24 އޮކްޓޯބަރ 2024 - 13:47
ހޭންޑްބޯލް މޯލްޑިވްސްގެ ރައީސް އަހްމަދު މުޖުތަބާ (މުޖޭ) އާއި މަގާމުން ދުރުކޮށްފައި ހުރި ޖެނަރަލް ސެކްރެޓަރީ އަބްދުﷲ އަންވަރުގެ މައްސަލަ އެސީސީ އަށް ހުށަހަޅައިފި އެވެ.
ފައިސާ އަށް ހިޔާނާތްތެރިވިކަމުގެ ތުހުމަތުގައި ޖެނަރަލް ސެކްރެޓަރީގެ މަގާމުން އަނަވަރު ދުރުކުރީ މި މަހު އެވެ. އޭނާގެ މައްސަލަ އެ އެސޯސިއޭޝަންގެ ޑިސިޕްލިނަރީ ކޮމިޓީން ބަލަމުންދާކަމަށް ހޭންޑްބޯލް މޯލްޑިވްސްގެ އޮފިޝަލަކު ބުންޏެވެ.
ހޭންޑްބޯޅައިގައި ހަރަކާތްތެރިވާ މީހަކު އަމިއްލަ ގޮތުން އޭސީސީއަށް ހުށަހެޅި މައްސަލައިގެ ތަފުސީލު އޭނާ ވަނީ "މިހާރު" އާ ހިއްސާކޮށްފަ އެވެ.
އޭސީސީއަށް އޭނާ ހުށަހެޅި މައްސަލައިގައި އަންވަރުގެ މައްޗަށް ކޮށްފައިވަނީ މުސާރައިގެ އިތުރުން 500،000 އާ ގާތް ކުރާ އަދަދަކަށް އެސޯސިއޭޝަންގެ ފައިސާ ނަހަމަގޮތުގައި ބޭނުންކޮށްފައިވާ ކަމުގެ ތުހުމަތެވެ. އަދި އޭނާ އެކަން ކޮށްފައި ވަނީ އެސޯސިއޭޝަންގެ އެހެން ވެރިޔެއްގެ ސޮއި ފޯޖުކޮށްގެން ކަމަށް އޭނާގެ މައްޗަށް ތުހުމަތުކޮށް އެސީސީ އަށް ހުށަހެޅި މައްސަލައިގައިވެ އެވެ.
އޭނާ އަށް ކުރެވޭ ތުހުމަތުތަކާ ގުޅިގެން، "މިހާރު" އިން އޭނާ އަށް ގުޅުމުން ޖަވާބެއް ނުދެއްވަ އެވެ.
މުޖޭގެ މައްޗަށް ތުހުމަތު ކުރަނީ، އެ އެސޯސިއޭޝަންގެ ރައީސަށް ދޭ އިނާޔަތް އެޑްވާންސްކޮށް ނެގި މައްސަލަ އެވެ.
އެ ތުހުމަތުތަކާ ގުޅިގެން މީގެ ކުރިން "މިހާރު" އިން މުޖޭ އަށް ގުޅުމުން ވިދާޅުވީ އޭނާގެ މައްޗަށް ކުރާ ތުހުމަތުތަކަކީ "ދޮގެއް" ކަމަށެވެ.
އެކަމަކު އޭސީސީއަށް ހުށަހެޅި މައްސަލައިގައި އޭނާގެ މައްޗަށް ތުހުމަތުކޮށްފައި ވަނީ އޭނާ އަށް ކޮންމެ މަހަކު ދޭ 4،500.ރ ގެ އިނާޔަތް އެއްފަހަރާ 11 މަހަށްވާ އަދަދު އެޑްވާންސްކޮށް ނަގާފައިވާ ކަމަށެވެ. އެއް ފަހަރާ 49،500.ރ ނެގި ކަމަށް އޭނާގެ މައްޗަށް ތުހުމަތުކޮށް އޭސީސީ އަށް ހުށަހެޅި މައްސަލައިގައި ބުނެފައިވެ އެވެ.
ހޭންޑްބޯޅައާ ގުޅޭ ފައިސާގެ މައްސަލަތަކެއް މި ހަފުތާގައި ފެންމަތިވި އިރު، ސަރުކާރުން މިދިޔަ ހަފުތާގައި ބޭއްވި ސްޕޯޓްސް އެވޯޑްގައި މިދިޔަ އަހަރުގެ އެންމެ ރަނގަޅު އެސޯސިއޭޝަންގެ އެވޯޑް ހޭންޑްބޯލް މޯލްޑިވްސްއަށް ވަނީ ދީފަ އެވެ.