10 ޖުލައި 2024 - 06:42
އާދިއްތަ ދުވަހާ ގުޅޭ
"އަޅެ ނާހާތަ؟" ނަޖްވާން އެހިއެވެ.
ދިފްލާ ވިސްނައިލިއެވެ. އެއީ ދިފްލާއަށް އެކަނި އެނގޭ ސިއްރެކެވެ. ހަނދާންވުމުން ހިތުގެ ރިހުން ބޮޑުވާ ހަގީގަތެކެވެ. ލޯބިވާ ވާހަކައެއް ރާއިދު ނުބުނެއެވެ. ކައިވެނީގެ ހުވަފެނެއް ވެސް ނުދައްކައެވެ. ފޮތެއްހެން ރާއިދުގެ ހިތް ހުޅުވައިލާ އިރު، އެ ފޮތުގައި ދިފްލާގެ ނަން ލިޔެވިފައިވާ ތަނެއް ދިފްލާއަކަށް ނުފެނެއެވެ. އެ އުޅެނީ ލޯބިވާ ވާހަކަ ބުނާށޭ ހީވާ ހިސާބަށް ވާހަކަ ގެންގޮސްފައި ވެސް އެ ލަފުޒު ރާއިދުގެ ދުލަކަށް ނުގެނެއެވެ. ހިތާމައަކީ، އެ ތެދު ހާމަކުރާނެހާ ހިތްވަރު ދިފްލާއަށް ނުލިބުނުކަމެވެ.
"އުހުނ!" އެއްވެސް ކަރުނައަކަށް މިނިވަން ނުވެވޭ ވަރަށް ހިތާމައިގެ ދޮރު ލައްޕައި ބަންދުކުރުމަށް ފަހު ދިފްލާ ބުންޏެވެ. "ދުވަހަކު ވެސް ނާހާ!"
އެ ޖަވާބު ނަޖްވާނަށް ގަބޫލުކުރެވުނުހެނެއް، އޭނަގެ މޫނުމައްޗަކުން ނުފެނުނެވެ. އެ ކަން ވިސްނުމާއެކު ދިފްލާ ވަގުތުން ސަބަބެއް ހަދައިލިއެވެ.
"ރާއިދަށް އެނގޭނެ އަހައިފިއްޔާ ދެން އަހަރެން ރާއިދަކާ ވާހަކައެއް ނުދައްކާނެކަން،" ދިފްލާ ބުންޏެވެ. "ފްރެންޑްޝިޕް ވެސް ގެއްލޭނެއްނު! އެކާވީސް އަހަރުގެ މީހެއް ދެކެ އަހަރެން ކިހިނެއް ލޯބިވާނީ؟ އިންޕޮސިބަލް! ބިރުން ވެސް އޭނައަކަށް ނުކެރޭނެ އިންނަން އަހާކަށް."
މާ ގިނަ އިރު ކަރުނަ ނުހިފޭއްޓޭނެކަން ދިފްލާއަށް އެނގެއެވެ. އެހެނަސް، ނަޖްވާން އެ ވާހަކަ ހުއްޓާކަށް ނޫޅުނެވެ.
"އެއީ ތެދެކޭ!" ނަޖްވާން މަޑުމަޑުން ބުނެލިއެވެ. "ބިރުން ދޯ އޭނަ ނާހަނީ؟"
"ހަމަ ބިރުން އޭނަ ނާހަނީ،" އަމިއްލަ ހިތުގައި ކޮޅުފައިން ޖަހާފައި ދިފްލާ ބުންޏެވެ. "އެހެން ނޫނަސް، ރާއިދަކީ އަހަރެން ބޭނުންވާ ޓައިޕްގެ މީހެއް ވެސް ނޫން. އަހަރެން ހިތަށްއަރާ ކީއްވެބާއޭ ނަޖޫ މަންމައަށް އެ ތަންކޮޅު ނުވިސްނެނީ؟ އަހަރެން ކިތަންމެ ރަނގަޅު ކަމެއް ކުރިޔަސް ނަޖޫ މަންމައަށް އެ ކަން ނެގޭނީ ވަރަށް ނެގެޓިވްކޮށް. އަހަންނަށް ކަމެއް ކޮށްދެންޏާ، ނަޖޫއަށް އަހަރެން ހެލްޕްވާކަން އެކަކަށް ވެސް ނާންގާތި! މަންމަ ކައިރީގަ ވެސް ނުބުނާތި! ރާއިދު ކައިރީގަ ވެސް ނުބުނާތި! ޕްރޮމިސްކުރޭ!"
