21 ޖުލައި 2024 - 19:49
އިސްލާމިކް މިނިސްޓްރީން މިހާތަނަށް ކޮށްފައިވާ މަސައްކަތްތައް އެއް ތަނަކުން ފެންނަ "މީޑިއާ މައުރަޒު" މިއަދު ފަށައިފި އެވެ.
އިސްލާމީ މަރުކަޒުގައި ކުރިއަށް ގެންދާ އެ މައުރަޒު އިފުތިތާހު ކޮށްދެއްވީ ނައިބު ރައީސް ހުސައިން މުހައްމަދު ލަތީފެވެ.
އެ މައުރަޒަކީ ރައީސް ޑރ. މުހައްމަދު މުއިއްޒުގެ ރިޔާސީ މެނިފެސްޓޯގައިވާ ކަންތައްތަކުގެ ތެރެއިން އިސްލާމީ ދާއިރާއިން މިދިޔަ 8 މަސް ދުވަހުގެ ތެރޭގައި ހާސިލުވި ކަންކަން މީޑިއާއާ ހިއްސާކުރުމަށް ބާއްވާ މައުރަޒެކެވެ.
އިސްލާމިކް މިނިސްޓްރީން ބުނީ، އެ މަރުރަޒުގައި އެ މިނިސްޓްރީގެ އެކި ސެކްޝަންތަކާއި އިދާރާތަކުގެ ސްޓޯލްތައް ހުންނާނެ ކަމަށެވެ. އަދި އެތަންތަނުން އެ ދާއިރާއަކުން ކުރިއަށް ގެންދާ މައުލޫމާތުތައް ހިއްސާކުރާނެ ކަމަށް މިނިސްޓްރީން ބުންޏެވެ.
- ދިވެހިރާއްޖޭގެ ޒަކާތު ހައުސް.
- އިސްލާމީ ފަތުވާދޭ އެންމެ މަތީ މަޖިލިސް.
- މޮސްކް މެނޭޖްމަންޓް ސެކްޝަން.
- ޕަބްލިކޭޝަން ޔުނިޓު އަދި ހަލާލް ސެޓްފިކޭޝަން ޔުނިޓް.
- ހައްޖާއި އުމްރާއާ ބެހޭ ޔުނިޓް.
- އިސްލާމިކް ދައުވާ.
- ކީރިތި ގުރުއާނާ ބެހޭ މަރުކަޒު.
- މިނިސްޓަރު ބިއުރޯ.
- އައުގާފް އެންޑް އިންފްރާސްޓްރަކްޗާ.
މިނިސްޓްރީގެ މައުރަޒުގައި މި ދާއިރާތަކުން މިދިޔަ 8 މަސް ދުވަހުގެ ތެރޭގައި ހާސިލުވި ކަންކަން މީޑިއާތަކާ ހިއްސާކުރާނެ އެވެ.
މި މައުރަޒު ކުރިއަށް ގެންދާނީ މިރޭގެ އިތުރުން މާދަމާ ހެނދުނު 9:00 އިން ހަވީރު 6:00 އާ ހަމައަށެވެ.