23 ފެބުރުއަރީ 2017 - 17:22
ބަންގްލަދޭޝްގައި ކުރިއަށްދާ ޝެއިހް ކަމާލް ކަޕްގައި މިއަދު ކުޅުނު ގްރޫޕްގެ ފަހު މެޗުން ދެކުނު ކޮރެއާގެ ޕޮޗެއޯން ސިޓިޒެން އެފްސީއާ 1-1 އިން އެއްވަރުކޮށް ރާއްޖޭގެ ޓީސީ ސްޕޯޓްސް ކްލަބް ގްރޫޕް އެއް ވަނައިގެ ގޮތުގައި ސެމީ ފައިނަލުން ޖާގަ ހޯދައިފަ އެވެ.
ޓީސީ އަށް ގްރޫޕްގެ އެއް ވަނަ ލިބުނީ ކުޅުނު ތިން މެޗުން ހަތް ޕޮއިންޓާ އެކު އެވެ. ދެ ވަނައިގައި ޕޮޗެއޯން އޮތީ ތިން މެޗުން ފަސް ޕޮއިންޓާ އެކު އެވެ. މި ގްރޫޕުން ސެމީގެ އަނެއް ޖާގަ ލިބުނީ ދެކުނު ކޮރެއާގެ ހަތަރު ވަނަ ޑިވިޝަންގައި ވާދަކުރަމުން އަންނަ ޕޮޗެއޯން އަށެވެ. ތިން ވަނައިގައި އޮތް ޑާކާ އަބަހާނީ އަށް ދެ މެޗުން އެއް ޕޮއިންޓް ލިބިފައިވާއިރު، އެ ޓީމު މިރޭ ކުޅޭ މެޗުން ގްރޫޕްގެ އެންމެ ފުލުގައި އޮތް ކިރްގިސްތާންގެ އަލްގާ ބިޝްކެކް އަތުން މޮޅުވި ނަމަވެސް ސެމީގެ ޖާގައެއް ނުލިބޭނެ އެވެ.
މިއަދުގެ މެޗަށް ޓީސީން ނުކުތީ ބަދަލުތަކާ އެކު އެވެ. އަނިޔާގެ ސަބަބުން ޓީމުގެ ކެޕްޓަން އަލީ ނާފިއު (ކަޅޭ) އާއި ޑިފެންޑަރު މުހައްމަދު އިންޝާދު ފުރަތަމަ އެގާރައިގައި ނުކުޅެ އެވެ.
ޓީސީން ވަނީ އެ ޓީމުގެ ފުރަތަމަ އެގާރައިގައި ތަޖުރިބާކާރު މިޑްފީލްޑަރު ޝަމްވީލް ގާސިމް (ބޮންޑާ)، މުހައްމަދު އައްޒާމް، ޔާމިން އިބްރާހިމް (ޔާމްބެ) އަދި ޒުވާން ކުޅުންތެރިޔާ އަހުމަދު އައިހަމް ހިމަނައިފަ އެވެ.
މި މެޗުގައި ފުރަތަމަ ހާފްގައި ޓީސީގެ މިސްރު ޑިފެންޑަރު އީސާ އެލް މަގްރަބީގެ ފަރާތުން ވަނީ ރަނގަޅު ކުޅުމެއް ފެނިގެން ގޮސްފަ އެވެ. ޕޮޗެއޯންގެ ފޯވާޑް ލައިން ހިފެހެއްޓުމުގައި އޭނާ ވަނީ މި ހާފްގައި ރަނގަޅު ކުޅުމެއް ދައްކައިފަ އެވެ.
ގޯލު ޖަހަން ރަނގަޅު ފުރުސަތުތަކެއް ޓީސީން ފުރަތަމަ ހާފްގައި ވަނީ ތަނަވަސްކޮށްފަ އެވެ. މިގޮތުން ޔާމްބެ ނަގައިދިން ކޯނަރަކުން އިބްރާހިމް މަހުދީ (ކުދު އިއްބެ) ބޮލުން ފޮނުވާލި ބޯޅަ ގޯލާ ސީދާ ވާގޮތެއްނުވި އެވެ.