"ޕްރޮމިސް!" ނަޖްވާން އެއްބަސްވިއެވެ. "ދެން ކީކޭ ކިޔާފަ ރާއިދު މަންމައަށް އަހަރެން ގުޅަންވީ؟"
ނަޖްވާންގެ ހިތުގައި ދިފްލާއަށް އޮތް އިތުބާރު ބޮޑުވެ، ދިފްލާގެ ލަފައަށް ނަޖްވާން މަރުހަބާކިޔުމުން ފާއިޒާގެ ހިތް ފަތަހަކުރެވޭނެ އުކުޅުތައް ދިފްލާ ކިޔައިދޭން ފެށިއެވެ. ފާއިޒާޔާ ދެކޮޅަށް އެއްޗެއް ނުބުނުމާއި، ގޭގެ ވެރިޔަކީ ފާއިޒާހެން ހީކުރުވުމާއި، ކުށްކުރެވުނުކަމަށް އިއުތިރާފުވެ، އިރުއިރުކޮޅާ މާފަށްއެދޭނެ ގޮތެވެ. ފާއިޒާޔާ ފޯނުން ވާހަކަދައްކާ އިރު، އަލަށް ދަސްކުރި ގެވެހި މަސައްކަތްތަކުގެ ލިސްޓެއް ކައިރީގައި ބާއްވައިގެން، އެ މަސައްކަތްތަކަށް ނަޖްވާން ކިހައި އަހުލުވެރިވެއްޖެކަން ފާއިޒާއަށް އިހުސާސްކޮށްދޭނެ ގޮތެވެ. އެކިއެކި އެއްޗެހި ކައްކާނެ ގޮތާއި، އެއްޗެހި އަޅާނެ މިންވަރަށް ދާންދެން ނަޖްވާނަށް އެނގޭކަން ފާއިޒާއަށް ބުނެދޭނެ ގޮތެވެ. އެއްވެސް ފިކުރެއް ނެތި ހިތުންކިޔައިދޭހެން ކިޔައިދޭނެ ރާގާއި، އިބާރާތްކުރާނެ ގޮތެވެ. އެއްޗެއް ކައްކައިގެން ގެންގޮސް ފާއިޒާއަށް ދޭން ވެސް ދިފްލާ އެދުނެވެ. އެ ކަން ކުރަން ނަޖްވާނަށް ނުކެރުނީއެވެ. ފާއިޒާގެ ލޯބިހޯދަން އެކި ޒާތްޒާތުގެ މެސެޖުތައް ލިޔެފައި ނަޖްވާނަށް ފޮނުވިއެވެ. ދިވެހިން ލިޔެފައިހުންނަ އެކިއެކި މެސެޖުތައް ނެޓުން ހޯދައިގެން ދިފްލާއަށް ފޮނުވިއެވެ.
"އެއްފަހަރާ މާ ގިނަ ސާމާނު ނުފޮނުވާތި!" އެ ކަން ވެސް ދިފްލާ ހަނދާންކޮށްދިނެވެ.
ނަތީޖާ ކާމިޔާބުވެފައި ފޮންޏެވެ. ރޭގަނޑު ދިހައެއްޖަހަން އުޅެނިކޮށް ދިފްލާއަށް ރާއިދު ގުޅިއެވެ. ހައިރާންވެ އަންތަރީސްވެގެންނެވެ.
"ދެންމެ ޓަސްލާފަ މަންމަ ގުޅައިފި!" ރާއިދު ބުންޏެވެ.
"ކީއްވެ ތިހާ ސަޕްރައިޒްވެފަ ތިހެން ތި ބުނީ؟" ނުވެސް އެނގިފައި ދިފްލާ އެހިއެވެ. "މަންމަ ކުރިން ވެސް ގުޅައެއް ނޫންތަ؟ ބުނީމެއްނު ދުވާލަކު ދެތިން ފަހަރު ގުޅައޭ!
