03 މެއި 2024 - 09:02
ހަމާސް އާ ދެކޮޅަށް ހަނގުރާމަކުރުމުގެ ނަމުގައި ފަލަސްތީނުގެ ޣައްޒާއަށް އެހީ ވެއްދުމަށް ހުރަސްއަޅަމުންދާތީ، އިޒްރޭލާ އެކު ވިޔަފާރި ކުރުން ތުރުކީން ވަގުތީ ގޮތުން ހުއްޓާލައިފި އެވެ.
"އިޒްރޭލަށް އެކްސްޕޯޓް ކުރުމާއި އިމްޕޯޓް ކުރުން ވަނީ ހުއްޓާލާފައި. ޣައްޒާއަށް އިންސާނީ އެހީ މެދުކެނޑުމެއްނެތި ފޯރުކޮށްދިނުމުގެ ހުއްދަ އިޒްރޭލުން ނުދޭހާ ހިނދަކު މި ފިޔަވަޅު ދެމި އޮންނާނެ،" ތުރުކީގެ ޓްރޭޑް މިނިސްޓްރީން ނެރުނު ބަޔާނެއްގައި ބުންޏެވެ.
މި ނިންމުމާ ގުޅިގެން، ދެ ގައުމުގެ މެދުގައި ހެދިފައިވާ އެއްބަސްވުންތަކާ ތުރުކީގެ ރައީސް ރަޖަބު ތޮއްޔިބު އުރުދުޣާން ކަނޑައެޅިގެން ހިލާފުވެފައިވާ ކަމަށް އިޒްރޭލުގެ ފޮރިން މިނިސްޓަރު އިސްރާއީލް ކަޓްޒް ވަނީ ތުހުމަތު ކުރައްވައިފަ އެވެ.
މިދިޔަ އަހަރުގެ އޮކްޓޫބަރު މަހުގެ ހަތް ވަނަ ދުވަހުން ފެށިގެން އިޒްރޭލުން ޣައްޒާއަށް ދެމުން ގެންދާ ހަމަލާތަކުގައި ފަލަސްތީނުން މިހާތަނަށް 34،000 އަށް ވުރެ ގިނަ މީހުން ޝަހީދުވެފައި ވާއިރު ކާބޯތަކެތި ހުސްވެ އާންމުން އުޅެމުންދަނީ ވަރަށް ދަތި ހާލުގަ އެވެ.
އަދި އަވަހަށް އެހީ ފޯރުކޮށްނުދެވިއްޖެނަމަ، ޣައްޒާގައި ދިރިއުޅޭ އެތައް މިލިއަން ފަލަސްތީނުގެ ރައްޔިތުން ބަނޑައްޖެހޭނެ ކަމުގެ އިންޒާރު އދ. އާއި އެހީފޯރުކޮށްދޭ ޖަމާއަތްތަކުން ދަނީ ދެމުންނެވެ. - އޭއެފްޕީ -