03 ޖުލައި 2024 - 06:04
ފަލަސްތީނުގެ ޣައްޒާގައި މިހާރު 1.9 މިލިއަން މީހުންގެ ގެދޮރު ގެއްލި މަގުމަތިވެފައިވާ ކަމަށާއި، ޚާން ޔޫނިސް އިން އިތުރަށް މީހުން ބޭރުކުރަން އިޒްރޭލުން މަސައްކަތްކުރަމުން ދާތީ ކަންބޮޑުވެ ވަޑައިގަންނަވާ ކަމަށް އެ ސަރަހައްދަށް ކަނޑައަޅާފައިވާ އދ.ގެ އިންސާނީ އެހީގެ ކޯޑިނޭޓަރު އިއްޔެ ވިދާޅުވެއްޖެ އެވެ.
އދ. އިން އަންދާޒާކޮށްފައިވާ ގޮތުގައި، ގާޒާގެ ދެވަނަ އަށް އެންމެ ބޮޑު ސިޓީ ކަމަށްވާ ޚާން ޔޫނިސް ކައިރީގައިވާ އަލް-ގަރާރާ، ބަނީ ސުހައިލާ އަދި އެހެން ސަރަހައްދުތަކުން އިޒްރޭލު ސިފައިން އާންމުން ނުކުތުމަށް ކޮށްފައިވާ އަމުރުގެ ސަބަބުން 250,000 މީހުންނަށް އެކަމުގެ އަސަރުކުރާނެ އެވެ.
"އެއް މިލިއަނަށްވުރެ ގިނަ މީހުން ވަނީ އަނެއްކާވެސް މަގުމަތިވެފައި. ރައްކާތެރި ހިޔާވަހިކަމެއް ހޯދަން އެ މީހުން ހާސްކަމުގެ ތެރޭ އެ ދަނީ މަސައްކަތްކުރަމުން. އަދި މިހާރު ޣައްޒާގެ އެކި ސަރަހައްދުތަކުގައި 1.9 މިލިއަން މީހުން ވަނީ މި ހާލުގައި. ޚާން ޔޫނިސް ސަރަހައްދުން އިތުރަށް މީހުން ނުކުތުމަށް އަންގާފައިވާ ކަމަށް ލިބޭ ރިޕޯޓުތަކާމެދު ވަރަށް ކަންބޮޑުވޭ،" ސިގްރިޑް ކާގް އދ.ގެ ސަލާމަތީ މަޖިލީހުގައި ވިދާޅުވި އެވެ.
"ޣައްޒާގައި ތިބި ފަލަސްތީނު އާންމު ރައްޔިތުން ވަނީ އަރައިނުގަނެވޭ ފަދަ ކެކުޅުމުގެ ތެރެއަށް ވެއްޓިފައި. އެ މީހުންގެ ގެދޮރު ވަނީ ހަލާކުވެފައި، އެމީހުންގެ ދިރިއުޅުން ވަނީ ބަދަލުވެފައި. މި ހަނގުރާމައިން އެންމެ ބޮޑު އިންސާނީ ކާރިސާގެ ހާލަތެއް ހަމައެކަނި އުފެދުނީއެއް ނޫން. އޭގެ ސަބަބުން އިންސާނީ ބޮޑު ހިތާމައެއް ވަނީ އާންމުވެފައި،" އޭނާ ވިދާޅުވި އެވެ.
އޭނާ ބުނިގޮތުގައި ހަނގުރާމައިގެ ސަބަބުން ވީރާނާވެފައިވާ އެ ސަރަހައްދަށް އެކަށީގެންވާ މިންވަރަށް އެހީ ނުލިބޭކަމަށާއި، އަދި އިންސާނީ ކާރިސާއެއް ހުއްޓުވުމަށްޓަކައި އައު ކްރޮސިންގތަކެއް، ޚާއްޞަކޮށް ދެކުނު ގާޒާއަށް، ހުޅުވުމަކީ މުހިންމުކަމެއް ކަމުގައެވެ.
ކާގް ވިދާޅުވި ގޮތުގައި ޣައްޒާ އާއި މިސްރާ ދެމެދުގައިވާ ރަފާ ކްރޮސިން އަލުން ހުޅުވަންޖެހެ އެވެ. އަދި ހާލުގައި ޖެހިފައިވާ މީހުންނަށް އެހީވުމަށް ފަންޑު ހޯދުމަށް އިތުރަށް މަސައްކަތްކުރުމަށް ބައިނަލްއަގުވާމީ މުޖުތަމައުއަށް އިލްތިމާސް ކުރެއްވި އެވެ.
މިދިޔަ އަހަރުގެ އޮކްޓޯބަރު 7 ގައި ހަމާސްއިން ދެކުނު އިސްރާއީލަށް ދިން ހަމަލާގައި 1,195 މީހުން މަރާލުމާ އެކު ހަމާސް ނައްތާލުުމުގެ ނަމުގައި އިޒްރޭލުން ދޭން ފެށި ހަމަލާތަކުގައި މިހާތަނަށް 38،000 އެއްހާ މީހުން ފަލަސްތީނުން ވަނީ ޝަހީދުކޮށްލައިފަ އެވެ.
ހަމާސް އިން އިޒްރޭލުގެ 251 މީހުން ރަހީނުކޮށްފައި ވާއިރު އޭގެ ތެރެއިން 116 މީހުން އަދިވެސް ޣައްޒާގައި އެބަތިބި ކަމަށާއި އޭގެ ތެރެއިން 42 މީހުން މަރުވެފައިވާކަމަށް އިޒްރޭލުން ބުނެ އެވެ.
ހަމަލާތައް ހުއްޓުމަކަށް ގެނައުމަށް ބައިނަލްއަގުވާމީ ކޯޓުންނާއި އދ. އިން އެންގިޔަސް އިޒްރޭލުން އެއިން އެއްވެސް އެންގުމަކަށް ތަބައެއް ނުވެ އެވެ. އަދި އެމެރިކާ އާއި ގަތަރާއި މިސްރުން އިޒްރޭލާއި ހަމާސް އެއްބަސްވުމަކަށް ގެންނަން ކުރާ މަސައްކަތް ވެސް ކޮޅެއްގައި ނުޖެ އެވެ. -- އޭއެފްޕީ