"ގުޅައޭ! ވޮއިސް މެސެޖު ވެސް ފޮނުވާނެ،" ޖަވާބުގައި ރާއިދު ބުންޏެވެ. "އެކަމަކު، އެއް ފަހަރު ވެސް ނަޖޫގެ ގޯސްވާހަކައެއް ނުދައްކާ ފޯނެއް ނުބާއްވާނެ. އެއީ ހަމަ މަސްޓެއް. ދެންމެ ގުޅާފަ ވިއްސަކަށް މިނެޓު ވާހަކަދައްކާފަ ބޭއްވި އިރު ވެސް ނަޖޫގެ އެއްވެސް ގޯސްވާހަކައެއް ނުދައްކާ! އަހަރެން އަހާލިން ތީ ހަމަ މަންމަހޭ؟ ބުނީ ކިހިނެއްހޯވީ؟ އަހަރެން ބުނިން ހަމަ ޔަގީންކޮށްލީޔޭ!"
"އަހަރެން ވެސް މިހިރީ ހަމަ ޝޮކުގަ،" ވަރަށް ހައިރާންވެފައި ދިފްލާ ބުންޏެވެ. "ކިހިނެއްބާވީ ދޯ؟"
ފޯނުން ދިފްލާ ވާހަކަދެއްކި އިރު، ލެޕްޓޮޕުން ނަޖްވާނާ ވެސް ޗެޓުކުރިއެވެ. އެކަމަކު، އެއްވެސް މީހަކަށް އަނެކަކާ ވާހަކަދައްކާކަމެއް ނާންގައެވެ. ނަޖްވާން ކައްކަމުންނާއި ގަސްއިންދަމުން ފާއިޒާއަށް ފޮނުވި ފޮޓޯތައް ދިފްލާއަށް ދެއްކިއެވެ. މޫސުމުގެ އޮޔާއި ވަޔަށް އަންނަ ބަދަލުތަކުގެ ހަގީގީ ސަބަބު ދިފްލާއަށް ވަރަށް ރަނގަޅަށް އެނގެއެވެ. އެނގޭކަމަށް ނެހެދީއެވެ.
"ނަޖޫ ކޮންމެވެސް ވަރަކަށް ޗޭންޖުވީބާ؟" ރާއިދު އެހިއެވެ. "މަންމައަށް ގުޅަނީބާ؟"
"ނުގުޅާނެ. ނުވެސް ކެރޭނެ ގުޅާކަށް،" ދިފްލާ ވަރަށް ސާދާ ގޮތަކަށް ބުނެލިއެވެ. "އަހަންނާ ވަރަށް ދިމާ ވެސް ނުވޭ! އެކަމަކު އަހަންނަށް ނަޖޫ އެނގޭ! އޭނަ ޗޭންޖެއް ނުވާނެ. ވެދާނެ މަންމަ މިހާރު ނަޖޫ މަތިން ހަނދާންނެތުނީކަމަށް ވެސް."
ހަނދާނުގެ ސަފުހާތައް ނުއަތަށް އުކެން ދޫކޮށްލައިގެން، ޓީވީ ނުވެސް ހުޅުވައި، ސޯފާގައި އޮށޯވެލައިގެން ދިފްލާ އޮތެވެ. ގަޑިން ދަންވަރު ބާރަޖަހަނީއެވެ. އެންމެން ނިދައިފިއެވެ. ދިފްލާ ހަނދާންވަނީ އެންމެ ފުރަތަމަ ރާއިދު ފެނުނު ދުވަހެވެ. ބަލައިލި ރެޔެވެ. ހިނިތުންވެލި ގޮތާއި، ގޮވައިލި ރާގެވެ. ރާއިދުގެ ސާދާކަމާއި، ހަރުދަނާކަން ދިފްލާގެ ހިތް ލުހެލައިގެން ގެންދިޔަ ފަހަރެވެ. އަބަދު ވެސް ދިފްލާއަށް އެނގެއެވެ. އެއީ ނުފޮޅި މިލާނެ މަލެކެވެ. ނާރާނެ ހަނދެކެވެ. ދިފްލާއާއި ރާއިދުގެ މެދުގައި ވަނީ، އުމުރުގެ ތަފާތު ތޭރިތަކެއް ހުރަސްވެފައިވާ ބިޔަ ދޮރެކެވެ. އެއިން ތޭރިއެއް ފޭކޮށްލަން ހިފައިލި ތަނާ ދިފްލާއަށް ފޯނެއް އައެވެ. ހިޔާލުގެ ސައިބޯނިބޮކި ފަޅައިގެންދިޔައެވެ.
"ކީކޭ؟" ފޯނުނަގައިފައި ދިފްލާ އެހިއެވެ.