ޓީސީން ލަނޑު ޖެހީ ފުރަތަމަ ހާފްގެ އިތުރު ވަގުތުގަ އެވެ. މި ލަނޑު އެ ޓީމަށް ކާމިޔާބު ކޮށްދިނީ ފުރަތަމަ ހާފްގެ އިތުރު ވަގުތުގައި ސެއިން ވިންސެންޓްގެ ފޯވާޑް ކޮނޭލިއަސް ސްޓެވާޓެވެ. މިއީ މި މުބާރާތުގައި ސްޓެވާޓް ޖެހި ދެ ވަނަ ލަނޑެވެ.
ޓީސީގެ އައްޒާމް ހުސްކޮށްލާފައި މެދުތެރެއިން ދިން ބޯޅަ ހިފައިގެން އޭރިއާ ތެރެއަށް ވަދެ ސްޓެވާޓް ފޮނުވާލި ބޯޅަ ތިރިތިރިން ގޮސް އަމާޒުވީ ގޯލުގެ ތިރީ ކަނަށެވެ.
ދެ ވަނަ ހާފް ފަށައިގެން ޕޮޗެއޯން އިން ކުޅުން ރަނގަޅުކޮށް ޓީސީ އަށް ނުރައްކާ ކުރި އެވެ. މި ހާފްގައި ޓީސީގެ އިއްބެ އަށް ލީޑުފުޅާކުރަން ރަނގަޅު ފުރުސަތެއް ލިބި ބޭކާރުވި އެވެ. މެޗުގެ 62 ވަނަ މިނިޓްގައި ބޮންޑާ ހުސްކޮށްލާފައި ދިނުމުން އިއްބެ އެ ބޯޅަ ގޯލަށް ފޮނުވާލަން މަސައްކަތް ކުރި ނަމަވެސް ޕޮޗެއޯން ކީޕަރު މަތަކުރި އެވެ.
ޕޮޗެއޯން އިން އެއްވަރުކުރީ މެޗުގެ 78 ވަނަ މިނިޓްގަ އެވެ. ޓީސީ އޭރިއާ ތެރެއިން އައްޒާމް ޕޮޗެއޯން ކުޅުންތެރިޔަކަށް ފައުލުކުރުމުން ދިން ޕެނަލްޓީ އެ ޓީމުން ފޮނުވާލި ނަމަވެސް އަމާޒުވީ ގޯލުގެ ދަނޑިއަށެވެ. އެ ބޯޅަ ދެ ވަނަ ފަހަރަށް ލިބުމުން ޕޮޗެއޯންގެ ޕާކް ޖުން ސޫ ވަނީ ގޯލުގެ ތިރީ ކަނަށް ބޯޅަ އަމާޒުކޮށްލައިފަ އެވެ.
ލަނޑަށް ފަހު ޕޮޗެއޯން އިން ކުޅުން ރަނގަޅުކުރި އެވެ. އަދި އެ ޓީމުން ނުރައްކާތެރި ހަމަލާތަކެއް ފޮނުވާލިއިރު ބައެއް ބޯޅަތައް ޓީސީގެ ނޭޕާލް ކީޕަރު ކިރަން ޝެމްޝޮން ވަނީ މަތަކޮށްފަ އެވެ.
މިއީ 2005 ވަނަ އަހަރުގެ އޭއެފްސީ ކަޕްގެ ސެމީ ފައިނަލަށް ރާއްޖޭގެ ނިއު ރޭޑިއަންޓް ދިޔަ ފަހުން ރާއްޖޭގެ ކްލަބެއް ބޭރު މުބާރާތެއްގެ ސެމީން ޖާގަ ހޯދި ފުރަތަމަ ފަހަރެވެ.
މުބާރާުތުގެ ސެމީ ފައިނަލުގައި އަންނަ އާދިއްތަ ދުވަހު ހަވީރު ޓީސީ ކުޅޭނީ ގްރޫޕް ބީގެ ދެ ވަނަ ޓީމާ ދެކޮޅަށެވެ. އެ ގްރޫޕްގެ ދެ ވަނަ ޓީމެއް ކަނޑައެޅޭނީ މާދަމާގެ މެޗުތަކަށް ފަހު އެވެ.