18 ނޮވެމްބަރ 2024 - 19:11
ލިލީމަގުގައި މުލިއާގޭ ވެހިކަލް ގަރާޖުގެ ގޮތުގައި ބޭނުން ކުރަމުން އަންނަ އިމާރާތާއި ގޯތި ޒުވާނުންގެ "ތާޑް ސްޕޭސް" އެއް ނުވަތަ މަރުކަޒެއް ގޮތުގައި ތަރައްގީ ކުރުމަށް ރައީސް ޑރ. މުހައްމަދު މުއިއްޒު ނިންމަވައިފި އެވެ.
އެމަނިކުފާނު އެ ނިންމުން ނިންމެވީ، އެ އިމާރާތަކީ ޒުވާނުން ބާރުވެރިކުރުވައި ހުނަރުވެރިކުރުވައި މުޖުތަމައުގެ އެކި ފަރާތްތަކާއެކު އިޖުތިމާއީ ގުޅުން ބަދަހިކުރުމަށް ޒުވާނުންގެ މަރުކަޒެއްގެ ގޮތުގައި ތަރައްގީ ކުރެއްވުމަށް އިއްޔެ ބޭއްވި ވަޒީރުންގެ މަޖިލީހުގައި އިންފްރާސްޓްރަކްޗާ މިނިސްޓްރީން ހުށަހެޅުއްވި ކަރުދާހަށް މަޝްވަރާ ކުރެއްވުމަށް ފަހު އެވެ.
މުލިއާގޭ ވެހިކަލް ގަރާޖު ހުންނަ ސަރަހައްދަކީ ގިނަ ސްކޫލްތަކެއް ހުންނަ ކާރުބާރު ބޮޑު ސަރަހައްދަކަށްވުމުން އެ ސަރަހައްދު ބޭނުންކުރާ ފަރާތްތަކަށް ދަތި ނުވާނެ ފަދަ ރަނގަޅު ޓްރެފިކް މެނެޖްމަންޓް ޕްލޭނަކާ އެކު، ޒުވާނުންގެ ތާޑް ސްޕޭސް މަސައްކަތް ކުރިއަށް ގެންދަން އެމަނިކުފާނު ނިންމަވާފައިވާ ކަމަށް ރައީސް އޮފީހުން ބުންޏެވެ.
- ބޫޓް ކޭމްޕްތައް
- ސްކިލް އެކްސްޗޭންޖް ޕްރޮގްރާމް
- ވާޗުއަލް ރިއަލިޓީ ޓްރެއިނިން
- ކޮމިއުނިޓީ އާޓް ވޯލް
- އިންޓްރެކްޓިވް ކޮމިއުނިޓީ ހަބް
- ކަލިނަރީ އިވެންޓްތައް
- އެކި ކަހަލަ މަސައްކަތު ބައްދަލުވުންތައް
ޒުވާނުންގެ ތާޑް ސްޕޭސް ޑިޒައިންކުރުމަށް ހުށަހަޅާފައިވަނީ ޒުވާނުން ކަންކަން އުނގެނުމަށާއި އެކި ކަހަލަ ހުނަރުތައް ދަސްކޮށްދިނުމަށާއި އެކަކު އަނެކަކާ ބައްދަލުކޮށް ގުޅުން ބަދަހިކުރުމަށް މަގުފަހި ކުރެވޭނެ ގޮތަށް ތިމާވެއްޓާ ރައްޓެހި ތަނެއްގެ ގޮތުގައި ކަމަށް ރައީސް އޮފީހުން ބުންޏެވެ.
މި ކޮންސެޕްޓުގައި ރާއްޖެއަށް ހާއްސަ ކާބޯތަކެތި (ލޯކަލް ކުއިޒިން) ވިއްކުމަށާއި ރާއްޖޭގެ ކުދި އަދި މެދު ފަންތީގެ ކާބޯތަކެތި ވިއްކާ ފަރާތްތަކުގެ އުފެއްދުންތައް އިޝްތިހާރުކޮށް ވިއްކުމާއި ސިއްހަތަށް ފައިދާ ހުރި ކެއުންތައް ޕްރޮމޯޓްކުރާ ކެފެޓޭރިއާއެއް ހިމެނުމަށް ވެސް ހުށަހަޅާފައިވާ ކަމަށް ރައީސް އޮފީހުން ބުންޏެވެ.