"މިއަދު ދެތިން ފަހަރު ރާއިދު މަންމައަށް ގުޅިން. އަހަރެން ކައިރިއަށް ހަމަ ހިނިއަންނަނީ،" ލާނެތް ރާގެއްގައި ނަޖްވާން ބުންޏެވެ. "އަސްލު އަހަރެން ކިއީ ހަމަ ދިފްލާ ކިއި އެއްޗެހި. އަހަރެން ބުނީ މަންމަ ކިހިނެއްހޭ؟ ބައްޕަ ކިހިނެއްހޭ؟ ހަނދާންވާތީ ހަމަ ގުޅައިލިއްޔޭ! ބުނީމަ ބުނީ ނަސީބެއްނޫންހޯ އަހަރުމެން މަތިން ހަނދާންވެގެން ގުޅައިލާކަން ވެސް. ނަޖޫ މި ގޭގަ ނެތީމަ ނަޖޫ މަތިން ވެސް ވަރަށް ހަނދާންވެޔޯ! އަހަރުމެން ދެމީހުން އެކަންޏެއް ނޫންހޯ މި އުޅެނީ ގޭގަ. ނަޖޫ ނެތީމަ ވަރަށް ފަޅޭ ވެސް ބުނި. ރާއިދު މަންމަ އެހާ ރީތިކޮށް ވާހަކަދެއްކީމަ އަހަރެން ވަރަށް އުފާވި،" ނަޖްވާން ކުރިޔަށް ވުރެ އުފާވެފައި ބުންޏެވެ. "އަދި އެނގޭތަ؟ ވަރަށް ވަރަށް ބޮޑު ސަޕްރައިޒެއް ވެސް ދެންމެ ލިބުނު. ރާއިދު ގުޑްނައިޓް މެސެޖެއް ފޮނުވީ!"
ވާންވީ އުފާކަމެއް ނުވަތަ ދެރަކަމެއް ދިފްލާއަކަށް ނޭނގެއެވެ. ރާއިދަކީ ދިފްލާގެ ވެސް ލޯބިވެރިޔާއެވެ.
"ތިޔަވީނު!" ދިފްލާ ބުންޏެވެ. "ދެން އަހަރެން ބުނާ އެއްޗެއް ރާއިދު މަންމަ ކައިރީގަ ބުނަން ކެރޭނެ؟"
"ކީކޭ ބުނަންވީ؟" ނަޖްވާން އެހިއެވެ.
"ބުނޭ މަންމަ ބަލައި އައިއްސިއްޔާ މިހިރީ ތި ގެއަށް ދާގޮތަށޭ." ދިފްލާ ބުންޏެވެ.
އެހެން ބުނަން ނަޖްވާން ކިތަންމެހައި ވެސް ބޭނުމެވެ. އެކަމަކު، ކަންބޮޑުވާ ސަބަބެއް ވެސް އޮތެވެ.
"ރާއިދު އަހަރެން ގެއަށް ފޮނުވާލާފަހުއްޓާ..." ނަޖްވާން ބުނީ އެ ހިސާބަށެވެ.
"ނަޖޫގެ ބާރުގަދަވާނެ އެ ގޮތަށް ދިޔައިމަ،" ވަރަށް ޔަގީންކަމާ އެކުގައި ދިފްލާ ބުންޏެވެ. "މަންމަ އައިސް ނަޖޫ ގެންދިޔައިމަ ރާއިދަކަށް ދެން ނުވެސް ކެރޭނެ ނަޖޫ އަލުން ފޮނުވައިލާކަށް. ކާކު ބޮސްއަކީ؟ ރާއިދުގެ މަންމަ!"
އެ ކަން ނަޖްވާނަށް އެނގެއެވެ. އެހެނަސް، ފާއިޒާޔާ އެއްވަރަށް އެހެން މީހަކާ ދޭތެރޭގައި ވެސް ނަޖްވާން ވިސްނަންޖެހެއެވެ.
"އެކަމަކު އޭރުން އަހަރެންގެ މަންމަ ކިހާ ރުޅިއަންނާނެ؟" ނަޖްވާން ބުންޏެވެ.
"އިހަށް ތި ކަމާ ނުވިސްނަބަލަ!" ޗޮކެއްކަނޑައިފައި ދިފްލާ ބުންޏެވެ. "ވިސްނަބަލަ ނަޖޫ ލޯބިވާ މީހާ ނަޖޫއަށް ލިބޭތޯ! ނަޖޫގެ މަންމަ ފަހުން އޯކޭވާނެ. މަންމައަކަށް ނުކެރޭނެ އުމުރުދުވަހު ނަޖޫ ދެކެ ރުޅިއައިއްސަ އިންނާކަށް. އެކަމަކު ނަޖޫ ލޯބިވާ މީހާ ގެއްލުނީމަ ނަޖޫއަށް މާ ދެރައެއްނު."
