07 ޖުލައި 2024 - 10:59
ސެންޓާ ފޯ ހަޔާ ސެކަންޑަރީ އެޑިއުކޭޝަން (ސީއެޗްއެސްއީ)ގައި ނަމާދު ކުރަން ހާއްސަ ތަނެއް ހުޅުވައިފި އެވެ.
އިސްލާމިކް މިނިސްޓަރު މުހައްމަދު ޝަހީމް އަލީ ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ ސީއެޗްއެސްއީގައި ހެދި ތަނަކީ ސްކޫލްތަކުގެ ދަރިވަރުންނަށް ނަމާދުކުރުމުގެ ޖާގަ ތަނަވަސްކޮށްދިނުމަށް ކުރާ މަސައްކަތުގެ ދަށުން ކުރިއަށް ގެންދިޔަ މަސައްކަތެއް ކަމަށެވެ.
އިސްލާމިކް މިނިސްޓްރީން ފަންޑުކޮށްގެން ހެދި އެ ތަނަކީ ޖާގަ ތަނަވަސް ތަނެއް ކަމަށާއި އެތަނުގައި ވުޟޫކުރުމުގެ އިންތިޒާމް ވެސް ހަމަޖެހިފައި ހުންނާނެ ކަމަށް މިނިސްޓަރު ވިދާޅުވި އެވެ.
ސީއެޗްއެސްއީގެ ޕްރިންސިޕަލް ޒުހުދުލް ހައްގު (ޒުހުދު) ވިދާޅުވީ އަންހެން ކުދިންނާއި ފިރިހެން ކުދިންނަށް ވަކިން ނަމާދު ކުރެވޭ ގޮތަށް ހެދި އެ ތަނުގައި އެއްފަހަރާ 30 އަށް ވުރެ ގިނަ ދަރިވަރުންނަށް ނަމާދު ކުރެވޭނެ ކަމަށެވެ.
ސީއެޗްއެސްސީގެ 45 ވަނަ އަހަރީ ދުވަހާ ދިމާކޮށް މިދިޔަ ބުދަ ދުވަހު މި ތަން ހުޅުއްވައިދެއްވީ އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އެވެ.
ބައެއް ސްކޫލުތަކުގައި ނަމާދުކުރަން ހާއްސަ ކޮޓަރިއެއް ނޫނީ ތަނެއް މިހާރު ވެސް ހުންނަ އިރު އަނެއްބައި ސްކޫލްތަކުގެ ކްލާސްރޫމްގައި ނަމާދުކުރެ އެވެ.
މިހާރު 1،000 އަށް ވުރެ ގިނަ ކުދިން ކިޔަވާ ސީއެޗްއެސްސީގެ އާ އިމާރާތް، ހުޅުމާލޭގައި ހަދައި، ކިޔަވައިދޭން ފަށާފައި ވަނީ މިދިޔަ އަހަރުގެ މެދުތެރޭގަ އެވެ.