23 އޮކްޓޯބަރ 2024 - 08:32
އެތުލެޓިކޯ މެޑްރިޑާއި ވިޔަރެއާލް އަދި މެންޗެސްޓާ ޔުނައިޓެޑް ފަދަ ކްލަބްތަކަށް ކުޅުނު އުރުގުއޭގެ ފޯވާޑް، ފުޓްބޯޅަ ކުޅުން ހުއްޓާލިތާ ފަސް އަހަރު ފަހުން، އުމުރުން 45 އަހަރުގައި ޕްރޮފެޝަނަލް ޓެނިސް ކުޅެން ފަށަން ނިންމައިފި އެވެ.
ފޯލާން ފުޓްބޯޅަ ކުޅުން ހުއްޓާލީ 2018 ވަނަ އަހަރު، ހޮންގް ކޮންގް ލީގުގެ ކިޗީ އަށް ކުޅެފަ އެވެ. އޭގެ ކުރިން 2015 ގައި ގައުމީ ޓީމަށް ކުޅުން ހުއްޓާލައިފަ އެވެ. އޭނާ ވަނީ ގައުމީ ޓީމަށް 112 މެޗު ކުޅެ 36 ގޯލު ޖަހައިދީފަ އެވެ. ގައުމީ ޓީމަށް ކުޅުން ހުއްޓާލުމަށް ފަހު ފޯލާން ވަނީ ޖެހިގެން އައި އަހަރު، އިންޑިއަން ސުޕަ ލީގުގެ މުމްބާއީ ސިޓީ އަށް ވެސް ކުޅެފަ އެވެ.
ފުޓްބޯޅަ ދޫކޮށްލައި ފޯލާން އަންނަނީ 2023 އިން ފެށިގެން އައިޓީއެފް މާސްޓާސް ޕްރޮފެޝަނަލް ޓެނިސް ޓުއާ މުބާރާތްތަކުގައި ކުޅެމުންނެވެ. އަދި އޭނާ އަކީ 35 އަހަރާއި 40 އަހަރާއި 45 އަހަރުން މަތީގެ އުމުރުފުރާގެ ކުޅުންތެރިންގެ ތެރޭގައި ރޭންކް ކުރެވިފައިވާ ކުޅުންތެރިއެކެވެ.
ވައަތުން ކުޅޭ ފޯލާން އަންނަނީ އޭނާގެ ފުރަތަމަ އޭޓީޕީ މުބާރާތަށް ތައްޔާރުވަމުންނެވެ. އޭނާ އަށް ވަނީ އަންނަ މަހު އުރުގުއޭގެ މޮންޓެވީޑީއޯގައި ބާއްވާ އުރުގުއޭ އޯޕަންގެ ޑަބަލްސްގައި ވާދަކުރަން ވައިލްޑްކާޑް ފުރުސަތެއް ލިބިފަ އެވެ. އޭނާގެ ޑަބަލްސް ޕާޓްނަރަކަށް ވާނީ އާޖެންޓީނާގެ ފެޑެރިކޯ ކޮރިއާ އެވެ.
އާޖެންޓީނާގެ ބޮކާ ޖޫނިއާސް އިން ލިބުނު ހުށަހެޅުންތައް ދޫކޮށްލައި އެގައުމުގެ އިންޑިޕެންޑިއެންޓޭއާ އެކު ސީނިއާ ކެރިއަރު ފެށި ފޯލާން ޔޫރަޕަން ގެންދިޔައީ މެންޗެސްޓާ ޔުނައިޓެޑްގެ ސާ އެލެކްސް ފާގަސަން އެވެ. އެއަށް ފަހު ވިޔަރެއާލާއި އެތުލެޓިކޯއަށް ވެސް ސަރަހައްދީ މުބާރާތްތަކުން ރަން މެޑަލް ހޯދައިދިން ފޯލާން ވަނީ ގައުމީ ޓީމާއެކު ވެސް ކާމިޔާބު ހޯދައިފަ އެވެ.
އެގޮތުން ވޯލްޑް ކަޕް 2010 ގެ ތިންވަނަ ހޮވި މެޗުގައި ޖަރުމަން އަތުން 3-2 އިން އުރުގުއޭ ބަލިވި ނަމަވެސް، އޭނާ ވަނީ މުބާރާތުގައި އެންމެ ގިނަ ގޯލު ޖަހައި އެންމެ މޮޅު ކުޅުންތެރިޔާގެ އެވޯޑް ވެސް ހޯދައިފަ އެވެ. ޖަރުމަނާ ދެކޮޅަށް ކުޅުނު މެޗުގެ އެންމެ ފަހު ބޯޅަ ފޮނުވާލީ ވެސް ފޯލާން އެވެ. ނަމަވެސް ހިލޭޖެހުމުން ފޮނުވާލި ބޯޅަ ގޯލުގެ ދަނޑީގައި ޖެހިފައި ބޭރުވުމާއެކު މެޗު ނިމުނީ އެވެ.
އެއަށް ފަހު 2011 ވަނަ އަހަރު އުރުގުއޭއިން ކޮޕާ އެމެރިކާ ކާމިޔާބުކުރީ ފައިނަލްގައި ފޯލާން ޖެހި ދެ ގޯލާވެސް އެކު އެވެ. ގައުމީ ޓީމަށް ރަން މެޑަލްއެއް ހޯދައިދީ އޭނާ ޔޫރަޕް ދޫކޮށްލީ އިޓަލީގެ އިންޓަ މިލާނަށް އެއް އަހަރު ކުޅެފަ އެވެ.
ފޯލާން ވަނީ ބްރެޒިލް އާއި ޖަޕާން ލީގުގައި ކުޅުމަށް ފަހު އޭނާ ވަނީ އުރުގުއޭގައި، އޭނާ އެންމެ ފުރަތަމަ ގުޅުނު އެކަޑަމީ ނިސްބަތްވާ ޕެނަރޯލް އާއެކު ލީގު ކާމިޔާބު ކޮށްފަ އެވެ.