01 ޖުލައި 2024 - 20:55
ދިރާގާއި ސްޕާކް ހަބް ގުޅިގެން "ލީން ސްޓާޓްއަޕް މޯލްޑިވްސް"ގެ ކޭމްޕެއް މި މަހު އައްޑޫގައި ބާއްވަން ނިންމައި، ރަޖިސްޓްރޭޝަނަށް ހުޅުވާލައިފި އެވެ.
ލީން ސްޓާޓް އަޕް މޯލްޑިވްސް އަކީ ވިޔަފާރިތައް ފެށުމާއި ބިނާކުރުމަށް ބޭނުންވާ ފަރާތްތަކަށް އެކަމަށް އަހުލުވެރިކޮށް ތަމްރީނުތައް ދިނުމަށް ބާއްވާ ކޭމްޕެކެވެ.
ދިރާގުން ބުނި ގޮތުގައި، މި ކޭމްޕަކީ އުއްމީދީ ވިޔަފާރިވެރިންނާއި އިނޮވޭޓަރުންނަށް ސްޓާޓްއަޕްތައް ބިނާކޮށް، އިނޮވޭޝަން ހިންގުމަށް ބޭނުންވާ އިލްމާއި ވަސީލަތްތަކާއި ވިސްނުމަށް އަހުލުވެރިކުރުމަށް ފަރުމާކޮށްފައިވާ އިންޓެންސިވް ސްޓާރޓްއަޕް ބޫޓް ކޭމްޕެކެވެ.
މިއީ އައްޑޫގައި މި ކޭމްޕު ބާއްވާ ފުރަތަމަ ފަހަރެވެ. އައްޑޫގައި މި ކޭމްޕު އޮންނާނީ މި މަހުގެ 19 ވަނަ ދުވަހުން 21 ވަނަ ދުވަހުގެ ނިޔަލަށް ގަމުގައި ހުންނަ އީކުއޭޓާ ވިލެޖުގަ އެވެ.
ދިރާގުން ބުނީ އެ ކޭމްޕުގައި ލީން ސްޓާޓްއަޕް ކެންވަސް ބޭނުންކޮށްގެން ވިޔަފާރީގެ ހިޔާލުތައް ތަރައްގީކޮށް އިތުރަށް ފުރިހަމަ ކުރުމަށް އަމަލީ ހަރަކާތްތަކާއި ގްރޫޕް ހަރަކާތްތަކާއި ތަޖުރިބާކާރުންގެ ސެޝަންތައް ކުރިއަށް ދާނެ ކަމަށެވެ.
އަދި ދެމެހެއްޓެނިވި ވިޔަފާރިއެއް ބިނާކުރުމަށްޓަކައި އެނގެން ޖެހޭ އަސާސީ ކަންތައްތަކާއި ކަސްޓަމަރުން ދެނެގަނެ، ހޯދުމުގެ މަރުހަލާއާ ބެހޭ އެކި ވަސީލަތްތަކާއި އުކުޅުތައް ވެސް އެ ކޭމްޕްގައި ދަސްކޮށްދޭނެ ކަމަށް ދިރާގުން ބުނެ އެވެ،
ދިރާގާއި ސްޕާކްހަބް ގުޅިގެން ލޯކަލް ސްޓާޓްއަޕް ސަގާފަތަށް އެހީތެރިކަން ފޯރުކޮށްދީ، ސްޓާޓްއަޕް އިކޯސިސްޓަމް ރާއްޖޭގައި ގާއިމުކުރުމަށް ދަނީ އެހީތެރިކަން ފޯރުކޮށްދެމުންނެވެ. ދިރާގުން ސްޕާކް ހަބާއި ގުޅިގެން ކޮންމެ އަހަރަކު ވެސް ދަނީ މި ބޫޓްކޭމްޕު ބާއްވަމުންނެވެ.
މި ކޭމްޕުގައި ރަޖިސްޓާވާން ބޭނުންވާ ފަރާތްތަކަށް bit.ly/LSM-Addu ލިންކުން ރަޖިސްޓްރީ ކުރެވޭނެ އެވެ.