްލަ ޖަމިއްޔާއެއް ކަމަށްވާ ވިމެން އިން މެނޭޖްމަންޓް މޯލްޑިވްސް އިން ދެމުން އަންނަ ޕްރޮފެޝަނަލް އެންޑް ކެރިއާ ވުމަން އެވޯޑްސް "މިހާރު" ގެ ނޫސްވެރިޔާ، އާސިމާ ނިޒާރަށް ރޭ ލިބިއްޖެ އެވެ.
އާސިމާއަށް ލިބުނީ މީޑިއާގެ ދާއިރާ އިން ލީޑާޝިޕް އެކްސެލެންސް އެވޯޑެވެ.
ނޫސްވެރިކަމުގެ ދާއިރާއަށް އާސިމާ ނިކުތީ "ހަވީރު" ނޫހުން ޑިސެމްބަރު 2014 ގަ އެވެ. އަދި 2016 ގައި އެ ނޫސް ހުއްޓާލަން ޖެހުމުން އެ ނޫހުގެ ނޫސްވެރިންނާ އެކު އުފެއްދި "މިހާރު" ގައި އޭނާ އަންނަނީ އަދިވެސް މަސައްކަތް ކުރަމުންނެވެ.
އާސިމާގެ 10 އަހަރުވީ ނޫސްވެރިކަމުގެ ކެރިއަރުގައި އޭނާ އަންނަނީ އިޖުތިމާއީ ދާއިރާއާ ގުޅޭ އެކި ހަބަރުތައް ލިޔަމުންނެވެ. ރާއްޖޭގެ އިޖްތިމާއީ ބޮޑެތި މައްސަލަތަކަށް އަލިއަޅުވާލައި އާސިމާ ލިޔެފައިވާ ޚަބަރާއި ރިޕޯޓުތަކުން މުޖުތަމައަށް އެދެވޭ ބަދަލުތަކެއް ވަނީ ގެނެވިފަ އެވެ.
އާސިމާ އަކީ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) ގެ ހިންގާ ކޮމިޓީގެ ވެސް މެމްބަރެކެވެ.
ބައިނަލްއަގުވާމީ ޖަމިއްޔާއެއްގެ ދަށުން ހިންގަމުން އަންނަ، ވިމެން އިން މެނޭޖްމަންޓް މޯލްޑިވްސް އިން ކޮންމެ އަހަރަކު ދެމުން އަންނަ "ޕްރޮފެޝަނަލް އެންޑް ކެރިއާ ވުމަން އެވޯޑްސް" އަކީ ރާއްޖޭގެ އެކި ދާއިރާތަކުން ފާހަގަކޮށްލެވޭ އަންހެނުން ކުރާ މަސައްކަތްތަކުގެ އަގުވަޒަންކޮށް، އެ މީހުންނަށް ހިތްވަރުދިނުމުގެ ގޮތުން ދެމުން އަންނަ އެވޯޑެވެ.
މީގެ ކުރިން މި އެވޯޑު ވަނީ މިހާރުގެ ނިއުސް އެޑިޓަރު ފަޒީނާ އަހުމަދަށް ވެސް ލިބިފަ އެވެ.