29 އެޕްރީލް 2024 - 11:38
ފުލުހުންގެ ހިދުމަތުގައި އަންހެނުންގެ ބައިވެރިވުމާއި އިސްކަން ވަރަށް މުހިންމު ކަމަށް ފަސްޓް ލޭޑީ ސާޖިދާ މުހައްމަދު ރޭ ވިދާޅުވެއްޖެ އެވެ.
"މޯލްޑިވްސް ވިމެން އިން ޕޮލިސިން ކޮމިޓީ" ގެ ދެ ވަނަ ދައުރު އިފްތިތާހު ކުރުމަށް އިސްކަންދަރު ކޮށީގައި ބޭއްވި ރަސްމިއްޔާތުގައި ފަސްޓް ލޭޑީ ސާޖިދާ ވިދާޅުވީ، ދިވެހި ފުލުހުންގެ މުހިންމު ދައުރުގެ ތެރެއިން އަންހެން ފުލުހުންގެ ދައުރު ފާހަގަކޮށްލެވޭ ކަމަށެވެ.
ސާޖިދާ ވިދާޅުވީ، ފުލުހުންގެ ހިދުމަތުގެ ތެރޭގައި އަންހެނުންގެ ބާރު ހަރުދަނާވެ، އަންހެނުންގެ ދައުރު ފުޅާވުމުން އެ މުއައްސަސާގެ މަސްއޫލިއްޔަތު އަދާކުރުމުގައި ހެޔޮ ނަތީޖާ ފެންނާނެ ކަމަށެވެ.
ފުލުހުންގެ މުއައްސަސާގެ އެކި ހިދުމަތްތަކާއި އެކި ދާއިރާތަކުގައި އަންހެން ފުލުހުންގެ ބަހާއި ބައިވެރިވުމާއި އިސްކަން މުހިންމު ކަން ތަކުރާރުކޮށް ސާޖިދާ ފާހަގަކުރެއްވި އެވެ.
ރާއްޖޭގެ އަމްނު ބެލެހެއްޓުމުގައި ދިވެހި އަންހެން ފުލުހުން އަދާކުރާ މުހިންމު ދައުރަށްޓަކައި އެކަމަނާ ފަހުރުވެރިވެވަޑައިގަންނަވާ ކަމަށާއި އެގޮތުގައި ކުރިއަށް ދިއުމަށް ސާޖިދާ ގޮވައިލެއްވި އެވެ.
ސާޖިދާ ވިދާޅުވީ، އަންހެނުންގެ ބާރުވެރިކަން އިތުރުކުރެވޭނެ މަގެއް ހޯދުން މުހިންމު ކަމަށާއި އަންހެނުންގެ ގާބިލްކަން އިތުރުވަމުންދާ ވަރަކަށް މުޖުތަމައުގައި ހުރި އަންހެނުންނާ ގުޅޭ މައްސަލަތައް ހައްލުކުރުމަށް މަގުފަހިވާނެ ކަމަށެވެ.
ރޭގެ ރަސްމިއްޔާތުގައި ފަސްޓް ލޭޑީ ވަނީ "މޯލްޑިވްސް ވިމެން އިން ޕޮލިސިން ކޮމިޓީ" އިން އެކުލަވާލައި ޝާއިއުކުރަމުން އަންނަ "މޯލްޑިވްސް ވިމެން އިން ޕޮލިސިން މަންތްލީ ނިއުސް ލެޓާ' ފޮތް ވެސް އިފްތިތާހު ކޮށްދެއްވައިފަ އެވެ.