29 އޮކްޓޯބަރ 2024 - 23:33
އިޒްރޭލުން ފަލަސްތީނުގެ ޣައްޒާގައި ރޭ މީހުން ނިދާފައި ތިއްބާ އިމާރާތަކަށް ދިން ހަމަލާގައި މަރުވި މީހުންގެ އަދަދު 90 އިން މައްޗަށް އަރައިފި އެވެ.
ޣައްޒާގެ މަދަނީ ދިފާއީ އިދާރާއިން ބުނި ގޮތުގައި، މީހުން ދިރިއުޅޭ އިމާރާތަކަށް ދިން ހަމަލާއަށް ފަހު އެތަނުގެ ގާތަކުގެ ތެރެއިން މިހާތަނަށް ވަނީ 93 މީހެއްގެ ހަށިގަނޑު ފެނިފަ އެވެ.
ޝަހީދުވި މީހުންގެ ތެރޭގައި އަންހެނުންނާއި ކުޑަކުދިން ވަރަށް ގިނަ އެވެ.
މަދަނީ ދިފާއުގެ ކަންކަން ބަލަހައްޓާ އިދާރާއިން ބުނީ އަދިވެސް ސާޅީހަކަށް މީހުން ނުފެންނަ ކަމަށެވެ.
އެ ތަނުގެ ތަރުޖަމާނު މަހްމޫދު ބަސަލް ވިދާޅުވީ ފަސް ބުރީގެ ގެ އެއްކޮށް ހަލާކުވެފައިވާ ވާއިރު އެ ގެއިން ޒަހަމްވި މީހުންނަށް ފަރުވާ ދެވޭނެ ސިއްހީ ވަސީލަތްތައް އެ ސަރަހައްދުގައި ނެތް ކަމަށެވެ.
"ބެއިތު ލަހިޔާގައި ހުންނަ އަބޫ ނަސްރު އާއިލާގެ ގޭގައި ހިންގި މި ގަތުލްއާންމުގައި ޝަހީދުވި މީހުންގެ އަދަދު 93 އަށް މިހާރު ވަނީ އަރާފައި. އަދިވެސް ގާތްގަނޑަކަށް ސާޅީހެއްހާ މީހުން ގާތަކުގެ ދަށުގައި ވެއްޖެ ކަމަށް ބެލެވޭ،" އޭނާ އޭއެފްޕީއަށް ވިދާޅުވި އެވެ.
އޭނާ ވިދާޅުވީ ހަމަލާގައި ބިމާ ހަމަކޮށްލި އިމާރާތުގައި އެތައް އާއިލާއެއް ރަޖިސްޓްރީކޮށްފައި އޮންނަ ކަމަށާއި އެކަމަކު ހަމަލާއަށް ފަހު އެތައް އާއިލާއެއް ރަސްމީ ރަޖިސްޓްރީން އެއްކޮށް އުނިކުރަން ޖެހިއްޖެ ކަމަށެވެ.
އިޒްރޭލުގެ އަސްކަރިއްޔާއިން ބުނީ ބައިތު ލަހިއާ ސަރަހައްދުގައި ދިން ހަމަލާއެއްގައި "އާންމުންނަށް ގެއްލުންވި" ކަމުގެ ރިޕޯޓް ލިބިފައިވާ ކަމަށާއި އެކަމާ ގުޅޭ ގޮތުން ހޯދަންޖެހޭ މައުލޫމާތު އެއްކުރަމުން އަންނަ ކަމަށެވެ.
މަންޒަރު ދުށް މީހަކު އޭއެފްޕީ އަށް ބުނި ގޮތުގައި ޝަހީދުވި އެންމެން ކަހަލަ ގޮތަކަށް އެއީ އަންހެނުންނާއި ކުޑަކުދިންނެވެ. ސަލާމަތްވި މީހުން ވަނީ ޒަހަމްވެފައި ކަމަށާއި އެ މީހުންނަށް ފަރުވާ ދޭން އެހެން މީހުން މަސައްކަތްކުރި ނަމަވެސް އެ ސަރަހައްދުގައި ސިއްހީ ހިދުމަތެއް ލިބޭނެ ގޮތެއް ކަމަށް އޭނާ ބުންޏެވެ.