06 ނޮވެމްބަރ 2024 - 12:52
ކުރީގެ މަޝްހޫރު ވިޔަފާރިވެރިޔާ މުހައްމަދު ޔޫސުފް (ކުވާ މޮހޮދޭ) މިއަދު ނިޔާވެއްޖެ އެވެ.
މޮހޮދޭއަކީ ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާ އާއި ކުރީގެ ކޮމިޝަނާ ޖެނެރަލް އޮފް ކަސްޓަމްސް މާނިއު ޔޫސުފް އަދި ކުރީގެ އިމިގްރޭޝަން ކޮންޓްރޯލަރު ޑރ. އިބްރާހިމް ޝާފިއުގެ ބައްޕަ ވެސް މެ އެވެ.
މޮހޮދޭގެ އާއިލާ އިން ބުނީ އުމުރުން 75 އަހަރުގައި އޭނާ ނިޔާވީ އައިޖީއެމްއެޗްގެ އައިސީޔޫގައި ފަރުވާ ހޯއްދަވަމުން ގެންދަވަނިކޮށް ކަމަށެވެ. މޫނު ދެއްކުމާއި ކަށުނަމާދު އޮންނާނީ އިޝާ ނަމާދަށްފަހު އިސްލާމީ މަރުކަޒުގަ އެވެ.
ފުޅާދާއިރާއެއްގައި ޝިޕިންގެ ވިޔަފާރި ކުރެއްވި މޮހޮދޭއަކީ ރާއްޖޭގައި 70 ގެ އަހަރުތަކުގައި އެންމެ މުއްސަނދިންގެ ތެރޭގައި ހިމެނިވަޑައިގެންނެވި ބޭފުޅެކެވެ.
އަށްޑިހައިގެ އަހަރުތަކުގައި ސިޔާސީ ބައެއް މައްސަލަތަކުގައި އޭނާ ޖަލުގައި ވެސް ދުވަސްތަކެއް ހޭދަކުރެއްވި އެވެ.
މޮހޮދޭ ވަނީ ކޮލެރާ ފެތުރުނު ދުވަސްވަރު ރާއްޖެ އިން ބޭރުން އަމިއްލަ ހަރަދުގައި ޑޮކްޓަރުންނާއި ބޭސް ގެނެސް ދިވެހިންނަށް ފަރުވާ ކުރެވޭނެ ގޮތް ހަމަޖައްސަވައި ދެއްވައިފަ އެވެ.
އާއިލާއަށް ތައުޒިޔާ ފޮނުއްވައި، ރައީސް ޑރ. މުހައްމަދު މުއިއްޒު ސޯޝަލް މީޑިއާގައި ކުރެއްވި ޕޯސްޓުގައި ވިދާޅުވީ މޮހޮދޭއަކީ ވިޔަފާރީގެ ދާއިރާއިން ބޮޑެތި ހިދުމަތްތަކެއް ކޮށްދެއްވައި އާއްމުންނާއި ޖަމާއަތްތަކަށް ދަރުމަވެރި އެތައް އެހީތަކެއް ފޯރުކޮށްދެއްވާފައިވާ އިހުސާންތެރިއެއް ކަމަށެވެ.
އެއީ ގިނަބަޔަކު ދަންނަ ރަހުމަތްތެރި ސާދާ މިޒާޖެއްގެ ވެރިއެއް އަދި ހިދުމަތްތެރި ދަރިންތަކެއްގެ ބައްޕައެއް ކަމަށް ރައީސް ވިދާޅުވި އެވެ.