02 މާޗް 2017 - 16:15
ޕިއޮންޔަން (މާޗް 2) - އެމެރިކާ އާއި ސައުތު ކޮރެއާ އިން ފެށި އަސްކަރީ ތަމްރީނުތަކުގައި ނޯތު ކޮރެއާގެ ސަރަހައްދަށް ވަދެއްޖެ ނަމަ ރަހުމެއް ނެތް ވަރުގަދަ ރައްދެއް ދޭނެ ކަމަށް އެ ދެ ގައުމަށް ނޯތު ކޮރެއާ އިން އިންޒާރު ދީފި އެވެ.
އެމެރިކާ އާއި ސައުތު ކޮރެއާ އިން އިއްޔެ ވަނީ އަހަރަކު އެއްފަހަރު ބާއްވަމުން އަންނަ އަސްކަރީ ތަމްރީނުތައް ފަށައިފަ އެވެ. އެ ދެ ގައުމުން އަސްކަރީ ތަމްރީނުތައް ބާއްވާ ކޮންމެ ފަހަރަކު ނޯތު ކޮރެއާ އިން އިންޒާރު ދެ އެވެ. އެ ގައުމުން ބުނަމުން ދަނީ އަސްކަރީ ތަމްރީނުތަކަކީ ނޯތު ކޮރެއާ އަށް އަރައިގަތުމަށް ބާއްވާ ރިހާސަލެއް ކަމަށެވެ.
"އެމެރިކާ އާއި ސައުތު ކޮރެއާ އިން ފެށި ތަމްރީނުތަކުގައި އެންމެ އުންޑައެއް ވެސް ނޯތު ކޮރެއާ ސަރަހައްދަށް ވެއްޓިއްޖެ ނަމަ ރައްދުގައި ދޭ ހަމަލާ މާ ވަރުގަދަވާނެ،" ކޮރެއަން ޕީޕަލްސް އާމީގެ ތަރުޖަމާނަކު ވިދާޅުވި އެވެ.
ސައުތު ކޮރެއާ އިން ބުނެފައި ވަނީ ތަމްރީނުތަކަށް އުނދަގޫ ކުރުމުގެ ގޮތުން ނޯތު ކޮރެއާ އިން އެއްވެސް ކަމެއް ކޮށްފި ނަމަ ރައްދު ދޭނެ ކަމަށެވެ.
އަންނަ އެޕްރީލް މަހާ ހަމައަށް ކުރިއަށް ގެންދާ ތަމްރީނުތަކުގައި އެމެރިކާގެ 3،600 ސިފައިން ބައިވެރިވެ އެވެ. މި ތަމްރީނުތަކުގައި ބައިވެރިވުމަށް މަތިންދާ ބޯޓު އުފުލާ އެމެރިކާގެ މަނަވަރު ކާލް ވިންސަން ފޮނުވުމަށް ވަނީ ހަމަޖެހިފަ އެވެ. ސައުތު ކޮރެއާ އިން ބުނީ ބީ-1ބީ އަދި ބީ-52 ގެ ބޮން އަޅާ ބޯޓުތައް ވެސް ތަމްރީނުތަކުގައި ބައިވެރިވާނެ ކަމަށެވެ.