24 ފެބުރުއަރީ 2017 - 12:34
ސަރެޔޭވޯ (ފެބްރުއަރީ 24) - ސާބިއާ އިން 1990 ގެ އަހަރުތަކުގައި ބޮސްނިއާގައި ހިންގާފައިވާ ބޮޑު ގަތުލް އާއްމުން އެ ގައުމު ސަލާމްވެފައިވާ ކަމަށް ކޮށްފައިވާ ހުކުމް އަލުން މުރާޖާ ކުރުމަށް ބޮސްނިއާ އިން ރަސްމީކޮށް އެދިއްޖެ އެވެ.
ބޮސްނިއާގެ މުސްލިމް ރައީސް ބާކިރް އިޒެބެގޮވިޗް ވިދާޅުވީ ބޭނުމަކީ ހަގީގަތް ހާމަވެ އިންސާފު ލިބުން ކަމަށެވެ.
ބޮސްނިއާ ހަނގުރާމައިގައި މީހުން މެރި މައްސަލައިގައި ސާބިއާ ކުށްވެރި ނުވާ ކަމަށް ނިންމި ނިންމުން އިސްތިއުނާފް ކުރުމަށް އޮތް 10 އަހަރުގެ މުއްދަތު މި މަހު 26 ގައި ހަމަވާނެ އެވެ. ބޮސްނިއާ ހަނގުރާމައިގެ ގަތުލްއާއްމުގައި ސާބިއާގެ ސީދާ ބައިވެރިވުމެއް ނެތް ކަމަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ނިންމީ 2007 ވަނަ އަހަރު އެވެ.
ބޮސްނިއާގައި 1992-1995 އަށް ކުރި ހަނގުރާމައިގައި ސާބިއާ ސިފައިން ވަނީ ސްރެބެނިއްޒާގައި، 1995 ވަނަ އަހަރު ބޮސްނިއާގެ 8،000 މުސްލިމުން މަރައިފަ އެވެ. މިއީ ދެ ވަނަ ބޮޑު ހަނގުރާމަ އަށް ފަހު ޔޫރަޕުގައި ހިންގި އެންމެ ބޮޑު ގަތުލްއާއްމެވެ. އައިސީޖޭ އިން ބުނެފައި ވަނީ މީހުން މެރުން ހުއްޓުވުމަށް ސާބިއާ އިން މަސައްކަތް ކޮށްފައި ނުވުމަކީ ބައިނަލްއަގުވާމީ ގާނޫނާ ޚިލާފަށް ކުރި ކަމެއް ކަމަށެވެ.
ސާބް އޮފިޝަލުން ބުނެފައި ވަނީ އެ މައްސަލަ އިސްތިއުނާފްކޮށްފި ނަމަ ސިޔާސީ ގޮތުން އިތުރު މައްސަލަތައް އުފެދޭނެ ކަމަށެވެ. އެހެންވެ މި މައްސަލަ އިތުރަށް ކުރިއަށް ދާން ޖެހޭނީ ބޮސްނިއާ މުސްލިމުން، ބޮސްނިއާ ސާބުން އަަދި ބޮސްނިއާ ކްރޮއޭޓުން އެއްބަސްވެވޭ ގޮތަކަށް ކަމަށް ސާބް އޮފިޝަލުން ބުނެ އެވެ. ސާބިއާގެ ލީޑަރު މިލޮރާޑް ޑޮޑިކް ވެސް ވަނީ ސާބިއާގެ ސިޔާސީ ފަރާތްތަކުން އެކަމާ ދެކޮޅު ހެދުމަށް ގޮވާލައްވައިފަ އެވެ.