04 މާޗް 2017 - 14:46
ހުޅުމާލޭގައި މިދިޔަ ބުރާސްފަތިދުވަހުގެ ރޭ އަންހެނަކު ރޭޕް ކުރި މައްސަލައެއް ފުލުހުން ބަލަން ފަށައިފި އެވެ.
ފުލުހުންގެ މީޑިއާ އޮފިޝަލަކު ވިދާޅުވި ގޮތުގައި އުމުރުން 27 އަހަރުގެ އަންހެނަކާ މެދު ގަދަކަމުން ބަދުއަޚުލާގީ އަމަލު ހިންގި މައްސަލަ ހުށަހެޅީ ބުރާސްފަތިދުވަހުގެ ރޭ 10 ޖަހާކަންހާއިރު އެވެ.
މި މައްސަލައާ ގުޅިގެން އެއްވެސް މީހަކު މިހާތަނަށް ހައްޔަރު ނުކުރާ ކަމަށް އޮފިޝަލް ވިދާޅުވި އެވެ.
އެނގިފައިވާ ގޮތުގައި އެ އަންހެން މީހާ ރޭޕްކުރީ ހުޅުމާލޭގެ ސިނާއީ ސަރަހައްދުގަ އެވެ. އޭނާ ބަރަހަނާ ހާލުގައި ހުއްޓައި ފެނުނީ އެ ސަރަހައްދުން ދިޔަ ބަޔަކަށް ކަމަށް ވެ އެވެ.
ހުޅުމާލޭގެ ސިނާއީ ސަރަހައްދަކީ މާ ބޮޑު އަލިކަމެއް ނޯންނަ ހިސާބުގަނޑެކެވެ. އެ ސަރަހައްދުގައި އާންމުކޮށް އުޅެނީ ބިދޭސީންނެވެ.
ހުޅުމާލޭގައި ދޭތެރެދޭތެރެއިން ގަދަކަމުން އަންހެނުންނާ ބަދު އަޚުލާގީ އަމަލުތައް ހިންގާ މައްސަލަތައް ފެންމަތިވެ، ބައެއް މީހުން ހައްޔަރުކޮށްފައިވެ އެވެ. މީހެއްގެ މައްޗަށް ރޭޕް ކުރުމުގެ ކުށެއް ސާބިތުވެއްޖެނަމަ، 15 އަހަރާއި 25 އަހަރާ ދެމެދުގެ މުއްދަތަކަށް ޖަލަށްލެވޭނެ އެވެ.