22 ފެބުރުއަރީ 2017 - 09:26
މެންޗެސްޓާ (ފެބްރުއަރީ 22) - ޔުއޭފާ ޗެމްޕިއަންސް ލީގުގެ ދެ ވަނަ ބުރުގައި ރޭ ފްރާންސްގެ މޮނާކޯ އަތުން 5-3 އިން މޮޅުވެ މެންޗެސްޓާ ސިޓީން ފެންވަރު ދައްކާލައިފި އެވެ.
މެޗުގެ 26 ވަނަ މިނިޓްގައި ރަަހީމް ސްޓާލިން ސިޓީ އަށް ލީޑުނަގައިދީފައިވަނިކޮށް މޮނާކޯ އިން ވަނީ ފުރަތަމަ ހާފް ނިމުމުގެ ކުރިން ރަޑަމެލް ފަލްކާއޯ އާއި ކިލިއަން އެމްބާޕޭގެ ލަނޑުތަކުން ނަތީޖާ އަނބުރާލައިފަ އެވެ.
ދެ ވަނަ ހާފް ފަށައިގެން ފަސް މިނިޓް ތެރޭ ލީޑުފުޅާކުރަން މޮނާކޯ އަށް ރަނުގެ ފުރުސަތެއް ލިބުނެވެ. މެޗުގެ 50 ވަނަ މިނިޓްގައި ފަލްކާއޯ ފޮނުވާލި ޕެނަލްޓީ ސިޓީގެ ކީޕަރު ވިލީ ކަބަލޭރޯ ވަނީ މަތަކޮށްފަ އެވެ. މިއާ އެކު ޗެމްޕިއަންސް ލީގުގައި އެންމެ ފަހުން ސިޓީ ކޮޅަށް ފޮނުވާލި ފަސް ޕެނަލްޓީ ވެސް ކާމިޔާބެއް ނުވެ އެވެ. ކަބަލޭރޯ ދެ ޕެނަލްޓީ މަތަކުރިއިރު، ޖޯ ހާޓް ވަނީ ތިން ޕެނަލްޓީ ދިފާއުކޮށްފަ އެވެ.
މޮނާކޯ އަށް ލިބުނު ފުރުސަތުގެ ބޭނުން ނުހިފުމުގެ ނަތީޖާއަކަށްވީ މެޗުގެ 58 ވަނަ މިނިޓްގައި ސާޖިއޯ އަގުއޭރޯ ސިޓީ އަށް އެއްވަރުކޮށްދިނުމެވެ. އެހެން ނަމަވެސް އޭގެ ދެ މިނިޓް ފަހުން ފަލްކާއޯ ވަނީ ލަނޑެއް ޖަހައި އަލުން މޮނާކޯ އަށް ލީޑުނަގައިދީފަ އެވެ.
ސިޓީން ނަތީޖާ އެ ޓީމު ކޮޅަށް އަނބުރާލީ ފަހު 20 މިނިޓް ތެރޭގައި ދެއްކި މޮޅު ކުޅުމާ އެކު އެވެ. އެ ޓީމު ވަނީ އެ ވަގުތު ކޮޅުގެ ތެރޭގައި މެޗު ކޮންޓްރޯލް ކޮށްގެން ގިނަ ފުރުސަތުތަކެއް ހޯދައިފަ އެވެ. ސިޓީ އަށް ދެ ވަނަ ފަހަރަށް އެއްވަރުކޮށްދިން ލަނޑު މެޗުގެ 71 ވަނަ މިނިޓްގައި ޖެހީ ވެސް އަގުއޭރޯ އެވެ.
ނަތީޖާ ހަމަހަމަކޮށް ސިޓީން އެޓޭކް ވަރުގަދަ ކުރިއިރު މެޗުގެ 77 ވަނަ މިނިޓްގައި ސިޓީ އަށް އަލުން ލީޑުނަގައިދިނީ ޖޯން ސްޓޯންސް އެވެ. އޭގެ ފަސް މިނިޓް ފަހުން ސިޓީގެ ފަސް ވަނަ ލަނޑު ޖެހީ ލިރޯއީ ސާނޭ އެވެ.
މެޗަށް ފަހު ސިޓީގެ ކޯޗު ގާޑިއޯލާ ބުނީ ކުއާޓާގެ ޖާގައެއް ހޯދަން އަދިވެސް ވަރަށް ބުރަކޮށް މަސައްކަތް ކުރަން ޖެހޭ ކަމަށެވެ.
"މިއީ އަދި މަސައްކަތުގެ އެއްބައި. ކުއާޓާ އަށް ދާން ބޭނުންނަމަ ޔަގީނުންވެސް މޮނާކޯ ދަނޑުގައި ލަނޑު ޖަހަން ޖެހޭ. އެއީ ޗެމްޕިއަންސް ލީގުގެ މެޗެއް އެއްވަރުކޮށްލަން ވިސްނައިގެން ކުޅުމަކީ ފަސޭހަކަމަކަށް ނުވާތީ،" ގާޑިއޯލާ ބުންޏެވެ.
މޮނާކޯގެ ކޯޗު ލިއަނާޑޯ ޖާޑިމް ބުނީ މެޗު ގެއްލުނީ އޭނާގެ ޓީމަށް ޕްރެޝަރުގައި ގޯސްތަކެއް ހެދުމުން ކަމަށާއި އަމިއްލަ ދަނޑުގައި ކުޅޭ މެޗުން ނަތީޖާ ނެރެގެން ކުއާޓާ އަށް ދެވޭނެ ކަމުގެ އިތުބާރު އެބައޮތް ކަމަށެވެ.