02 މާޗް 2017 - 06:06
އާމިރު ޚާންގެ "ދަންގަލް" ބަތަލާ ސަންޔާ މަލްހޯތުރާ އާއި ފާތިމާ ސަނާ ޝޭޚަށް އާމިރުގެ އިންޓާނުންގެ ގޮތުގައި މަސައްކަތް ކުރުމުގެ ފުރުސަތު ލިބިއްޖެ އެވެ.
މިޑް-ޑޭ ނޫހަށް ދިން އިންޓަވިއުއެއްގައި ސާންޔާ ވަނީ އޭނާ އާއި ފާތިމާ އަށް ހުށަހެޅި އިންޓާންޝިޕް ފުރުސަތު ގަބޫލުކޮށްފައިވާ ކަމަށް ބުނެފަ އެވެ.
ސާންޔާ ބުނި ގޮތުގައި ޖެނުއަރީ 2016 ގައި އެމީހުން "ދަންގަލް"ގެ ޝޫޓިން ނިންމާލުމުން ދެން ކުރާނެ އިތުރު މަސައްކަތެއް ނެތިފައި ތިއްބެވެ. އެހެންވެ އެމީހުން ގަސްތުކުރީ އިންޑިއާ ބަލައިލަން ދަތުރުކޮށްލާށެވެ. އާމިރު އެމީހުންނަށް ގުޅާފައި އޭނާގެ އިންޓާންގެ ގޮތުގައި މަސައްކަތްކުރަން ބޭނުންތޯ އެހީ އެ ދުވަސްވަރު އެވެ.
"އެންމެ ފުރަތަމަ އަހަރެމެން ތިބީ މިވަނީ ކީއްކަން ވެސް ނޭނގިފައި. ދެން އަވަހަށް އާއެކޭ ބުނީ،" ސާންޔާ ބުންޏެވެ.
މިހާރު ސާންޔާ އާއި ފާތިމާ އަކީ އާމިރު ޚާންގެ ޕާނީ ފައުންޑޭޝަންގެ ބައިވެރިންނެވެ. މަހަރާޝްތުރާ ހަނަފަސްކަމުން ސަލާމަތްކުރުމަށް ކުރަމުންދާ މަސައްކަތުގައި މިހާރު މި ދެ އެކްޓަރުން ބައިވެރިވެ އެވެ.
މީގެ އިތުރުން އާމިރުގެ "ސީކްރެޓް ސުޕަސްޓާ"ގެ ޕޯސްޓް ޕްރޮޑަކްޝަން މަސައްކަތާއި "ތަގްސް އޮފް ހިންދުސްތާން" ފެށުމުގެ ތައްޔާރީތަކުގައި ވެސް ފާތިމާ އާއި ސާންޔާ ދަނީ ބައިވެރިވަމުންނެވެ.