01 ސެޕްޓެމްބަރ 2024 - 11:47
ސަތާރަ އަހަރުން ދަށުގެ ސާފް ޗެމްޕިއަންޝިޕުގައި އިންޑިއާ އާއި، ބަންގްލަދޭޝްއާ އެކު ގްރޫޕް އޭ ގައި ރާއްޖެ ލައްވާލައިފި އެވެ.
ބޫޓާނުގައި މި މަހު 20-30 އަށް ބާއްވާ މި މުބާރާތުގެ ގްރޫޕް ބީ ގައި ހިމެނެނީ ބޫޓާނުގެ އިތުރުން، ނޭޕާލާއި، ޕާކިސްތާން، އަދި ސްރީ ލަންކާ އެވެ.
ރާއްޖޭގެ ފުރަތަމަ މެޗުގައި 22 ގައި ބައްދަލުކުރާނީ ބަންގްލަދޭޝްއާ އެވެ. އިންޑިއާއާ ދެކޮޅަށް ކުޅޭ މެޗު އޮންނާނީ 24 ގަ އެވެ.
ސެމީ ފައިނަލަށް ހޮވޭނީ ކޮންމެ ގްރޫޕަކުން އެންމެ ގިނަ ޕޮއިންޓް ހޯދާ ދެ ޓީމެވެ.
މުބާރާތަށް ރާއްޖޭގެ ޓީމުން ވަނީ މުހައްމަދު އާދަމްގެ ކޯޗުކަމުގައި މީގެ މަހެއްހާ ދުވަސް ކުރިން ޕްރެކްޓިސް ފަށައިފަ އެވެ. މުހައްމަދަކީ ކުރިން ވިކްޓްރީ އާއި ޔުނައިޓެޑް ވިކްޓްރީ އަށް ފުރަތަމަ ޑިވިޝަނުގައި ކޯޗުކޮށްދީފައިވާ ތަޖުރިބާކާރެކެވެ. ކުރީގެ ކުޅުންތެރިޔާ ވަނީ ސްރީ ލަންކާގެ ފުޓްބޯޅައިގައި ވެސް މަސައްކަތްކޮށްފަ އެވެ.
ރާއްޖޭގެ ޓީމުގައި ހުނަރުވެރި ގިނަ ކުޅުންތެރިން ހިމެނެ އެވެ. އޭގެ ތެރޭގައި މިދިޔަ ސީޒަނުގައި ވެލެންސިއާ އަށް ކުޅުނު މުހައްމަދު އިލާން އިމްރާނާއި، އަޔާން އާމިރު ހިމެނެ އެވެ. މީގެ ތެރެއިން އިލާން ވަނީ މާޒިޔާ އަށް އިއްޔެ ސޮއިކޮށްފަ އެވެ.
މީގެ އިތުރުން ސްޕެއިނުގައި އެކަޑަމީ ލެވެލްގައި ކުޅެމުން އަންނަ އީތަން އިބްރާހިމް ޒަކީ ވެސް ޓީމާ ގުޅޭނެ ކަމަށް މައުލޫމާތު ލިބެ އެވެ.
އެފްއޭއެމްގެ ހިންގުން ބޮއްސުންލައި، ރާއްޖޭގެ އެއް ވަނަ ޑިވިޝަނުގެ ފުޓްބޯޅައިގެ ހަރަކާތްތައް ހުއްޓިފައިވީ ނަމަވެސް، އެކަޑަމީތައް އަންނަނީ ހިންގަމުންނެވެ. ސަތާރަ އަހަރުން ދަށުގެ ޓީމުގެ ގިނަ ކުޅުންތެރިންނަކީ އެކަޑަމީތަކުގެ އުފެއްދުންތަކެވެ. މި ޓީމަކީ ފަހަކަށް އައިސް ރާއްޖޭން ހޮވާލެވޭނެ އެންމެ ހުނަރުވެރި ޒުވާން ޓީމު ކަމަށް ތަޖުރިބާކާރުން ބުނެ އެވެ.