25 ޖޫން 2024 - 14:06
މަސައްކަތްތެރިންގެ ޖަމިއްޔާތައް އުފެއްދުމާއި އެ ޖަމިއްޔާތަކުގައި ބައިވެރިވުމުގެ ހައްގު ލިބޭ ގޮތަށް ޔޫނިއަންގެ ފުރަތަމަ ރަޖިސްޓްރާއަކަށް އާމިނަތު ޝާނީ ހަމަޖައްސައިފި އެވެ.
އިންޑަސްޓްރިއަލް ރިލޭޝަންސް ގާނޫނުގެ ދަށުން، މަސައްކަތްތެރިންގެ ޖަމިއްޔާތައް ރަޖިސްޓްރީކޮށްދިނުމާއި ލިޔެކިޔުންތައް ބަލައިގަތުމަށް، އެ ގާނޫނަށް އަމަލުކުރަން ފަށާތާ އެއް މަސް ދުވަހުގެ ތެރޭގައި ރަޖިސްޓްރާއެއް ހަމަޖައްސަން ޖެހެ އެވެ.
އޭގެ ދަށުން، މިދިޔަ މަހުގެ 5 ވަނަ ދުވަހު ޝާނީ ވަނީ އެ މަގާމަށް އައްޔަންކޮށްފަ އެވެ.
ޔޫނިއަން ރަޖިސްޓާގެ މަގާމުގެ މުއްދަތަކީ ފަސް އަހަރުގެ އެއް ދައުރެވެ. އެ މަގާމުގެ ޝަރުތުތަކުގެ ތެރޭގައި މަސައްކަތާ ގުޅުންހުރި ދާއިރާއަކުން މާސްޓަސް ޑިގްރީއެއް ހާސިލްކުރުން ހިމެނެ އެވެ.
ޝާނީ ވަނީ އިކޮނޮމިކް މިނިސްޓްރީގެ ޑިރެކްޓަރުކަން ކުރައްވައިފަ އެވެ. އޭގެ އިތުރުން ޖެންޑާ މިނިސްޓްރީގެ އެޗްއާރުގެ އެސިސްޓެންޓު ޑިރެކްޓަރުކަން ފުރުއްވި އެވެ.