14 ޖޫން 2024 - 07:04
އިންޑިއާގެ ކެރެލާ ސްޓޭޓްގެ އިންޖިނިއަރިން ޔުނިވާސިޓީއެއްގައި ބާއްވާ އިވެންޓެއްގައި ޕާފޯމްކުރަން ބޮލީވުޑް އެކްޓަރު ސަނީ ލިއޯން އަށް ހުއްދަ ނުދޭން އެ ކޮޖެލުން ނިންމައިފި އެވެ.
ޓްރިވެންޑްރަމްގައި ހުންނަ އެ ޔުނިވާސިޓި ކޮޖެލް އޮފް އިންޖީނިއަރިންގައި ސަނީ ޕާފޯމްކުރަން ހަމަޖައްސާފައި ވަނީ އަންނަ މަހު ފަހެއްގަ އެވެ. އެއީ އެ ޔުނިވާސިޓީގެ ސްޓޫޑެންޑް ޔޫނިއަން އިން އިންތިޒާމުކުރާ އިވެންޓެއްގަ އެވެ.
އެ ޔުނިވާސިޓީގެ ވައިސް ޗާންސެލަރު ޑރ. މޮހަނާން ކުންނުމަލް ވަނީ އެ އިވެންޓަށް ސަނީ ގެނައުން މަނާކޮށް، އެ އިވެންޓުގެ އެޖެންޑާގައި ސަނީގެ ހުށަހެޅުން ނުހިމަނަން ޔުނިވާސިޓީގެ ރެޖިސްޓަރާ އަށް އަންގައިފަ އެވެ.
ޔުނިވާސިޓީގެ ކެމްޕަހުގެ އެތެރޭގައި އާއި ބޭރުގައި ވެސް ސަނީ ބައިވެރިވާ އެއްވެސް ހަރަކާތެއް އިންތިޒާމުކޮށްގެން ބޭއްވުމުގެ ހުއްދަ ނުދޭނެ ކަމަށް އޭނާ ވިދާޅުވި އެވެ.
ރިޕޯޓްތައް ބުނި ގޮތުގައި، އެ ޕްރޮގްރާމް ހިންގުމަށް ޔުނިވާސިޓީގެ ހުއްދަ ކުރިން ހޯދާފައި ވެސް ނުވެ އެވެ.
އެ ޔުނިވާސިޓީގެ މެނޭޖުމަންޓުން މި ގޮތަށް ނިންމާފައި ވަނީ ކެރެލާގެ ސްޓޭޓް ސަރުކާރުން ކެމްޕަސްތަކުގައި އާއި ބޭރުގައި ޑީޖޭ ޕާޓީތަކާއި މިއުޒިކް ނައިޓްސް ކަހަލަ ކަންކަން ބޭއްވުން މަނާކޮށްފައި ވަނިކޮށެވެ. ސަރުކާރުން އެކަން މަނާކުރީ ކޮޗީގެ ޔުނިވާސިޓީއެއްގައި މިދިޔަ އަހަރު ބޭއްވި އިވެންޓެއްގައި ދަރިވަރުންތަކެއް މަރުވުމުންނެވެ.
މިދިޔަ އަހަރު ކޮޗިން ޔުނިވާސިޓީ އޮފް ސައިންސް އެންޑް ޓެކްނޮލޮޖީ (ސީޔޫއެސްއޭޓީ) ގައި ހިނގި އެ ހާދިސާގައި ވަނީ ހަތަރު ދަރިވަރަކު މަރުވެ، 64 ދަރިވަރަކު ޒަހަމްވެފަ އެވެ. އަދި އެ ހާދިސާ ހިނގާފައި ވަނީ ކެމްޕަހުގެ އޯޕަން އެއާ އޮޑިޓޯރިއަމެއްގައި ނިކިތާ ގާންދީ އިސްކޮށް ހުރެ ބޭއްވި މިއުޒިކް ކޮންސެޓެއްގެ ތެރެއިންނެވެ.