ނަޖްވާން އެތައް އިރެއް ވާންދެން ވިސްނިއެވެ.
"އަހަރެން ދެކެ މަންމަ ހާދަ ރުޅިއަންނާނޭ!" އަނެއްކާ ވެސް ނަޖްވާން ބުންޏެވެ. "އަނެއްކާ ރާއިދު އަހަރެން އެ ގެއިން ބޭރަށްލީމަ ވެސް އަންނަންޖެހޭނީ މަންމަ ކައިރިއަކަށްނު! ދާނެ އެހެން ތަނެއް ނެތޭ!"
"ބޭރަށް ނުލެވޭ ވަރަށް ބޯވައެއްހެން އެ ގޭގަ ތަތްކޮށްލަބަލަ!" ވަރަށް ޖޯޝާ އެކުގައި ދިފްލާ ބުންޏެވެ. "ނަޖޫއަށް އެ ކަންތައް ކުރެވޭނެ. އެނގޭތަ! އަންހެނަކު ބޭނުންވެއްޖެއްޔާ ބޭނުންކަމެއް ކުރާނެ، ކުރެވޭނެ، ކުރެވެން ވެސް ޖެހޭނެ. އަންހެނުން ގައިގަ އެހާ ބާރާ، ހިތްވަރު ހުންނާނެ. މާދަމާ ހެނދުނުހެނދުނާ ފާއިޒާއަށް ގުޅާފަ އެހެން ބުނޭ! ހަމަ ޔަގީން ބަލާ އަންނާނެކަން."
ފާއިޒާ އެންމެ ރަނގަޅަށް އެނގޭނީ ދިފްލާއަށެވެ. ދިފްލާ އެހެން ބުނެފިއްޔާ ކަންތައް ވާނީ އެހެންނެވެ. އެ ޔަގީންކަމާ އެކުގައި ނަޖްވާން ނިދަން އޮށޯތެވެ. ހިތްއަވަސްވެފައިހުރި ވަރުން ނިންޖެއް ނައެވެ. ރާއިދު މަންމަ ފަހަރެއްގައި ނޫނެކޭ ބުނެފިއްޔާ ދެން ހަދާނީ ކިހިނެއްހެއްޔެވެ؟ ނަޖްވާންގެ ހިތް އުފައްދާ ސުވާލަކީ އެއީއެވެ. އެންމެ ފަހުން ނަޖްވާން ހިތަށްއެރިއެވެ. ހެނދުނު ވަންދެން އިންތިޒާރުކުރަންވީ ކީއްކުރަންހެއްޔެވެ؟ ވަގުތުން ގުޅާފައި އެހެން ބުނެލަންވީއެވެ. އޭރުން ވަރަށް ހިތްހަމަޖެހިގެން ނިދޭނެއެވެ. ފުންމައިގެން ތެދުވެ، ދެފައި ވަށްކޮށްލައިގެން އެނދުގައި އިށީނދެލިއެވެ. ފާއިޒާއަށް ގުޅައިލިއެވެ. ފުރަތަމަ ދެ ފަހަރު ފޯނު ނުނެގުމުން ތިންވަނަ ފަހަރު ވެސް ނަޖްވާން ގުޅިއެވެ. ފާއިޒާ ފޯނު ނެގިއެވެ.
"ހަލޯ!" ވަރަށް ނިދިއަޑަކުން ފާއިޒާ ބުނެލިއެވެ.
"މަންމާ! އަހަންނޭ! ވާހަކައެއް ބުނެލަންވެގެން،" ޖެހިލުންވެއިނދެ ނަޖްވާން ބުންޏެވެ. "ބުނަންވީތަ؟"
"މި ގަޑީގަ ކޮން ވާހަކައެއް ބުނަން؟" ފާއިޒާ ސުވާލުކުރިއެވެ.
"އަހަރެން ބަލާ މަންމަ އައިއްސިއްޔާ މިހާރު ވެސް ތި ގެއަށް ދާ ގޮތަށް މިހިރީ." ނަޖްވާން ބުންޏެވެ.
ނުނިމޭ